ފޭކު ބުކިންގ ހުއްޓުވުމަށް އިތުރު ފިޔަވަޅުތަކެއް އަޅަން ފަށާފައިވާކަމަށް އިމިގްރޭޝަން ކޮންޓްރޯލަރ މުހައްމަދު އަހުމަދު ހުސެއިން (ހަނަފީ) ވިދާޅުވެއްޖެއެވެ.
ހަނަފީ ވީދާޅުވީ، މިކަން ހުއްޓުވުމަށް އިމިގްރޭޝަންގެ ސިސްޓަމްތަކަށް ބަދަލު ގެންނަން ނިންމާފައިވާ ކަމަށާއި، މިކަމުގައި ފުލުހުންނާ ގުޅިގެން މަސައްކަތް ކުރަމުން އަންނަ ކަމަށެވެ. މިހާރުވެސް ބޯޑަރ ކޮންޓްރޯލުން ވަރަށް ބޮޑަށް ފިލްޓަރ ކުރަމުން އަންނަކަން ފާހަގަކުރައްވަމުން ހަނަފީ ވިދާޅުވީ، އަލަށް ތަންފީޒުކުރާ ކަންކަމާއެކީ މިކަމުގައި ހައްލެއް ފެނިގެންދާނެ ކަަމަށެވެ.
މިކަމުގައި މަދު ބަޔަކު ޝާމިލްވި ނަމަވެސް، މިއީ މުޅި އިންޑަސްޓްރީއަށް ލިބޭ ހުތުރު ނަމެއްގެ ކަމަށް ވިދާޅުވިއެވެ. އެހެންކަމުން މަދުން ނަމަވެސް މިކަން ކުރަމުން އަންނަ މީހުން ހޯދައި، ގާނޫނުގެ ކުރިމައްޗަށް ގެނައުމުގެ މަސައްކަތްތައް ވަރަށް ބާރަށް ކުރިއަށްދާކަަމަށް ވިދާޅުވިއެވެ. އެއީ ކޮންމެ ގައުމެއްގެ ބައެއް ކަމަށްވިޔަސް އެމީހުން ރާއްޖެއަށް އަންނަނީ، ފަތުރުވެރިންގެ ގޮތުގައި ކަމަށް ހަނަފީ ވިދާޅުވިއެވެ. ރައީސް ޞާލިޙް ވެސް ވިދާޅުވެފައިވާ ފަދައިން ފަތުރުވެރިކަން ރަނގަޅުވެ އިޤްތިޞާދު ރަނގަޅުވަމުން އަންނަ ދަނޑިވަޅެއްގައި، މަދު ބަޔަކު ކުރާ މިފަދަ ނޭދެވޭ ކަމެއްގެ ސަބަބުން މުޅި އިންޑަސްޓްރީއަށް ހުތުރު ނަމެއް ލިބުމުގެ ފުރުސަތު ނުދެއްވާނެ ކަމުގައި ވިދާޅުވިއެވެ.
ފަތުރުވެރިން ރާއްޖެއަށް އެތެރެވުމުގެ ކުރިން ތިބޭނެ ތަނެއް އިމިގްރޭޝަނަށް، ޕޯޓަލް މެދުވެރިކޮށް ހުށަހަޅަން ޖެހެއެވެ. އެގޮތަށް ހުށަހަޅާއިރު، އެއްތަނަކަށް މާގިނަ ބުކިންގ ހައްދާފައި ހުންނަ ތަންތަން ބަލައި ޗެކްކުރަން ފަށާފައިވާ ކަމަށް ހަނަފީ ވިދާޅުވިއެވެ.
ފޭކް ބުކިންގައި ރާއްޖެއަށް އެތެރެވުމަށް މަސައްކަތްކުރި 183 މީހަކު އޮގަސްޓް 16 ވަނަ ދުވަހު ޗާޓަރ ޕްލައިޓެއްގައި ވަނީ ފޮނުވާލާފައެވެ. މިމަހުގެ ތެރޭގައި ފޭކް ބުކިންގގައި ރާއްޖެ އައިސް މަގުމަތިވި 27 މީހަކު މިހާރު ވެސް ޔޫތް މިނިސްޓްރީގެ ބެލުމުގެ ދަށުގައި އޮންނަ ފުޓްބޯޅަ ސްކޫލެއްގައި އެބަތިބި ކަމަށާއި، އެމީހުން ރާއްޖެ އައި މުއްދަތު ހަމަވުމުން ފުރާނެ ކަމަށް ވިދާޅުވިއެވެ. އެމީހުން ތިބޭތަން ފިޔަވައި އެހެން ހުރިހާ ޚަރަދެއް ކުރަނީ އެމީހުން އަމިއްލައަށް ކަަމަށް ވިދާޅުވިއެވެ. މި މައްސަލައިގައި މިހާރު ބިދޭސީއަކު ހައްޔަރުކޮށް އޭނާގެ މައްސަލަ އަންނަނީ ތަހުގީގު ކުރަމުންނެވެ.
މިގޮތަށް ފޭކް ބުކިންގގައި ރާއްޖެ އަންނަ ގިނަ މީހުންގެ ތެރޭގައި ގިނައީ އިންޑިއާ މީހުންނެވެ. މި މީހުން ގިނައިން އަންނަނީ ކަރަންޓީން މުއްދަތު ފުރިހަމަ ކުރުމަށްފަހު އެހެން ގައުމަކަށް ދަތުރުކުރުމުގެ ބޭނުމުގައެވެ. މި މަހުގެ 18 ވަނަ ދުވަހު ރާއްޖެ އައިސް ހުޅުމާލެއަށް އައި ބަޔަކާ ވާހަކަ ދައްކާލުމުން އެމީހުން ބުނީ ރާއްޖެއަށް އައީ ދުބާއީއަށް ދިޔުމަށް ކަރަންޓީން މުއްދަތު ފުރިހަމަކުރުމަށް ކަމަށެވެ. ރާއްޖޭގައި އެ މީހުން ބުކިންގ ހައްދާފައި އޮތީ، ސަފާރީ އަކަށެވެ.
މި މީހުން ބުނީ، 14 ދުވަހަށް ފުލް ބޯރޑް ބުކިންއަކަށް ބޮލަކަށް 200،000 ރުޕީސް ދިން ކަމަށެވެ. އެއީ ގާތްގަނޑަކަށް 41،600 ދިވެހި ރުފިޔާއެވެ.
ކޮވިޑާ ދެކޮޅަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އަޅާފައިވާ ފިޔަވަޅުތަކާ ހިލާފަށް މީހުން ދިރިއުޅޭ ގެސްޓްހައުސްތަކަށް ފަތުރުވެރިން ގެންނަ މައްސަލަ ބޮޑުވެ، އެކަން ހުއްޓުވަން އިންސްޕެކްޝަނެއް ވެސް މިހާރު ވަނީ ފަށާފައެވެ.
