ޝިދާތާ، އަދާލަތު ޕާޓީއާ ދުރަށް
22 އޯގަސްޓު 2021 | އާދީއްތަ 12:17ހިތް ނުތަނަވަސްކަމެއް ހިނގާފައިވާނަމަ މައާފަށް އެދިވަޑައިގެންފައިވޭ
ނޫސްވެރިންގެ ބައްދަލުވުމުގައި ކުރީގެ ޖެންޑާ މިނިސްޓަރު ޝިދާތާ ޝަރީފު ވާހަކަދައްކަވަނީ
ކުރީގެ ޖެންޑާ މިނިސްޓަރު ޝިދާތާ ޝަރީފު އަދި އަދާލަތު ޕާޓީގެ ޚާރިޖީ ގުޅުންތަކާ ބެހޭ ކޮމެޓީގެ ރައީސް އެޕާޓީން ވަކިވެވަޑައިގެންފިއެވެ.
ރާއްޖެއެމްވީއަށް ޝިދާތާ ވިދާޅުވީ އިސްތިއުފާގެ ސިޓީ އަދާލަތު ޕާޓީގެ މަޝްވަރާ މަޖިލީހަށް އާދިއްތަ ދުވަހު ހުށަހަޅާފައިވާ ކަމަށެވެ. ނަމަވެސް މިކަމުގެ ތަފްސީލު ހާމައެއްނުކުރައްވައެވެ. ވިދާޅުވީ ހޯމަ ދުވަހުގެ ވަގުތެއްގައި ފާޓީން ވަކިވެވަޑައިގެންނެވި ސަބަބާއި ގުޅޭގޮތުން ބަޔާނެއް އާއްމުކުރައްވާނެ ކަމަށެވެ.
ފާއިތުވެދިޔަ ދިގު މުއްދަތުގައި އަދާލަތުން ފަހިކޮށް ދެއްވި ފުރުސަތުތަކަށް ޝިދާތާ ވަނީ ޝުކުރު އަދާކުރައްވާފައެވެ. އަދި ހިތް ނުތަނަވަސްކަމެއް ހިނގާފައިވާނަމަ މައާފަށް ވެސް އެދިވަޑައިގެންފައިވެއެވެ.
އަދަލާތު ޕާޓީއަށް 16 އަހަރު ވެފައިވާއިރު، ޝިދާތާއަކީ އެޕާޓީން ފެށުނީއްސުރެ އެކި މަގާމުތައް ފުރުއްވާފައިވާ ބޭފުޅެކެވެ. އެގޮތުން އަދާލަތު ޕާޓީގެ އައު އެކްޝަން ޕްލޭނެއް އެކުލަވާލަން ނިންމައި އެކަމަށް ނެގި ޚާއްސަ ކޮމެޓީގައި ވެސް ޝިދާތާ ހިމެނިވަޑައިގަންނަވައެވެ.
ޝިދާތާ އަދާލަތު ޕާޓީން ވަކިވެވަޑައިގެންނެވި ސަބަބާއި ގުޅޭގޮތުން އަދާލަތު ޕާޓީން ބުނީ އެއްވެސް ސަބަބެއް ހާމަކޮށްފައިނުވާ ކަމަށެވެ.
މިއަހަރު ފެބްރުއަރީ މަހުގެ 06 ވަނަ ދުވަހު ޖެންޑާ މިނިސްޓަރު ކަމުގެ މަގާމުން ޝިދާތާ އިސްތިއުފާ ދެއްވީ ކުޑަކުދިންނަށް ޖިންސީ ގޯނާ ކުރުމާއި ޖިންސީ އަނިޔާ ކުރުމުގެ މައްސަލަތައް އިންތިހާއަށް އިތުރުވެ، އަދި ޖެންޑަރ މިނިސްޓްރީގެ އިހުމާލުގެ ގިނަ މައްސަލަތަކެއް ފެންމަތިވެ، ޝިދާތާއަށް ގިނަ ބަޔެއްގެ ފާޑުކިއުން އަމާޒުވެފައި ވަނިކޮށެވެ. އަދި މަގާމުން އިސްތިއުފާ ދެއްވީ އެ ކަމަނާގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅުމަށް އެމްޑީޕީ ޕާލިމެންޓްރީ ގުރޫޕުން ނިންމައިފައިވަނިކޮށެވެ.
