ކޮވިޑް ޖެހިގެން މަރުވި މީހުންގެ އަދަދު 225ށް
ނިޔާވީ އުމުރުން 49 އަހަރުގެ ދިވެހި އަންހެނެއް
ހުޅުމާލެ މެޑިކަލް ފެސިލިޓީ
ކޮވިޑު ޖެހިގެން އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)ން ބުނީ ހޯމަ ދުވަހުގެ މެންދުރު 02:30 ހާއިރު އުމުރުން 49 އަހަރުގެ ދިވެހި އަންހެނެއް ނިޔާވެފައިވާ ކަމަށެވެ. އޭނާ ނިޔާވީ ހުޅުމާލޭ މެޑިކަލް ފެސިލިޓީގައި ފަރުވާ ދެމުން ދަނިކޮށް ކަމަށް އެޗްޕީއޭ އިން ބުންޏެވެ.
ހޯމަ ދުވަހު ހެނދުނުގެ ވަގުތެއްގައި ވެސް 92 އަހަރުގެ އަންހެނެއް ނިޔާވެފައިވާ އިރު އާދިއްތަ ދުވަހު ވެސް 75 އަހަރުގެ އަންހެނެއް ނިޔާވެފައިވާ ކަމަށް އެޗްޕީއޭ އިން ބުނެއެވެ. އެޗްޕީއޭ އިން ބުނީ މިއީ ރާއްޖޭގައި ކޮވިޑް ޖެހިގެން ނިޔާވި 225 ވަނަ މީހާ ކަމަށެވެ.
ރާއްޖެއިން ކޮވިޑަށް ޕޮޒިޓިވްވީ މީހުންގެ މިހާރު އަދަދު ވަނީ 80،067ށް އަރާފައެވެ. މީގެތެރެއިން 78،189 މީހުން ބަލިން ފަސޭހަވެފައިވާއިރު މިވަގުތު ކޮވިޑަށް ފަރުވާ ހޯދަމުން އަންނަނީ 1641 މީހުންނެވެ. މީގެތެރެއިން 16 މީހުންނަށް ފަރުވާދެމުން އަންނަނީ ހޮސްޕިޓަލްތަކުގައި އެޑްމިޓްކޮށްގެންނެވެ.
ކޮވިޑްގެ ހަތަރު ވަނަ ރާޅަށް ފަހު ރާއްޖޭގައި މިހާރު ކޮވިޑްގެ ހާލަތު އަންނަނީ ރަނގަޅުވަމުންނެވެ. މިއާއެކު ކޮވިޑު ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ވަނީ ލުއި ދީފައެވެ. ނަމަވެސް ވައިރަހުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުވުމަށް އެޗްޕީއޭއިން ވަނީ އިލްތިމާސްކޮށްފައެވެ.
