ފިއްލަދޫގެ ޒުވާނުންނަށް އަމާޒުކޮށްގެން "ފިއްލަދޫ ކައުންސިލް ކަޕް 2021" ބޭއްވުމަށް ހަމަޖެހިއްޖެ
މުބާރާތުގައި ބައިވެރިވުމުގެ ފުރުސަތު މިހާރުވަނީ ހުޅުވާލެވިފައި
ހއ. ފިއްލަދޫގައި ކުރިއަށް ގެންދެވުނު ފުޓްބޯޅަ މުބާރާތެއްގެ ތެރެއިން
ހއ. ފިއްލަދޫ ކައުންސިލާއި ފިއްލަދޫ އިޖްތިމާއީ މަރުކަޒު ގުޅިގެން، "ފިއްލަދޫ ކައުންސިލް ކަޕް 2021"ގެ ނަމުގައި ފިއްލަދޫ ދެ ޖިންސުގެ ޒުވާނުންނަށް އަމާޒުކޮށްގެން ކުޅިވަރު މުބާރާތްތަކެއް ބޭއްވުމަށް ހަމަޖެހިއްޖެއެވެ.
މި މުބަރާތްތައް ފެށުމަށް ހަމަޖެހިފައިވަނީ ޑިސެމްބަރު 25 ވަނަ ދުވަހުއެވެ. ފިއްލަދޫ ކައުންސިލުން ހާމަކުރާ ގޮތުގައި މިފަދަ މުބާރާތްތަކެއް ބޭއްވުމުގެ މައިގަނޑު މަގުސަދަކީ ފިއްލަދޫ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލަކުރުމާއި، ކުޅިވަރުގެ ދާއިރާއިން މީހުން ބިނާކުރުމެވެ. އެގޮތުން ފިރިހެނުންނަށް ޚާއްސަކޮށްގެން ފުޓްބޯޅަ މުބާރާތެއް ބެއްވުމަށް ހަމަޖެހިފައިވާއިރު، އަންހެނުންނަށް ޚާއްސަކޮށްގެން ބޭއްވުމަށް ހަމަޖެހިފައިވަނީ ހޭންޑްބޯޅަ މުބާރާތެކެވެ.
ފިއްލަދޫ ކައުންސިލުން ހާމަކޮށްފައިވާ ގޮތުގައި، މި 2 މުބާރާތް ކުރިއަށް ގެންދެވޭނީ މަދުވެގެން 5 ޓީމް ރަޖިސްޓްރީ ކުރެވިގެންނެވެ. އެގޮތުން ފުޓްބޯޅަ މުބާރާތުގައި ބައިވެރިވުމަށް ހުށަހަޅާފައިވާ އެންމެ ފަހުގެ ތާރީޚާ ހަމައަށް، މަދުވެގެން 5 ޓީމް ބައިވެރިނުވާނަމަ، މުބާރާތް ކުރިއަށް ގެންދާނީ މުބާރާތް ކުޅުމަށް ޝައުގުވެރިވާ ކުޅުންތެރިން ޓީމްތަކަށް ބަހާލައިގެން 5 ޓީމް ހަމަވާނަމައެވެ. އަދި ކޮންމެ ޓީމެއްގައި މަދުވެގެން 10 ކުޅުންތެރިން ހިމަނަންވާނެ ކަމަށާއި، ޓީމެއްގައި ގިނަވެގެން (ރަށުންބޭރު ކުޅުންތެރިންނާއެކު) ހިމެނޭނީ 14 ކުޅުންތެރިންކަމަށެވެ. އަދި ކޮންމެ ޓީމެއްގައި ހިމެނޭނީ ރަށުންބޭރު 3 ކުޅުންތެރިން ކަމަށްވެސް ފިއްލަދޫ ކައުންސިލުން ހާމަކުރެއެވެ.
ފިއްލަދޫ ކައުންސިލުން ހާމަކޮށްފައިވާ ގޮތުގައި މި ދެ މުބާރާތުގައިވެސް ބައިވެރިވެވެނީ 14 އަހަރުން މަތީގެ ކުޅުންތެރިންނަށެވެ. އަދި ޓީމްތަކުގެ އޮފިޝަލުންގެ ގޮތުގައި 18 އަހަރުން މަތީގެ ފަރާތްތަތަށް ތިބުމަށާއި 18 އަހަރުން ދަށުގެ ކުޅުންތެރިން ބެލެނިވެރިޔާގެ އިއުތިރާޒެއް ނެތްކަމުގެ ފޯމް ހުށަހަޅަން ޖެހޭނެ ކަމަށެވެ.
މި މުބާރާތްތަކުގައި ބައިވެރިވުމުގެ ފުރުސަތު މިހާރުވަނީ ހުޅުވާލާފައިއެވެ. މުބާރާތުގައި ބައިވެރިވުމަށް އެދޭ ފޯރމް ރަސްމީ ކޮންމެ ދުވަހެއްގެ ހެނދުނު 8:00އިން 12:00އަށް، ފިއްލަދޫ ކައުންސިލް އިދާރާއިން ލިބެން ހުންނާނެކަމަށް އެ އިދާރާއިން ހާމަކުރެއެވެ. އެގޮތުން މުބާރާތްތަކުގައި ބައިވެރިވުމަށް އެދޭ ފޯރމް އެ އިދާރާއަށް ހުށަހެޅުމަށް އެދިފައިވާއިރުގައި، ފުޓްބޯޅަ މުބާރާތުގައި ބައިވެރިވުމަށް ފޯރމް ހުށަހެޅޭނެ އެންމެ ފަހުގެ ތާރީޚަކީ 25 ނޮވެމްބަރު 2021ވާ ބުރާސްފަތި ދުވަހުގެ 13:30އެވެ. އަދި ހޭންޑްބޯޅަ މުބާރާތުގައި ބައިވެރިވުމަށް ފޯރމް ހުށަހެޅޭނެ އެންމެފަހު ތާރީޚަކީ 30 ނޮވެމްބަރު 2021ވާ އަންގާރަ ދުވަހުގެ 13:30 ކަމަށްވެސް އެ އިދާރާއިން ހާމަކުރެއެވެ.
