ބެންގަލޫރު އަތުންވެސް މާޒިޔާއަށް ނާކާމިޔާބު

އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގައި ކުޅުނު ފަހު މެޗުން އިންޑިއާގެ ބެންގަލޫރު އެފްސީން ފަސޭހަކަމާއެކު ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށްފިއެވެ.

އަންގާރަ ދުވަހުގެރޭ ގައުމީ ފުޓްބޯޅަ ދަނޑުގައި ކުޅުނު މެޗުން ބެންގަލޫރު މޮޅުވީ 6-2 ގެ ނަތީޖާއަކުންނެވެ.

މި މެޗުން މާޒިޔާ ބަލިވިއިރު، މުބާރާތުގައި ކުޅުނު ތިން މެޗުންވެސް އެ ޓީމު ވަނީ ބަލިވެފައެވެ. އެގޮތުން ގްރޫޕް ސްޓޭޖުގައި މާޒިޔާއިން ކުޅުނު ފުރަތަމަ މެޗުން ބަންގްލަދޭޝްގެ ޗެމްޕިއަން ބަޝުންދަރާ ކިންގްސް އަތުން 2-0 ގެ ނަތީޖާއަކުން ބަލިވިއިރު، ދެވަނަ މެޗުން އިންޑިއާގެ އޭޓީކޭ މޯހަން ބަގާން އަތުން ބަލިވީ 3-1 ގެ ނަތީޖާއަކުންނެވެ.

އަންގާރަ ދުވަހުގެރޭ ކުޅުނު މެޗުގެ ވަރަށް ކުރީކޮޅު ބެންގަލޫރުން ވަނީ ލަނޑު ޖަހައި ލީޑު ނަގާފައެވެ. މެޗު ފަށައިގެން ހަވަނަ މިނެޓުގައި ގޯލުއި ސަރްތާކް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އުދަންތާ ސިންގް ކުމާރެވެ. މި ލަނޑާއެކު މާޒިޔާއިން އެ ޓީމުގެ ކުޅުން ރަނގަޅުކުރިއިރު، މެޗުގެ 10 ވަނަ މިނެޓުގައި މާޒިޔާގެ ހަމްޒާ މުޙައްމަދު (ހަމްޕު) ވަނީ އޭރިއާ ބޭރުން ނުރައްކާތެރި ހަމަލާއެއް ފޮނުވާލާފައެވެ. އެކަމަކު އެ ހަމަލާ ދިޔައީ ގޯލާ އަމާޒުނުވެއެވެ. އަދި އޭގެ ތިން މިނެޓު ފަހުން ބެންގަލޫރު ދެ ކުޅުންތެރިން ކައިރިން ނައްޓާލުމަށްފަހު މާޒިޔާގެ ފޯވާޑް ކޮނޭލިއަސް ސްޓެވާޓް (ކޯނޭ) ފޮނުވާލި ހަމަލާ ބެންގަލޫރުގެ ގޯލްކީޕަރު ގުރްޕްރީތު ސިންގް ސަންދޫރު ވަނީ ހުށިޔާރުކަމާއެކު ދިފާއުކޮށްފައެވެ.

އެކަމަކު މެޗުގެ 20 ވަނަ މިނެޓުގައި ބެންގަލޫރުން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މާޒިޔާގެ ގޯލްކީޕަރު ހުސައިން ޝަރީފަށް ހެދުނު ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ ކްލެއިޓަން އޮގަސްޓޯއެވެ. އަދި މެޗުގައި ބެންގަލޫރުން ކާމިޔާބުކުރި ތިންވަނަ ލަނޑު މެޗުގެ 36 ވަނަ މިނެޓުގައި ކާމިޔާބުކޮށްދިނީ ލިއޯން އޮގަސްޓައިންއެވެ.

މެޗުގެ ދެވަނަ ހާފުގައި މާޒިޔާއިން އެ ޓީމުގެ ކުޅުން ރަނގަޅުކޮށް މެޗުގެ ކޮންޓްރޯލް ނެގިއިރު، މި ހާފުގައި މާޒިޔާގެ ހަމްޕު އާއި ސްޓެވާޓަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ. މި މެޗުގައި މާޒިޔާއިން ކާމިޔާބުކުރި ފުރަތަމަ ލަނޑު މެޗުގެ 68 ވަނަ މިނެޓުގައި އެ ޓީމަށް ކާމިޔާބު ކޮށްދިނީ ހަމްޕުއެވެ. އެކަމަކު އޭގެ މިނެޓެއް ފަހުން ބެންގަލޫރުން ވަނީ އިތުރު ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެންއެރި ސިވާ ސަކްތި ނާރާޔަންއެވެ.

ނަމަވެސް މެޗުގެ 82 ވަނަ މިނެޓުގައި މާޒިޔާއިން ވަނީ އިތުރު ލަނޑެއް ޖަހައި ފަރަގުކުޑަކޮށްފައެވެ. ހަމްޕުގެ އެހީތެރިކަމާއެކު މި ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އިތުބާރު ފޯވާޑް އަސަދުﷲ އަބްދުﷲ އެވެ. އެކަމަކު އޭގެ މިނެޓެއް ފަހުން ބިދްޔަޝާގަރު ސިންގް ބެންގަލޫރަށް ލީޑު ފުޅާކޮށްދިންއިރު، މެޗުގެ އިތުރު ވަގުތުގައި އޭނާ ވަނީ އެ ޓީމުގެ ހަވަނަ ލަނޑުވެސް ކާމިޔާބުކޮށްދީފައެވެ.

މި ނަތީޖާއާއެކު މާޒިޔާއިން މި ފަހަރުގެ އޭއެފްސީ ކަޕް ނިންމާލީ ގްރޫޕުގެ ފުލުގައި އޮވެގެންނެވެ. އެގޮތުން ކުޅުނު ތިން މެޗުންވެސް އެ ޓީމަށް ޕޮއިންޓެއް ލިބިފައެއް ނުވެއެވެ. އަދި ތިންވަނައިގައި އޮތް ބެންގަލޫރަށް ތިން މެޗުން ހަތަރު ޕޮއިންޓް ލިބުނުއިރު، މި ގްރޫޕުން އަނެއް ބުރަށް ދަތުރު ކޮށްފައިވަނީ އެއްވަނަ ހޯދި އިންޑިއާގެ އޭޓީކޭ މޯހާން ބަގާންއެވެ. އެ ޓީމަށް ހަތް ޕޮއިންޓް ލިބުނުއިރު، ދެވަނައަށް ދިޔައީ ފަސް ޕޮއިންޓް ހޯދި ބަޝުންދަރާއެވެ.