ފީއައްޔާއި ކުރިނބީގެ ކަރަންޓު ކެޕޭސިޓީ އިތުރުކުރަނީ

ދ. ކުރިންބާއި ފ. ފީއަލީގައި ކަރަންޓުގެ ކެޕޭސިޓީ އިތުރުކުރުމުގެ މަސައްކަތް ކުރަމުންދާކަމަށް ފެނަކަ ކޯޕަރޭޝަނުން ހާމަކޮށްފިއެވެ.

މި މަސައްކަތުގެ ދަށުން އެ ދެރަށަށް މިހާރު އައު ޖެނަރޭޓަރު ގެންގޮސްފައި ވާކަމަށް ފެނަކައިން ބުނެއެވެ. ފެނަކައިން ބުނީ އެ ދެރަށުގައި މިހާރު ހުރި ޖެނަރޭޓަރުން ޚިދުމަތް ފޯރުކޮށްދެވޭ ވަރަށް ވުރެ ކަރަންޓަށް އޮތް ޑިމާންޑު ބޮޑުވެފައި ވަތީ، ދޭތެރެއަކުން ކަރަންޓު ކެނޑޭ ކަމަށެވެ. އަދި އައު ޖެނަރޭޓަރު ގެންދިއުމުން، ކުރިނބީގެ 450 މީހުންގެ އާބާދީއަށް މެދުނުކެނޑި ޚިދުމަތް ލިބޭނެ ކަމަށް މައުލޫމާތު ދެއެވެ. ފެނަކައިން ބުނީ އެ ރަށަށް ގެންގޮސްފައި ވަނީ 250 ކިލޯވޯޓުގެ ޖެނަރޭޓަރެއް ކަމަށެވެ. އެ ޖެނަރޭޓަރު ބެހެއްޓުމުގެ މަސައްކަތް ނިމުނުހާ އަވަހަކަށް ޚިދުމަތް ފޯރުކޮށްދެވޭނެ ކަމަށް ބުނެއެވެ.

މީގެ އިތުރުން ފެނަކައިން ވަނީ ފ. ފީއައްޔަށްވެސް އާ ޖެނަރޭޓަރެއް ގެންގޮސްފައެވެ. ފީއައްޔަށް ގެންގޮސްފައި ވަނީ 400 ކިލޯވޯޓުގެ ޖެނަރޭޓަރެކެވެ. މިހާރު ހުރި ކަރަންޓު ކޭބަލްތައް ބަދަލުކުރުމަށްޓަކައި އައު ކޭބަލްވެސް ގެންގޮސްފައި ވެއެވެ. ފެނަކައިން ބުނީ އެ ޖެނަރޭޓަރު ބެހެއްޓުމުން އެ ރަށުގެ 800 މީހުންގެ އަބާދީއަށް އެއްވެސް ދަތިކަމެއް ނެތި ކަރަންޓުގެ ޚިދުމަތް ފޯރުކޮށްދެވޭނެ ކަމަށެވެ.