ރާއްޖެޓީވީ ރޯކޮށްލުން: ދަތްދަގަނޑު ހިފައިގެން މީއާދުއާއެކު ބަޔަކު އުޅުނު، ދެން އޮތީ ޙުކުމް ކުރުން!
އިންތިޤާލީ އިންސާފުގެ އޮމްބަޑްސްޕާރސަންގެ އޮފީހަށް ވެސް ވަނީ އެ މައްސަލަ ހުށަހަޅާފައި
ރާއްޖެޓީވީ ރޯކޮށްލި މައްސަލައާ ގުޅިގެން އާދިއްތަ ދުވަހު ކްރިމިނަލް ކޯޓުގައި ކުރިއަށްދިޔަ އަޑުއެހުމުގެ ތެރެއިން
"ރާއްޖެޓީވީ"ގައި ރޯކޮށްލި މައްސަލައިގައި ޓެރަރިޒަމްގެ ދައުވާ އުފުލާފައިވާ ހ. ގަސްވާ މުޙައްމަދު މީޢާދުގެ ބަންދު މުރާޖަޢާކުރުމުގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.
އާދިއްތަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި ވަނީ މައްސަލައިގެ ޚުލާސާ ބަޔާން އިއްވާފައެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.
ދައުލަތުގެ ޚުލާސާ ބަޔާން:
މައްސަލައިގެ ޚުލާސާ ބަޔާން އިއްވަވަމުން ދައުލަތުގެ ވަކީލާ ވިދާޅުވީ، މީއާދު އިތުރު 5 މީހުންނާ ބައިވެރިވެގެން ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލާފައިވާ ކަމަށާއި، ދައުވާ އިއްވުމުން ދައުވާއަށް މީއާދު އިންކާރު ކޮށްފައިވާ ކަމަށެވެ. މައްސަލަ ސާބިތު ކުރުމަށް ޕީޖީ އޮފީހުން ވަނީ ޝަފަހީ ހެކިންނާއި ކިތާބީ ހެކިންގެ ހެކިބަސް ނަގާފައެވެ.
ޚުލާސާ ބަޔާން އިއްވަވަމުން ވަކީލު ވިދާޅުވީ، ރާއްޖެޓީވީ ރޯކޮށްލި މީހުންގެ ތެރޭގައި މީއާދު ހިމެނޭކަން ސިއްރު ހެކިވެރިންގެ ބަހުން އެނގޭ ކަމަށެވެ. އަދި އޭނާ މޫނުގައި މާސްކް އަޅަން ހުރިތަން ފެނުނު ކަމަށާއި، އޭނާ ބީކޭޓީ އިމާރާތަށް ވަދެގެން ދިޔަތަން ފެނުނުކަމަށް ވެސް ސިއްރު ހެކިންގެ ހެކިބަހުން އެނގޭކަމަށް ދައުލަތުގެ ވަކީލާ ވިދާޅުވިއެވެ. އޭގެ އިތުރުން، ރާއްޖެޓީވީ ރޯކޮށްލަން ބޭނުންކުރި ދަތް ދަގަނޑު ހިފައިގެން މީއާދުއާއެކު އިތުރު 5 މީހަކު އުޅުނުކަމަށް ވެސް ދައުލަތުގެ ވަކީލާ ވިދާޅުވިއެވެ.
ބަރުދަނުގައި 690ގުރާމް، ދިގުމިނުގައި 15.5އިންޗި، ވަށަމިނުގައި 2އިންޗި ހުރި އެއްކޮޅު ލަންބާފައިވާ މި ދަގަނޑު ގަނޑަކީ ރާއްޖެޓީވީ އިމާރާތުގެ ދަގަނޑުގޭޓުގެ ތަޅު ހަލާކު ކޮށްލައި، އެއަށްފަހު ލަކުޑި ގޭޓު ފުނޑާލައިގެން އެތެރެއަށް ވަނުމަށް ބޭނުންކުރި ހަތިޔާރެވެ. ރާއްޖެޓީވީގެ ސްޓޭޝަން ރޯކޮށް އަންދާލުމަށްފަހު އެކަންކުރި މީހުން އެތަނުން ނިކުމެގެން ދިޔައިރު އެމީހުން ހަތިޔާރުގެ ގޮތުގައި ބޭނުންކުރި މި ދަތްދަގަނޑު އޮތީ އެތަނުގެ އެތެރޭގައެވެ.
ވަކީލާ ވިދާޅުވީ، މީއާދު ޑޮކްޓަރަށް ދައްކާފައިވާ ބޭސް ސިޓީން އޭނާގެ ގައިގެ އެކި ތަންތަން ފިހިފައިވާކަން އެނގޭ ކަމަށާއި، ރާއްޖެޓީވީ ރޯކޮށްލުމަށްފަހު އެތަނުގެ ސެކިއުރިޓީ ގާޑަށް ވެސް އޭނާ ޙަމަލާ ދީފައިވާ ކަމަށެވެ. އަދި މީއާދު ފުލުހުންގެ ބެލުމުގެ ދަށަށް ގެނައުމަށްފަހު ނަގާފައިވާ ފޮޓޯތަކުން އެކަންކަމަށް އިތުރަށް ބާރު ލިބިދޭ ހެކިތައް ފެނިފައިވާކަން ދައުލަތުން ފާހަގަކުރިއެވެ.
އޭގެ އިތުރުން، ހާދިސާ ހިނގި ދުވަހު ހުރީ ދަތުރު ގޮސްފައިކަމަށް ދިފާއީ ހެކިން ބުނި ނަމަވެސް، އެ ހެކިންގެ ހެކިބަސްތަކުގައި ބޮޑެތި ފުށުއެރުންތަކެއް ހުރިކަން ދައުލަތުގެ ވަކީލު ފާހަގަކުރެއްވިއެވެ. ވަކީލު ވިދާޅުވީ، ދަތުރު ދިޔަ ރަށުގެ ނަން ވެސް ހަނދާން ނެތްކަމަށް ދިފާއީ ހެކިން ބުނި ކަމަށެވެ. އަދި ދައުލަތުން ހުށަހަޅާފައިވާ ހެކި ޤަރީނާ ނަފީ ކުރެވޭ ވަރުގެ ހެއްކެއް ދިފާއުން ހުށައަޅާފައިނުވާކަން ވެސް ވަކީލު ފާހަގަކުރެއްވިއެވެ.
ދައުލަތުން ވަނީ މި މައްސަލަ އެކަށީގެންވާ ޝައްކެއް ނެތި ސާބިތުވާކަމަށް ކަނޑައަޅައިދެއްވުމަށް އެދިވަޑައިގަންނަވާފައެވެ.
ދިފާއުގެ ޚުލާސާ ބަޔާން:
މި މައްސަލައިގެ ދައުވާލިބޭ މީއާދުގެ ފަރާތުން ޚުލާސާ ގޮތެއްގައި އޭނާގެ ވަކީލު ވަނީ ތަހުގީގު މަރުޙަލާގެ ތެރެއިން މީއާދަށް ލިބެންޖެހޭ ޙައްޤުތައް ކަށަވަރު ކޮށްދީފައިވާކަން ސާފުވާން ނެތްކަމަށް ބުނެފައެވެ. އަދި ތުހުމަތު ކުރެވޭ މީހަކަށް ޤާނޫނު އަސާސީން ލިބެންޖެހޭ ޙައްޤުތައް ލިއްބައިދީފައި ނުވާކަމަށް ވަކީލު ވިދާޅުވިއެވެ.
އޭގެ އިތުރުން، އެކަމުގެ ތުހުމަތު ކުރެވޭ މީހުން ގެންގުޅުން ސައިކަލުތަކުގެ އަދަދާއި، އެމީހުން ސައިކަލު ޕާކު ކުރި ތަނާ ގުޅިގެން ހެކިބަސްތަކުގައި ފުށުއެރުންތަކެއް ހުރިކަމަށް ދިފާއީ ވަކީލު ވިދާޅުވިއެވެ. ވަކީލު ވަނީ ބައެއް ހެކިންނާ ގުޅޭގޮތުން އަދިވެސް އިތުރަށް ވާހަކަ ދައްކަން ބޭނުންވާކަމަށް ވިދާޅުވެފައެވެ. އެގޮތުން އަންގިއެއްގެ ވާހަކަ ފުލުހުންގެ ފަރާތުން ހެކިބަސް ދިން ހެކިވެރިން ފާހަގަކުރިއިރު، އެއީ ކޮން ކުލައެއްގެ އަންގިއެއްކަން ވެސް ބަޔާންކޮށް ނުދެވޭކަމަށް ވަކީލު ވިދާޅުވިއެވެ. އަދި އެ އަންގިއަކީ ތަނުގެ ތެރެއިން ނަގާފައިވާ އަންގިއެއްކަން ވެސް އެނގެން ނެތް ކަމަށާއި، އަންގި އެނަލިސިސް ކުރި ފަރާތުން މި މައްސަަައިގައި ތުހުމަތު ކުރެވޭ މީހުންގެ ފޮޓޯތަކުން އެ އަންގި ފެނޭތޯ ބެލުމާއި، ޑީއެންއޭ ފެނޭތޯ ބެލުމަށް ބޭނުން ކޮށްފައިވާއިރު، މިކަމުގައި ޗެއިން އޮފް ކަސްޓަޑީ ނެތިގެން ގޮސްފައިވާ ކަމަށެވެ.
ދިފާއުން ވަނީ މީއާދުގެ މައްޗަށް ކޮށްފައިވާ ދައުވާ ސާބިތުވާ މިންވަރަށް ހެކި ހުށައަޅާފައި ނެތްކަމަށް ބުނެފައެވެ.
ޝަރީއަތުގެ ނިންމުން:
މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ އާދަމް ވަނީ މައްސަލައިގެ ޙުކުމަކަށްދާއިރު، ދެފަރާތުން ފާހަގަކުރި ކަންކަމަށް ރިއާޔަތް ކުރައްވާނެކަމަށް ވިދާޅުވެފައެވެ. ގާޒީ ވިދާޅުވީ ދެން މި މައްސަލައިގައި އޮންނާނީ ޙުކުމް ކުރެއްވުމަށް ބާއްވަވާ އަޑުއެހުމެއް ކަމަށެވެ.
ރާއްޖެޓީވީ ހިންގަމުން ގެންދިޔަ އިމާރާތުގައި ރޯކޮށްލުމުގެ ޖަރީމާ ހިންގާފައިވަނީ 2013 ވަނަ އަހަރުގެ އޮކްޓޯބަރު 7 ވަނަ ދުވަހުގެ ރޭ މެންދަމުގެ ވަގުތެއްގައެވެ. ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލައި ހުރިހާ އިކުއިޕްމެންޓެއް އަންދައި އަޅިއަށް ހަދާލާފައިވަނީ، ރާއްޖެޓީވީއަށް ހަމަލާދޭން އުޅޭކަމުގެ މައުލޫމާތު ލިބި، އެކަން ފުލުހުންގެ ސަމާލުކަމަށް ގެނެސްފައިވަނިކޮށެވެ. އެގޮތުން މި ޖަރީމާގެ ސަބަބުން 11.65 މިލިއަން ރުފިޔާގެ ގެއްލުން ރާއްޖެޓީވީއަށް ލިބިފައިވެއެވެ.
