ޖުލައި މަހުގެ ފަހުން އިނގިރޭސިވިލާތުގައި އެންމެ ގިނަ މީހުންނަށް ކޮވިޑް ޖެހިފައިވަނީ ފާއިތުވި ހަތް ދުވަހު

ހަލުވިކަމާއެކު ޑެލްޓާ ވޭރިއަންޓް ފެތުރެމުންދާއިރު އިނގިރޭސިވިލާތުގައި ޖުލައި މަހުގެ ފަހުން ދުވާލެއްގެ މައްޗަށް ފެންނަ ކޮވިޑް ކޭހުގެ އަދަދު ފާއިތުވި ހަތް ދުވަހު އިތުރުވެފައިވާކަމަށް އެގައުމުގެ ސަރުކާރުން ހާމަކޮށްފިއެވެ.

ހުކުރު ދުވަހު އެގައުމުގައި 38،046 މީހުންނަށް ކޮވިޑް ޖެހިފައިވާއިރު ބުރާސްފަތި ދުވަހު ކޮވިޑް ޖެހިފައިވަނީ 38،281 މީހުންނަށެވެ. ފާއިތުވި ހަތް ދުވަހު ކޮވިޑް ޖެހުނު މީހުންގެ އަދަދު 239،237ށް އަރައެވެ. މިއީ ޖުލައި މަހުގެ ފަހުކޮޅުން ފެށިގެން ހަފުތާއެއްހާ ތެރޭގައި މިހާ ގިނަ އަދަދެއްގެ މީހުންނަށް ކޮވިޑް ޖެހިގެން ރިޕޯޓްކުރާ ފުރަތަމަ ފަހަރެވެ.

ފާއިތުވި ހަފުތާގައި ކޮވިޑް ޖެހުނު މީހުންގެ އަދަދު އޭގެކުރީ ހަފުތާ އާ އަޅާބަލާއިރު ވަނީ 9.1 އިންސައްތަ އިތުރުވެފައެވެ. ބަލި ޖެހިގެން މަރުވި މީހުންގެ އަދަދުވެސް ވަނީ ހަމަ އެމިންވަރަށް މަތިވެފައެވެ.

ބްރިޓެން އޮފިސް ފޮރ ނޭޝަނަލް ސްޓެޓިސްޓިކްސް އިން އަންދާޒާކޮށްފައިވާ ގޮތުގައި ފާއިތުވި ހަފުތާގައި އިނގިރޭސިވިލާތުގައި ކޮންމެ 70 މީހަކުން އެކަކަށް ވަނީ ކޮވިޑް ޖެހިފައެވެ. އޭގެކުރީ ހަފުތާގައި އެއަދަދު ހުރީ ކޮންމެ 80 މީހަކުން އެކަކެވެ.

މީގެކުރިން އައި ސަރޖުތަކުގައި މީހުން މަރުވެފައިވާ ނިސްބަތަށް ބަލާއިރު މިފަހަރު މަރުވާ މީހުންގެ އަދަދު ވަނީ މަދުވެފައެވެ. އޭގެ ސަބަބަކީ ގިނަ އަދަދެއްގެ ބަޔަކަށް ވެކްސިން ދީފައިވުމެވެ. އުމުރުން 16 އަހަރުން މަތީގެ 78 އިންސައްތަ މީހުންނަށް ވަނީ ވެކްސިން ދީފައެވެ.

އެގައުމުގައި ކޮވިޑް ޖެހިގެން މަރުވި މީހުންގެ އަދަދު މިހާރު ހުރީ 132،243ގައެވެ. ޖުލައި 19ގެ ފަހުން އިނގިރޭސިވިލާތުގައި ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ހުރިހާ ފިޔަވަޅުތަކެއްހެން ވަނީ އުވާލައި ލުއިތައް ދީފައެވެ.