ދައުލަތުގެ ކަމާބެހޭ އިދާރާތަކުން މައުލޫމާތު އޮޅުން ފިލުވުމަށްފަހު ދައްޕަރު ޕެޓިޝަން މަސައްކަތް ކުރިއަށް ގެންދިޔުމަށް ކޮމިޓީން ނިންމައިފިއެވެ.

ބުދަ ދުވަހު އޮތް ޕެޓިޝަން ކޮމިޓީގެ ބައްދަލުވުމުގައި އިހަވަންދޫ ދާއިރާގެ މެމްބަރު މުޙައްމަދު ޝިފާއު ވިދާޅުވީ, ދައްޕަރާގުޅޭ ކަންބޮޑުވުންތައް އާންމުން ފާޅުކޮށްފައިވާއިރު އިދާރާތަކުން މައުލޫމާތު ސާފުކޮށްގެން ޕެޓިޝަނައިގެން ކުރިޔަށް ދިޔުމަށް ފެންނަ ކަމަށެވެ. އެގޮތުން ފިއްލަދޫ ކައުންސިލާވެސް ކޮމިޓީގެ ފަރާތުން ބައްދަލުކުރުމަށާއި, އިޤްތިޞާދީ މަޝްރޫއެއްގެ ވާހަކައެއް އޮތުމުން، އިކޮނޮމިކް މިނިސްޓަރ, އަދި ފަތުރުވެރިކަމާ ގުޅުން ހުރި ކަމަކަށް ވާތީ ޓޫރިޒަމް މިނިސްޓަރާއި ބައްދަލު ކުރުމަަށް ހުށަހަޅާ ކަމަށް ޝިފާއު ވިދާޅުވިއެވެ.

ލާމަރުކަޒީ ގާނޫނުގެ މުހިންމު އަސާސެއް މުގުރިގެން ދާކަމަށް މި ޕެޓިޝަންގައި ފާހަގަކޮށްފައިވާތީވެ, އެއީ ކިހިނެތް ހިނގާފައި އޮތް ކަމެއްތޯ ބެލުމަށް ލޯކަލް ގަވަންމެންޓް އޮތޯރިޓީއާ ވެސް ބައްދަލުކުރުމަށް ޝިފާއު ހުށަހެޅުއްވިއެވެ. އެ ހުށަހެޅުމަށް ތާއީދު ކުރެއްވީ ކެލާ ދާއިރާގެ މެމްބަރު އިބްރާހީމް ޝަރީފެވެ.

އިހަވަންދޫ ދާއިރާގެ މެމްބަރު ޝިފާއުގެ މި ހުށަހެޅުމަށްފަހު އިނގުރައިދޫ މެމްބަރު ޙަސަން އަޙުމަދު ވަނީ އިތުރު ހުށަހެޅުމެއް ކޮމިޓީއަށް ހުށަހަޅުއްވާފައެވެ. އެއީއެންމެ ފުރަތަމަ އެ މައްސަލައިގައި ފިއްލަދޫ ކައުންސިލާއި ސަރުކާރާ ދެމެދު އެއްވެސް މަޝްވަރާއެއް ކުރިޔަށް ދޭތޯ ބަލައި, ފިއްލަދޫ ނިސްބަތްވާ ދާއިރާގެ މެމްބަރު ރައީސް އިބްރާހީމް މުޙައްމަދު ޞާލިޙާއެކު ރައްޔިތުންގެ ކަންބޮޑުވުންތައް ހިއްސާކޮށްގެން އެ މައްސަލަ ހައްލުކުރުމަށް މަސައްކަތް ކުރުމަށެވެ. ޙަސަން ވިދާޅުވީ, އެފަދަ މައްސަލައެއް މީގެ ކުރިން ހދ. ހަނިމާދޫގައި ވެސް ދިމާވުމުން ސަރުކާރުން ރައްޔިތުންގެ އެދުމާ އެއްގޮތަށް ކަންކަން ހައްލުކޮށްދިންކަމަަށާއި, އެކަންކަން ހައްލުކުރުމުގައި ހަނިމާދޫ ދާއިރާގެ މެމްބަރު ވެސް ހަރަކާތްތެރިވިކަމަށެވެ.

މެމްބަރު ޙަސަންގެ ހުށަހެޅުމަށް ރައްދުދެއްވައި ކެލާ ދާއިރާގެ މެމްބަރު ވިދާޅުވީ, އެގޮތަށް މަޝްވަރާތަކެއް ކުރޭތޯ ބެލުމަކީ ކޮމިޓީއަށް ޕެޓިޝަން އައުމުގެ ކުރިން ބަލަންޖެހޭނެ ކަމެއް ކަމަށެެވެ. މިހާރު އެކަނކުރަން މާލަސްވެފައިވާ ކަމަށެވެ.

އެ މައްސަލައަށް އިތުރަށް ވާހަކަދައްކަވަމުން ކެލާ ދާއިރާގެ މެމްބަރު ޝަރީފް ވަނީ އެބޭފުޅާ ނިސްބަތްވާ ދާއިރާގެ މައްސަލައެއް ޕެޓިޝަން ކޮމިޓީއަށް އެހެން މެމްބަރެއް މެދުވެރިކޮށް އައުމުން އެކަމާ ހިތްހަމަ ނުޖެހުން ފާޅުކުރައްވާފައެވެ. އަދި އެއީ އާއްމުކޮށް މަޖިލީހުގައި ކަންކުރާ އުސޫލެއް ނޫންކަމަށް ވިދާޅުވިއެވެ.

ފިއްލަދޫގެ އިޚްތިޞާޞުން ދައްޕަރު ވަކިކޮށްފައި ވަނީ ރައީސް ޞާލިޙު އޯގަސްޓް 29 ވަނަ ދުވަހު ނެރުއްވި ގަރާރަކުންނެވެ.