އިންޑިޔާގެ ކުޑަކުދިންގެ މެދުގައި ޖޯންސަން އެންޑް ޖޯންސަން ވެކްސިންގެ އަޖުމަބެލުންތައް ކުރިއަށްދަނީ
21 އޯގަސްޓު 2021 | ހޮނިހިރު 01:27ޖޯންސަން އެންޑް ޖޯންސަން އަކީ ކޮވިޑަށް އުފައްދާފައިވާ ވެކްސިންތަކުގެ ތެރެއިން އެއް ޑޯޒް ޖަހަންޖެހޭ ގޮތަށް އުފައްދާފައިވާ ހަމައެކަނި ވެކްސިން
ޖޯންސަން އެންޑް ޖޯންސަން ކޮވިޑް ވެކްސިން
އިންޑިޔާގެ އުމުރުން 12 އަހަރާއި 17 އަހަރާ ދެމެދުގެ ކުޑަކުދިންގެ މެދުގައި ޖޯންސަން އެންޑް ޖޯންސަން ވެކްސިންގެ ޓްރައަލްތައް ކުރިޔަށް ގެންދިޔުމުގެ ހުއްދަ އިންޑިޔާގެ ޑްރަގް ރެގިޔުލޭޓަރ އިން ދީފައިވާކަމަށް އެކުންފުނިން ބުނެފިއެވެ.
ޖޯންސަން އެންޑް ޖޯންސަން އަކީ ކޮވިޑަށް އުފައްދާފައިވާ ވެކްސިންތަކުގެ ތެރެއިން އެއް ޑޯޒް ޖަހަންޖެހޭ ގޮތަށް އުފައްދާފައިވާ ހަމައެކަނި ވެކްސިނެވެ.
ޖޯންސަން އެންޑް ޖޯންސަނުން އިންޑިޔާގައި ޓްރައަލްތައް ކުރިޔަށް ގެންދިޔުމާއި ގުޅޭގޮތުން ބުނެފައިވަނީ ހަރޑް އިމިޔުނިޓީ ހޯދުމަށް ކުޑަކުދިންނަށް ވެކްސިނުން ކުރާ އަސަރު ދެނެގަނެ ކުޑަކުދިންނަށް ވެކްސިން ދިނުމަކީ މުހިންމު ކަމެއްކަމަށެވެ. އިންޑިޔާގައި ޖޯންސަން އެންޑް ޖޯންސަން ވެކްސިން ބޭނުންކުރުމުގެ ހުއްދަ ދީފައިވަނީ މިމަހުގެ ކުރީކޮޅުއެވެ. މިއާއެކު އިންޑިޔާގައި ވަނީ ފަސް ވެކްސިނެއް ޖެހުމުގެ ހުއްދަ މިހާރު ދީފައެވެ.
އިންޑިޔާއިން ޖޯންސަން އެންޑް ޖޯންސަން ވެކްސިން ބޭނުންކުރުމުގެ ހުއްދަ ދީފައިވީނަމަވެސް އަދި އެވެކްސިން އާއްމުކޮށް އެގައުމަށް ގެންގޮސްފައެއްނުވެއެވެ. އެކުންފުނިން ބުނެފައިވަނީ ވެކްސިން އިންޑިޔާއަށް ގެންދެވޭނެ ތާރީޚެއް ބުނަން އަދި މާއަވަސް ކަމަށެވެ.
