ބަންގްލަދޭޝްގެ ގައުމީ އެއާލައިން ކަމަށްވާ ބީމާންގެ ފްލައިޓެއްގެ ޕައިލެޓަށް ހާޓް އެޓޭކެއް ޖެހި، އެމަރޖެންސީކޮށް އިންޑިޔާގެ ނާގްޕޫރަށް ޖައްސައިފިއެވެ.
ކެޕްޓަން ނައުޝާދަށް ހާޓް އެޓޭކެއް ޖެހުނީ 126 ފަސިންޖަރުންނާއެކު އޮމާނުގެ މަސްކަތުން ބަންގްލަދޭޝްގެ ޑާކާއަށް ދަތުރުކުރަމުންދަނިކޮށެވެ.
އިންޑިއާގެ ނޫހެއް ކަމަށްވާ ހިންދުސްތާން ޓައިމްސްގައި ރިޕޯޓުކޮށްފައި ވާގޮތުން މި ހާދިސާ ދިމާވުމުން އެކަން ކޮލްކަތާ އެއަރ ޓްރެފިކް ކޮންޓްރޯލަށް ވަނީ އަންގާފައެވެ. އަދި މެޑިކަލް އެމަރޖެންސީއެއްގެ ގޮތުގައި އިންޑިއާގެ ނާގްޕޫރް އެއާޕޯޓަށް ޖެއްސުމަށް ކޮލްކަތާ އެއަރ ޓްރެފިކް ކޮންޓްރޯލުން އަންގާފައިވާ ކަމަށް ރިޕޯޓުކޮށްފައިވެއެވެ.
މި ހާދިސާ ހިނގި އިރު ބޯޓު ދަތުރުކުރަމުންދިޔައީ އިންޑިއާގެ ސްޓޭޓެއް ކަމަށްވާ ޗެޓިސްގަރުގެ މަތިން ކަމަށް ހިންދުސްތާން ޓައިމްސްގައި ވެއެވެ. ހުކުރު ދުވަހުގެ ހެނދުނު 11:37 އެހާއިރު ނާގްޕޫރް އިންޓަރނޭޝަނަލް އެއާޕޯޓަށް ބޯޓު ޖައްސާފައިވާކަމަށާއި، އެއަށްފަހު ޕައިލެޓް ހޮސްޕިޓަލަށް ގެންގޮސްފައިވާ ކަމަށް ވެއެވެ.
ރިޕޯޓުތައް ބުނާގޮތުން މި ބޯޓު ޖައްސާފައިވަނީ ރައްކާތެރިކަމާއެކުއެވެ. އަދި ބޯޓުގައި ތިބި ފަސިންޖަރުންގެ ހާލުވެސް ރަނގަޅެވެ. ޕައިލެޓުގެ ހާލުވެސް މިހާރު ރަނގަޅު ކަމަށް ރިޕޯޓުތައް ބުނެއެވެ.
ނާގްޕޫރް އެއާޕޯޓުގެ ޑައިރެކްޓަރާ ހަވާލާދީ ހިންދުސްތާން ޓައިމްސްގައި ވާގޮތުން އެހެން ފްލައިޓެއް ގެންގޮސްގެން ބީމާންގެ ފްލައިޓުގައި ތިބި މީހުން މިހާރު ވަނީ ޑާކާއަށް ގެންގޮސްފައެވެ.
