ރާއްޖެއިން ކޮވިޑު ބަލީގައި އިތުރު މީހަކު ނިޔާވެއްޖެއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނީ، ނިޔާވެފައިވަނީ ގދ. ކޮވިޑް މެނޭޖްމަންޓް ފެސިލިޓީގައި އެޑްމިޓް ކޮށްގެން ފަރުވާ ދެމުން ގެންދިޔަ އުމުރުން 90 އަހަރުގެ ދިވެއްސެއް ކަމަށެވެ. އޭނާ ނިޔާވެފައިވަނީ ހޮނިހިރު ދުވަހުގެ ހަވީރު 6:30ގައި ކަމަށް އެޗްޕީއޭއިން މައުލޫމާތު ދެއެވެ.

މި މަރާއެކު ރާއްޖެއިން މިހާތަނަށް ކޮވިޑް ބަލީގައި މަރުވި މީހުންގެ ޖުމުލަ އަދަދު މިވަނީ 226ށް އަރާފައެވެ.

ހޯމަ ދުވަހުގެ މެންދުރު 2:30ހާއިރު އުމުރުން 49 އަހަރުގެ ދިވެހި އަންހެނެއްވެސް ނިޔާވެފައިވެއެވެ. އޭނާ ނިޔާވީ ހުޅުމާލޭ މެޑިކަލް ފެސިލިޓީގައި ފަރުވާ ދެމުން ދަނިކޮށް ކަމަށް އެޗްޕީއޭ އިން ބުންޏެވެ.

ކޮވިޑްގެ ހަތަރު ވަނަ ރާޅަށް ފަހު ރާއްޖޭގައި މިހާރު ކޮވިޑްގެ ހާލަތު އަންނަނީ ރަނގަޅުވަމުންނެވެ. މިއާއެކު ކޮވިޑު ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ވަނީ ލުއި ދީފައެވެ. ނަމަވެސް ވައިރަހުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުވުމަށް އެޗްޕީއޭއިން ވަނީ އިލްތިމާސްކޮށްފައެވެ.