ކާބުލް އެއަރޕޯޓުގެ ބޭރުގައި ގޮވުންތަކެއް ގޮވާ މަދުވެގެން 13 މީހުން މަރުވެއްޖެ

އަފްޣާނިސްތާނުން ފައިބަން ބޭނުންވާ މީހުން ބޭލުމުގެ މަސައްކަތް ކާބުލް އެއަރޕޯޓުގައި ހިނގަމުންދަނިކޮށް ކާބުލް އެއަރޕޯޓު ބޭރުގައި ބާރުގަދަ ގޮވުންތަކެއް ގޮވާ 13 މީހުން މަރުވެއްޖެއެވެ.

އަލްޖަޒީރާއިން ރިޕޯޓްކޮށްފައިވާ ގޮތުގައި ޕެންޓަގަން އިން ވަނީ ގޮވުންތަކެއް ގޮވިކަން ކަށަވަރުކޮށްދީފައެވެ. އެގޮތުން ދެ ގޮވުމެއް ގޮވާފައިވާކަމަށް ޕެންޓަގަންއިން ވަނީ ބުނެފައެވެ. މީގެތެރެއިން އެއް ގޮއްވުމަކީ ޖާނުން ފިދާއުވުމުގެ ހަމަލާއަކަށް ވެދާނެކަމަށްވެސް ވަނީ ބުނެފައެވެ. މިގޮވުމުގެ ސަބަބުން އެމެރިކާ ސިފައިންގެ މަދުވެގެން ތިން މީހުންނަށް އެކިވަރުގެ އަނިޔާތައް ލިބިފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.

މިގޮވުންތަކުގައި އަނިޔާވި މީހުންނަށް ފަރުވާ ދިނުމަށް ހޮސްޕިޓަލްތަކަށް ދަނީ ގެންދަމުންނެވެ. ހޮސްޕިޓަލްތަކާއި ހަވާލާދީ މީޑިޔާ ރިޕޯޓްތައް ބުނާގޮތުން މިގޮވުންތަކުގެ ސަބަބުން ޒަޚަމްވެގެން މަދުވެގެން 60 މީހުން ހޮސްޕިޓަލްތަކަށް ވަނީ ގެނެސްފައެވެ.

ތާލިބާނުންގެ ބާރުގެ ދަށަށް އަފްޣާނިސްތާނު އައުމަށްފަހު ފާއިތުވެގެންދިޔަ ދުވަސްތަކުގައި އެމެރިކާ އާ އެމެރިކާ އާ ގުޅިފައިވާ ގައުމުތަކުން އަންނަނީ އަފްޣާނިސްތާނުން މީހުން ބޭލުމުގެ މަސައްކަތްކުރަމުންނެވެ. އޭގެތެރޭގައި އެގައުމުތަކުގެ ރައްޔިތުންގެ އިތުރުން އަފްޣާނިސްތާން ދޫކޮށްދާން ބޭނުންވާ އަފްޣާނިސްތާނުގެ ރައްޔިތުންވެސް ހިމެނެއެވެ.

އެމަސައްކަތް ކުރިޔަށްދާއިރު ތާލިބާނުން ހަމަލާތަކެއް ދީފާނެކަމުގެ އިންޒާރު ހުޅަނގުގެ ގައުމުތަކުން އައީ ދެމުންނެވެ. މިހާތަނަށް އައިއިރު 88،000ށް ވުރެ ގިނަ މީހުން އަފްޣާނިސްތާނުން ބޭލިފައިވާކަމަށް އެމެރިކާއިން ވަނީ ބުނެފައެވެ. ކޮންމެ 39 މިނެޓަކުން އެމެރިކާގެ އަސްކަރީ މަތިންދާ ބޯޓެއް ގެންދަނީ ކާބުލް އެއަރޕޯޓުން ފުރަމުންނެވެ.

ކާބުލް އެއަރޕޯޓު ވަށައިގެންވާ ސަރަހައްދުތަކުގެ ސެކިޔުރިޓީ ކަންކަން ބަލަހައްޓަމުން ގެންދަނީ ތާލިބާންގެ ހަނގުރާމަވެރިންނެވެ. ކާބުލްގައި ހުރި އަލްޖަޒީރާގެ ރިޕޯޓަރާއި ހަވާލާދީ އަލްޖަޒީރާއިން ރިޕޯޓްކިށްފައިވާ ގޮތުގައި އެމެރިކާ ޕާސްޕޯޓު ގެންގުޅޭ 1500 މީހުން ކާބުލްގައި އަދި ނުފޭބި އެބަތިބިކަމަށެވެ.

އެމެރިކާ އާއި ތާލިބާނުންނާ ދެމެދު މީހުން ބޭލުމުގައި ވަނީ އެއްބަސްވުމެއް ހަދާފައެވެ. މިއެއްބަސްވުމުގެ ދަށުން ތާލިބާނުން ބުނެފައިވަނީ ޕާސްޕޯޓު ނުވަތަ ގްރީން ކާޑު ނުވަތަ އެނޫންވެސް ވެރިފައިޑް ޑޮކިޔުމެންޓެއް ނެތް މީހުންނަށް ގައުމުދޫކޮށް ނުދެވޭނެކަން ކަށަވަރުކުރާނެ ކަމަށެވެ. ނަމަވެސް ވެރިފައިޑް ޑޮކިޔުމަންޓަކީ ކޮބައިތޯ ބެލުމުގައި އޮޅުންތަކެއް އަރާފައިވާ ކަމަށް އަލްޖަޒީރާ ރިޕޯޓަރ ވަނީ ބުނެފައެވެ.

މީގެއިތުރުން ކަންދަހާރުގެ އެއަރޕޯޓު ވަނީ އަލުން ހުޅުވާލާފައިކަމަށްވެސް އަލްޖަޒީރާގައި ވަނީ ރިޕޯޓްކޮށްފައެވެ. އެހެންކަމުން ކާބުލް އެއަރޕޯޓް ބަންދުކުރިނަމަވެސް ބައިނަލްއަގްވާމީ ފްލައިޓްތައް އުދުހުމުގެ ފުރުސަތު މިއާއެކު ފަހިވެގެންގޮސްފައިވާކަމަށް ވަނީ ރިޕޯޓްކޮށްފައެވެ.