ހިޔާގެ 5ވަނަ ޓަވަރާއި 6ވަނަ ޓަވަރަށް މާދަމާ ކަރަންޓު ގުޅައިދެނީ!
20 އޯގަސްޓު 2021 | ހުކުރު 14:29ޓަވަރުތަކަށް ކަރަންޓު ދިނުމުގެ މަސައްކަތް ކޮންމެ ދުވަހަކުވެސް ހެނދުނު 9ން ހަވީރު 5ށް ކުރިޔަށްދާނެ
ހިޔާ ފްލެޓްތަކަށް ކަރަންޓް ގުޅުމުގެ މަސައްކަތުގެ ތެރެއިން
ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ ހިޔާ ފްލެޓްތަކަށް ކަރަންޓު ދިނުމުގެ މަސައްކަތުގެ ދަށުން މާދަމާ 5ވަނަ އަދި 6ވަނަ ޓަވަރަށް ކަރަންޓު ގުޅައިދޭނެކަމަށް ސްޓެލްކޯއިން ހާމަކޮށްފިއެވެ.
ސްޓެލްކޯއިން ކޮންމެ ދުވަހަކު ހިޔާ ފުލެޓްތަކުގެ ދެ ޓަވަރަކަށް ކަރަންޓު ދެއެެވެ. ސްޓެލްކޯއިން ބުނީ ތާވަލްކޮށްފައި ވަނީ ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ 6,720 ފްލެޓް ހިމެނޭ ޓަވަރުތަކުގެ ތެރެއިން ދުވާލަކު ދެ ޓަވަރަށް ކަރަންޓު ދޭން ކަމަށާއި, މިގޮތުން މިހާރު ވަނީ 7، 8، 11 އަދި 12ވަނަ ޓަވަރަށް ކަރަންޓު ދީފައި ކަމަށެވެ.
ސްޓެލްކޯއިން އޮގަސްޓް 19ވަނަ ދުވަހު މަސައްކަތްކުރީ 3ވަނަ އަދި 4ވަނަ ޓަވަރަށް ކަރަންޓު ދޭށެވެ. ނަމަވެސް އެ ދެ ޓަވަރުގެ ލިފްޓަށް ދިމާވި މައްސަލައަކާ ގުޅިގެން މި މަސައްކަތްކުރެވޭ ގޮތް ވަނީ ނުވެފައެވެ. އެ ދެ ޓަވަރުގެ މަސައްކަތް އަލުން ކުރެވޭނެ ދުވަހެއް އަދި ހާމަކޮށްފައެއް ނުވެއެވެ.
ސްޓެލްކޯއިން ބުނީ 5ވަނަ އަދި 6ވަނަ ޓަވަރުން ފްލެޓް ލިބިފައިވާ ފަރާތްތައް ހާޒިރުވާންޖެހޭ ގަޑި އެސް.އެމް.އެސް މެދުވެރިކޮށް އަންގާނެ ކަމަށާއި, ތަޅުދަނޑިއާއި, ސްޓެލްކޯއިން ދޫކޮށްފައިވާ ސްލިޕާއެކު ޓަވަރުތަކަށް ގަޑިއަށް ހާޒިރުވުމަކީ ވަރަށް ބޮޑު އިލްތިމާސެއް ކަމަށެވެ. އަދި ޓަވަރުތަކަށް ކަރަންޓު ދިނުމުގެ މަސައްކަތް ކޮންމެ ދުވަހަކުވެސް ހެނދުނު 9ން ހަވީރު 5ށް ކުރިޔަށްދާނެ ކަމަށެވެ.
