މާލޭ ވިޔަފާރި ބަނދަރުން ޚިދުމަތް ހޯދާ ހުރިހާ ފަރާތްތަކަށް ލުއި ފަސޭހަކޮށްދިނުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފޯރުކޮށް ދެމުންދާ ބައެއް ޚިދުމަތްތަކަށް ބަދަލު ގެނެސްފިއެވެ.

އެމްޕީއެލުން ބުނީ ޚިދުމަތް ހޯދާ ހުރިހާ ފަރާތްތަކަށް ދެމުންދާ ޚިދުމަތްތައް ދުވަހުން ދުވަހަށް ހަރުދަނާކުރުމުގެ ގޮތުން ގިނަ މަސައްކަތްތައް ކުރާ ކަމަށެވެ. އެގޮތުން އެމްޕީއެލް އިން ފޯރުކޮށް ދެމުންދާ ޚިދުމަތްތަކަށް ބަދަލު ގެންނަމުންދާ ކަމަށް އެމްޕީއެލުން ބުނެއެވެ.

އެމްޕީއެލުން ބުނީ ކޮންޓެއިނަރ ކްލިއަރކުރުމަށް ރިކުއެސްޓް ކުރުން ކުރިން ހަމަޖެހިފައިވާ 03 ދުވަސް ކުރިއަށް ނޯޓްކުރާ ނޯޓްކުރުން މިހާރު އެއްކޮށް ހުޅުވާލެވިފައިވާ ކަމަށެވެ. އަދި ހަމަ މިއާއެކު ކެންސަލޭޝަން ޓައިމް ކުރިން އޮތް 24 ގަޑިއިރު މިހާރު 48 ގަޑިއިރަށް ބަދަލުކުރެވިފައިވާ ކަމަށް އެމްޕީއެލުން ބުނެއެވެ.

އެމްޕީއެލުން ބުނީ މިކަމުގެ ސަބަބުން ކަސްޓަމަރުންނަށް ކޮންޓެއިނަރ ރިކުއެސްޓް ކުރުމުގައި ފަސޭހަތަކެއް ލިބި އަދި ބޭނުންވާ ދުވަހަކަށް ނޯޓްކުރުމުގެ ފުރުސަތު ލިބިގެންދާނެ ކަމަށެވެ.

އެމްޕީއެލްއިން ފޯރުކޮށް ދެމުންދާ ބައެއް ޚިދުމަތްތަކަށް ބަދަލު ގެންނަމުންދާއިރު، ރައްޔިތުންނަށް ލުއި ފަސޭހަވާނެ ގޮތަށް އަދި ވިޔަފާރިވެރިންނަށް ދަތިނުވާނެ ފަދަ ގޮތަކަށް ކަންކަން އިންތިޒާރު ކުރުމުގެ މަސައްކަތްތައް ދަނީ ކުރަމުންނެވެ. އަދި ވިޔަފާރި ބަނދަރުގައި މަސައްކަތް ކުރާ މީހުންގެ ސަލާމަތާއި ރައްކާތެރިކަމަށް ޚާއްސަ އިސްކަމެއް ދީގެން މިހާރު މަސައްކަތް ކުރަމުން އަންނަ ކަމަށް އެމްޕީއެލުން ބުނެއެވެ.