ކުޑަކުދިންގެ ހިޔާގެ ކުދިންނަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ރޯދަ ވީއްލުމެއް ދެއްވައިފިއެވެ.
ރައީސް އޮފީހުން ބުނީ މި ރޯދަވީއްލުން ބާއްވާފައި ވަނީ ވަނީ އާދިއްތަ ދުވަހު ހަވީރު މުލީއާގޭގައި ކަމަށެވެ. އަދި މި ރޯދަވީއްލުމަކީ ރައީސުލްޖުމްހޫރިއްޔާގެ އަނބިކަނބަލުންގެ އިސް ނެންގެވުމުގެ މަތިން ބޭއްވި ރޯދަ ވީއްލުމެއް ކަމަށް ރައީސް އޮފީހުން މައުލޫމާތުދެއެވެ.
ދައުލަތުގެ ބެލުމުގެ ދަށަށް ނެގޭ ކުދިންނަށް ހިޔާވަހިކަން ފޯރުކޮށްދިނުމުގެ ގޮތުން އެންމެ ފުރަތަމަ މަރުކަޒެއްގެ ގޮތުގައި ވިލިގިލީގައި "ކުޑަކުދިންގެ ހިޔާ" ޤާއިމްކުރެވުނީ 2006 ވަނަ އަހަރުގެ މެއި މަހުއެވެ. އަދި ދައުލަތުގެ ބެލުމުގެ ދަށަށް ނެގޭ ކުދިންގެ އަދަދު އިތުރުވުމުގެ ސަބަބުން އިތުރު މަރުކަޒެއްގެ ގޮތުގައި "އަމާން ހިޔާ" ކުޑަކުދިންގެ ހިޔާގެ އިމާރާތާ ޖެހިގެން ވަނީ ޤާއިމްކުރެވިފައެވެ.
މި ދެ މަރުކަޒުގެ އިތުރުން 13 އަހަރުން ދަށުގެ ކުދިންނަށް ޙާއްސަކޮށް ތިން ވަނަ މަރުކަޒެއްގެ ގޮތުގައި ހުޅުމާލޭގައި "ފިޔަވަތި" ނަމުގައި ވަނީ 2016 ވަނަ އަހަރުގެ ފެބްރުއަރީ މަހުގައި ސެންޓަރެއް ޤާއިމްކުރެވިފައެވެ. ކުޑަކުދިންގެ ހިޔާ އަދި އަމާން ހިޔާގައި ދިރިއުޅެނީ 13 އަހަރާއި 18 އަހަރާ ދެމެދުގެ ކުދިންނެވެ.
