ފަތުރުވެރިން ގިނަ އިރު އެއާޕޯޓުގައި ނުބައިތިއްބަން އަންގައިފި
ކޮންމެ ދުވަހެއްގެ ހަވީރު އެއާޕޯޓުގެ ތޮއްޖެހުން އިތުރުވޭ
ފުރަން ގޮސް އެއާޕޯޓުގައި ތިބި ބައެއް
އެއާޕޯޓުގެ ތޮއްޖެހުން ކުޑަކުރަން ރިސޯޓުތަކަށާއި، ގެސްޓްހައުސްތަކަށް ގެންދާ މީހުން ވީހާވެސް އަވަހަކަށް ގެންދިއުމަށް އަންގައިފިއެވެ.
މި ފަހަކަށް އައިސް އެއާޕޯޓުގައި ތޮއްޖެހުން އިތުރުވާތީ މިކަމުގެ ގިނަ ކަންބޮޑުވުންތަކެއް އާންމު ރައްޔިތުން ގެންދަނީ ފާޅުކުރަމުންނެވެ. މިކަން މިހެން އޮތްއިރު، މިކަމާ ގުޅިގެން ރާއްޖެއެމްވީއާ ވާހަކަދެއްކި އެއާޕޯޓު ސްޓާފަކު ބުނީ މި ފަހަކަށް އައިސް އެއާޕޯޓުގައި ތޮއްޖެހުން އިތުރުވެފައިވަނީ އެރއާޕޯޓަށް އަންނަ މީހުންނާއި ފުރަން އަންނަ މީހުން ގިނަ އިރުތަކެއް ވަންދެން އެއާޕޯޓުގައި ތިބެންޖެހުމުގެ ސަބަބުން ކަމަށެވެ.
ފުރަން ދާ މީހުން ފަސް ހަ ގަޑިއިރު ކުރިން އެއާޕޯޓަށް ގެންގޮސްފައި ބައިތިއްބާ ކަމަށާއި، ރިސޯޓުތަކުންނާއި، ގެސްޓްހައުސްތަކުން އެގޮތަށް އެކަން ކުރަނީ ގިނަ ދަތުރުތަކެއް ނުކޮށް އެއްފަހަރާ ގިނަ ބަޔަކު ގޮވައިގެން ދަތުރު ކުރުމަށް ކަމަށް އޭނާ ބުންޏެވެ.
މިކަން މިގޮތަށް ވާތީ އާންމު ގޮތެއްގައި ކޮންމެ ދުވަހަކު ވެސް ހަވީރު ގަޑީގައި އެއާޕޯޓު ބާރުބޮޑު ވާކަމަށް އޭނާ ވަނީ ބުނެފައެވެ. އޭނާ ބުނީ މިގޮތަށް މީހުން ގެންދާއިރު 3 ފްލައިޓުގައި ދަތުރުކުރާ މީހުން އެއްފަހަރާ އެއާޕޯޓަށް ގެންގޮސްފައި ބައިތިއްބާ ކަމަށާއި، މިގޮތަށް ގެންދާއިރު ޝެޑިއުލްއަށް ނުބަލާކަން އޭނާ ފާހަގަކުރިއެވެ.
އޭނާ ބުނީ މިގޮތަށް މިކަން ވިޔަ ނުދިނުމަށް ރިސޯޓުތަކާއި، ގެސްޓްހައުސްތަކުގެ އިތުރުން ފަތުރުވެރިން އެއާޕޯޓަށް ގެންދާ މީހުންނަށް ޝެޑިއުލްތަކާ އެއްގޮތަށް އަމަލުކުރުމަށް އަންގާފައިވާކަމަށެވެ. އަދި ރާއްޖެއިން އަންނަ މީހުން ވެސް ރިސޯޓުތަކާއި ގެސްޓްހައުސްތަކަށް ގެންދާއިރު، ވީހާވެސް އަވަހަކަށް އެމީހުން ގެންދިއުމަށް ސަމާލުކަން ދިނުމަށް އަންގާފައިވާކަމަށް އޭނާ ބުނެފައިވެއެވެ.
ރާއްޖެ އަންނަ ފަތުރުވެރިން އިތުރުވަމުންދާވަރަކަށް އެއާޕޯޓުގައި ބާރުބޮޑުވުން ވެސް މިހާރު މި ވަނީ އިތުރުވެފައެވެ. އަދި އެއާޕޯޓުގެ ފްލައިޓް މޫވްމެންޓް ވެސް އިތުރުވެފައިވާތީ އެއް ވަގުތެއްގައި ޗެކްއިން ވާން އެއާޕޯޓަށް ދާ މީހުންގެ އަދަދު ވެސް އިތުރުވެ، އެއާޕޯޓު އިތުރަށް ތޮއްޖެހިގެންދެއެވެ.
