ރައްޔިތުން ބޭނުންވާގޮތަށް، ފިއްލަދޫގެ އިޚްތިޞާޞްގެ ތެރެއަށް ދައްޕަރު އަލުން ލުމަށް ރައީސް ނިންމަވައިފި

ހއ. ފިއްލަދޫ ކައުންސިލްގެ އިޚްތިޞާޞްގެ ތެރޭގައި ދައްޕަރު އަލުން ހިމެނުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމަވައިފިއެވެ.

އެކަމާގުޅިގެން ރައީސް އޮފީހުގެ ތަރުޖަމާނު މުޙައްމަދު މަބްރޫކް ޢަޒީޒު "ރާއްޖެ އެމްވީ"އަށް މައުލޫމާތު ދެއްވަމުން ވިދާޅުވީ, އެކަމާގުޅޭގޮތުން އިކޮނޮމިކް ކައުންސިލްގެ ބައްދަލުވުމެއް ހޯމަ ދުވަހު ބޭއްވުނުކަމަށެވެ. އަދި އެކަމުގައި ފިއްލަދޫ ކައުންސިލާ ބައްދަލުކޮށް މަޝްވަރާތައް ކުރެވި އިކޮނޮމިކް ކައުންސިލްގެ ބައްދަލުވުމުގައި އެކަމާއި ގުޅިގެން މަޝްވަރާތައް ކުރެވުނުކަމަށެވެ. އަދި މިސަރުކާރުން އަތޮޅުތައް ތަރައްގީކުރަން ބޭނުންވަނީ ރައްޔިތުން ބޭނުންވާގޮތަށްކަމަށެވެ. ކުރިންވެސް ސަރުކާރުން ބޭނުންވީ އެސަރަހައްދުގައި ހިންގޭ އިޤްތިޞާދީ ހަރަކާތްތަކަކީ ފިއްލަދޫ ކައުންސިލާ ގުޅިގެން ހިންގޭ ހަރަކާތްތަކެއްގެ ގޮތުގައި ކުރިޔަށް ގެންދިޔުމަށް ކަމަށެވެ.

ހއ. ފިއްލަދޫއާ އެއް ފަޅެއްގެ ތެރޭގައި އޮންނަ ދައްޕަރު، އެ ރަށުގެ އިޚްތިޞާޞްގެ ތެރޭގައި އަލުން ހިމެނުމަށް ގޮވާލައި، 467 މީހުންގެ ސޮއިއާއެކު ރައްޔިތުންގެ މަޖިލީހަށް ވަނީ ޕެޓިޝަނެއްވެސް ހުށަހަޅާފައެވެ. ފިއްލަދޫއާ އެއް ފަޅެއްގައި އޮންނަ ދައްޕަރަކީ އެރަށުގެ ގިނަ ރައްޔިތުން ޕިކްނިކް ގޮސް އުޅޭ ފަޅު ރަށެކެވެ. ފިއްލަދޫގެ އިޚްތިޞާޞުން ދައްޕަރު ވަކިކޮށްފައި ވަނީ ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން 29 އޮގަސްޓްވީ އާދީއްތަ ދުވަހު ނެރުއްވި ޤަރާރަކުންނެވެ.

ދައްޕަރަކީ ގުދުރަތީ އެތައް ރީތިކަމެއް ލިބިފައިވާ ރަށެކެވެ. މޫދާ ގުޅިފައިވާ ބޮޑު ކުޅިއެއް އެރަށުގައި އޮވެއެވެ. 2010 ވަނަ އަހަރު އެރަށުގައި ރިސޯޓެއް އެޅުމަށް ހަވާލު ކުރިއެވެ. ނަމަވެސް ފަހުން އެތަނުގައި ރިސޯޓް ހެދުމުގެ މަޝްރޫޢު ވަނީ ހުއްޓާލާފައެވެ. އޭގެ ފަހުން 18 މާރޗް 2020ގައި ރައީސް ޞާލިޙު ވަނީ ފިއްލަދޫގެ އިޚްތިޞާޞްގެ ތެރޭގައި ދައްޕަރު ހިމަނާފައެވެ.