ރާއްޖެ އިން ކޮވިޑް-19ށް ޕޮޒިޓިވްވި މީހުންގެ ޖުމްލަ އަދަދު 80،500ން މައްޗަށް އަރައިފިއެވެ.

ހެލްތު ޕްރޮޓެކްޝަން އެޖެންސީން އެންމެ ފަހުން އާންމުކޮށްފައިވާ މައުލޫމާތުތައް ދައްކާގޮތުން ހުކުރު ދުުވަހު 103 ޕޮޒިޓިވް ކޭސް ވަނީ ރިޕޯޓުކޮށްފައެވެ. މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 80،539ށް އަރާފައެވެ.

ހުކުރު ދުވަހު ރިޕޯޓުކޮށްފައިވާ ކޭސްތަކުގެ ތެރެއިން މާލެ ސަރަހައްދުން ރިޕޯޓުކޮށްފައި ވަނީ 20 ކޭހެވެ. އަދި އަތޮޅުތެރޭގެ އެކި ރަށްރަށުން 68 ކޭސް ރިޕޯޓުކޮށްފައިވާއިރު ރިސޯޓުތަކުން 15 ކޭހެއް ވަނީ ރިޕޯޓުކޮށްފައެވެ.

އެޗްޕީއޭ އިން ބުނީ ބުރާސްފަތި ދުވަހުގެ އިރުއޮއްސި 06:00ން ހުކުރު ދުވަހުގެ އިރުއޮއްސި 06:00ށް 4721 ސާމްޕަލް ޓެސްޓުކޮށްފައިވާ ކަމަށެވެ.

މިވަގުތު ރާއްޖޭގައި 1،607 މީހުން ކޮވިޑަށް ފަރުވާހޯދަމުންދާއިރު، ބަލި ޖެހުނު މީހުންގެ ތެރެއިން 78،694 މީހުން ވަނީ ބަލިން ރަނގަޅުވެފައެވެ. އަދި 225 މީހުން ވަނީ ބައްޔަށް ފަރުވާހޯދަމުން ދަނިކޮށް ނިޔާވެފައެވެ. ހޮސްޕިޓަލްގައި އެޑްމިޓްކޮށްގެން ފަރުވާދެމުން ދަނީ 11 މީހުންނަށެވެ.

ކޮވިޑްގެ ހަތަރު ވަނަ ރާޅަށް ފަހު ރާއްޖޭގައި މިހާރު ކޮވިޑްގެ ހާލަތު އަންނަނީ ރަނގަޅުވަމުންނެވެ. މިއާއެކު ކޮވިޑު ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ވަނީ ލުއި ދީފައެވެ. ނަމަވެސް ވައިރަހުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުވުވުމަށް އެޗްޕީއޭއިން ވަނީ އިލްތިމާސްކޮށްފައެވެ.