މޮނިޓަރިންގައި 17 ރަށެއް، އެންމެ ގިނަ ދުވަސްވީ ރ. ދުވާފަރު

ކޮވިޑް-19ގެ ކޭސްތައް ފެނިގެން 17 ރަށެއް މިވަގުތު މޮނިޓަރިންއަށް ލާފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާންމުކޮށްފައިވާ މައުލޫމާތުގައި ވާގޮތުން މިވަގުތު މޮނިޓަރިންގައި އޮތީ ރ. ދުވާފަރު، ކ. ކާށިދޫ، ށ. ފީވައް، ދ. ކުޑަހުވަދޫ، އއ. ހިމަންދޫ، އދ. ހަންޏާމީދޫ، ހއ. އިހަވަންދޫ، ގއ. ކަނޑުހުޅުދޫ، މ. މަޑުއްވަރި، ކ. ގާފަރު، ޏ. ފުވައްމުލައް، ގދ. ގައްދޫ، ގދ. މަޑަވެލި، ތ. ވޭމަންޑޫ، ލ. މުންޑޫ، ށ. މިލަންދޫ އަދި އދ. މަހިބަދޫ އެވެ.

މޮނިޓަރިންއަށް ލާފައިވާ ރަށްރަށުގެ ތެރެއިން މޮނިޓަރިންގައި އޮންނަތާ އެންމެ ގިނަ ދުވަސްވީ ރ. ދުވާފަރު ކަމަށް އެޗްޕީއޭއިން ބުނެފައިވެއެވެ. ދުވާފަރު މޮނިޓަރިންގެ ހާލަތަށް ގެނެސްފައިވަނީ މެއި މަހު 25 ވަނަ ދުވަހުއެވެ.

އެޗްޕިއޭއިން ބުނީ ޖުލައި މަހު ތިން ރަށެއް މޮނިޓަރިން އަށް ލާފައިވާކަމަށެވެ. އޮގަސްޓް މަހު 13 ރަށެއް މޮނިޓަރިންއަށް ލާފައިވާކަމަށް ބުނެފައިވެއެވެ.

މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތް ކުރުމަށެވެ. މޮނިޓަރިންގެ ހާލަތުގައި އޮންނަ ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދެއެވެ. އަދި އެރަށެއްގެ ހާލަތު ރަނގަޅުވާ މިންވަރަށް ބަލައި، ރަށްތައް މޮނިޓަރިންއިން ނަގަމުންދެއެވެ.

ރާއްޖެއިން ފެންނަ ކޮވިޑް-19ގެ ކޭސްތަކުގެ އަދަދު މިހާރު ދަށްވި ނަމަވެސް މިދިޔަ މެއި މަހުގެ ތެރޭގައި ކޮވިޑް-19ގެ ހާލަތު ގޯސްވެ 73 ރަށެއް މޮނިޓަރިންގެ ހާލަތަށް ގެނެސްފައިވެއެވެ. އެދުވަސްވަރު މާލޭގެ އިތުރުން އަތޮޅުތެރޭގައި ކޮވިޑް-19ގެ ހާލަތު ގޯސްވާތީ ބަލި ކޮންޓްރޯލް ކުރުމަށް ގިނަ ފިޔަވަޅުތަކެއް އެޅިއެވެ. އެގޮތުން މޮނިޓަރިންއަށް ލައި، ގިނަ ރަށްރަށުގައި ކާފިއު ހިންގިއެވެ.

ރާއްޖޭގައި ކޮވިޑްގެ ހާލަތު ރަނގަޅުވެ، ޚާއްސަކޮށް މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއެކު، އަޅާފައިވާ ގިނަ ފިޔަވަޅުތަކަށް މިހާރު ވަނީ ލުއި ދީފައެވެ. މިގޮތުން ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް އަތޮޅުތެރެއަށް ދަތުރުކުރެވޭ ގޮތަށް މިހާރު ވަނީ ހުޅުވާލާފައެވެ. އެހެންނަމަވެސް، މޮނިޓަރިންގެ ހާލަތުގައި އޮންނަ ރަށްރަށަށް ދަތުރުކުރާނަމަ އެރަށަކަށް ގޮސް ކަރަންޓީންގެ މުއްދަތު ފުރިހަމަ ކުރަންޖެހޭނެ ކަމަށް އެޗްޕީއޭއިން ބުނެފައިވެއެވެ.