މެލޭޝިޔާގެ ބޮޑުވަޒީރުގެ މަގާމަށް އިސްމާއީލް ސަބްރީ ބިން ޔައުގޫބް އައްޔަންކޮށްފިއެވެ.
ރިޕޯޓްތައް ބުނާ ގޮތުން ސަބްރީ މިހާރު ދަނީ އޭނާގެ ސަރުކާރު އެކުލަވާލުމުގެ މަސައްކަތް ކުރަމުންނެވެ. މެލޭޝިޔާގެ ރަސްގެފާނު އަބްދުﷲ ރިއާޔަތުއްދީން އާ ސަރުކާރެއް އެކުލަވާލުމުގެ މަސައްކަތް ސަބްރީއާ ހަވާލުކުރެއްވީ އޭނާ ބޮޑުވަޒީރުކަމަށް އައްޔަންކުރުމަށް މެލޭޝިޔާގެ ޕާލަމެންޓުގައި ނެގި ވޯޓުގެ އަގުލަބިއްޔަތުން ރުހުން ލިބުމާ ގުޅިގެންނެވެ.
ބޮޑުވަޒީރުގެ މަގާމަށް ސަބްރީ އައްޔަން ކުރެއްވުމާއެކު އެގައުމުގައި އަނެއްކާވެސް އުފެދޭނީ ޔުނައިޓެޑް މެލޭސް ނޭޝަނަލް އޮގަައިޒޭޝަން (ޔޫއެމްއެންއޯ)ގެ ވެރިކަމެކެވެ. ބޮޑުވަޒީރުގެ މަގާމަށް ސަބްރީ އައްޔަންކުރުމަށް މުހްޔިއްދީންގެ ޕާޓީން ވެސް ވަނީ ތާއީދުކޮށްފައެވެ.
61 އަހަރުގެ ސަބްރީ މީގެކުރިން ހުންނެވީ މެލޭޝިޔާގެ ބޮޑުވަޒީރުގެ މަގާމުން އިސްތިއުފާދެއްވި މުހްޔިއްދީން ޔާސީންގެ ނައިބުގެ މަގާމުގައެވެ. ބޮޑުވަޒީރުކަމަށް ވަޑައިގެންނެވިތާ 18 ވަނަ މަހު މުހިއްޔިއްދީން އިސްތިއުފާ ދެއްވީ ގާނޫނުހަދާ މަޖިލީހުގެ ތާއީދު ގެއްލުމުންނެވެ. އޭނާ ވެރިކަމުގައި ހޭދަކުރެއްވި ކުރު މުއްދަތުގައި ގިނަ ފާޑުކިޔުންތަކެއް އަމާޒުވެފައިވާއިރު، އެންމެ ބޮޑަށް ފާޑުކިޔާފައި ވަނީ ކޮވިޑާ ގުޅިގެން އަޅާ ފިޔަވަޅުތަކާ ގުޅޭ ގޮތުންނެވެ.
ކޮވިޑާ ގުޅިގެން އިންތިޚާބެއް ނުބޭއްވޭނެ ކަމަށް ރަސްގެފާނު ސުލްތާން އަބްދުﷲ ސުލްތާން އަހުމަދު ޝާހު ވަނީ ނިންމަވާފައެވެ.
