ސަރުކާރު ހިއްސާވާ 30 ކުންފުނި އޮތް އިރު، ލިސްޓްކޮށްފައި އޮތީ 10 ކުންފުނި ކަމަށް ކެޕިޓަލް މާރކެޓް ޑިވެލޮޕްމެންޓް އޮތޯރިޓީގެ ސީއީއޯ މުހައްމަދު ހުސައިން މަނިކު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން މަނިކު ވިދާޅުވީ، ހިއްސާގެ ވިޔަފާރި ކުރާތާ ދުވަސްތަކެއް ވެފައިވީނަމަވެސް އެކަމުގައި މާބޮޑު ކުރިއެރުންތަކެއް ލިބިފައި ނެތް ކަމަށެވެ. މިކަމުގައި ސީދާ ސަރުކާރުން އިސްނަގަންޖެހޭ ކަންކަން އެބަހުރި ކަން ފާހަގަކުރައްވަމުން މަނިކު ވިދާޅުވީ، ސަރުކާރު ހިއްސާވާ 30 ކުންފުނި އޮތް އިރު، ލިސްޓްކޮށްފައި އޮތީ 10 ކުންފުނި ކަމަށެވެ. ބައެއް ކުންފުނި ތަކަކީ، ސަރުކާރުގެ ހިއްސާ ހިފަހައްޓާފައި ހުރި ކުންފުނިތައް ކަމަށާއި، އޭގެ ބައެއް ހިއްސާ މާރކެޓަށް ނެރެން މަސައްކަތް ކުރަން ޖެހޭ ކަމަށެވެ.
ސަރުކާރުން އެހާ ބޮޑު ހިއްސާއެއް ނުހިފަހައްޓާ ކެޕިޓަލް މާރކެޓަށް އޭގެ ބައެއް ވިއްކާލާން ޖެހޭ ކަމަށް ވިދާޅުވިއެވެ. ރައްޔިތުންނަށް ހަމަހަމަކަން ގެނެސްދެވޭނީ، ކެޕިޓަލް މާރކެޓަށް ފުރުސަތު ދީގެން ކަމަށާއި، ސަސްޓެއިނަބަލް ޑިވެލޮޕްމެންޓް ގޯލްތައް ވެސް ހާސިލް ކުރެވޭނީ، އެ ފުރުސަތު ދީގެން ކަމަށް ވިދާޅުވިއެވެ.
ލިސްޓެޑް ކުންފުންޏަކަށް ވުމުން ދެފުށް ފެންނަ ގޮތަކަށް ކަންކަން ހިނގާނެ ކަމަށާއި، ހިއްސާދާރުންގެ ކަނބޮޑުވުންތައް ފައުޅުކުރުމުގެ ފުރުސަތު ފަހިވެ، ހައްގު ހޯދޭނެ ކަމަށް ވިދާޅުވިއެވެ. ހިއްސާގެ ބާޒާރުގައި މެދުފަންތީގެ ކުންފުނިތަކަށް ވެސް ފުރުސަތު އޮންނާނެ ކަމަށާއި، ކުންފުނިތަކުން ހިއްސާގެ ބާޒާރަށް އަހުލުވެރި ނުވުމުގެ ސަބަބުން ގޮންޖެހުންތައް އެބަހުރި ކަމަށް ވިދާޅުވިއެވެ.
މަނިކު ވިދާޅުވީ، އުންމީދަކީ، ދެއަހަރެއްހާ ދުވަހުގެ ތެރޭގައި، ހިއްސާގެ ބާޒާރަށް ބޮޑު ބަދަލެއް ލިބެގެން ދިޔުން ކަމަށާއި، އެކަމަށް މަސައްކަތްތަކެއް ކުރަމުން އަންނަ ކަމަށެވެ. ޒަމާނީ ޓެކްނޮލޮޖީތަކާއެކު އެކަމަށް މަސައްކަތް ފަށައިގަތުމަށް ތައްޔާރުވަމުން އަންނަ ކަމަށް ވިދާޅުވިއެވެ.
މި ޕްރޮގްރާމްގައި ވާހަކަދައްކަވަމުން ކެޕިޓަލް މާރކެޓް ޑިވެލޮޕްމެންޓް އޮތޮރިޓީގެ ޑެޕިއުޓީ މެނޭޖަރ އަނިލް އާދަމް ވިދާޅުވީ، ރާއްޖޭގެ އުމްރާނީ ތަރައްގީއާއި، އެހެނިހެން ކަންކަމަށް ޚަރަދުކުރުމުގައި ހިއްސާގެ ބާޒާރު އިތުރަށް ތަރައްގީކުރުމުން އާއްމު ރައްޔިތުންނަށް ވެސް އޭގެ ފައިދާ ކުރާނެ ކަމަށެވެ.
ފޮރިން އިންވެސްޓަރުންނަށް ރާއްޖޭގެ ހިއްސާގެ ބާޒާރަށް ވަންނަން ދޮރުތަކެއް ހުޅުވެންޖެހޭ ކަމަށާއި، ހިއްސާގެ ބާޒާރަކީ އިޖްތިމާއީ މައްސަލަތަކަށް އޮތް ހައްލެއް ކަމަށް ވެސް އަނިލް ވިދާޅުވިއެވެ.
