ރާއްޖެޓީވީން 3 މައްސަލައެއް އޮމްބަޑްސްޕާރސަންގެ އޮފީހަށް ހުށަހަޅައިފި
ރާއްޖެޓީވީގެ މައި ސްޓޫޑިއޯގެ ތެރެއަށް ޕެޓްރޯލް އަޅާ ރޯކޮށްލުމުގެ ސަބަބުން ލިބުނު ގެއްލުމާއި ހައްގުތައް ހޯދުން
ރާއްޖެޓީވީގެ ސްޓޫޑިއޯ ރޯކޮށްލާފައިވަނީ، 2013ވަނަ އަހަރު
ރާއްޖެޓީވީން 3 މައްސަލައެއް އިންތިގާލީ އިންސާފުގެ އޮމްބަޑްސްޕާރސަންގެ އޮފީހަށް ހުށަހަޅައިފިއެވެ.
އޮމްބަޑްސްޕާރސަންގެ އޮފީހަށް ހުށަހެޅޭނީ، ދައުލަތުގެ މުއައްސަސާއަކުން ނިޒާމީ ސިފައެއްގައި ރާވައި ހިންގި އަމަލެއްގެ ސަބަބުން، ނުވަތަ އެފަދަ އަމަލެއްގެ ނަތީޖާއެއްގެ ސަބަބުން އިންސާނީ ހައްގެއް ނުވަތަ އަސާސީ ހައްގެއް ނިގުޅައިގެންފައިވާ މައްސަލަތަކެވެ.
ރާއްޖެޓީވީން މައްސަލަ ހުށަހަޅާފައިވަނީ މި މަހުގެ 18ވަަނަ ދުވަހުއެވެ.
ރާއްޖެޓީވީން ހުށަހަޅާފައިވަނީ، 7 އޮކްޓޯބަރ 2013ގައި ހަތިޔާރާއެކު ބަޔަކު ވަދެ ރާއްޓީވީގެ މައި ސްޓޫޑިއޯގެ ތެރެއަށް ޕެޓްރޯލް އަޅާ ރޯކޮށްލުމުގެ ސަބަބުން ލިބުނު ގެއްލުމުގެ ބަދަލާއި ހައްގުތައް ހޯދުމަށެވެެ. މި މަންޒަރު އެ އިމާރާތުގެ ސީސީޓީވީ ކެމެރާތަކަށް ރެކޯޑް ކުރެވިފައި ހުރިކަމަށް މައްސަލައިގައި ބަޔާން ކޮށްފައިވެއެވެ. ސްޓޭޝަނުގައި ރޯކޮށްލާފައިވަނީ، ކުރިންވެސް އެކިފަހަރުމަތިން ސްޓޭޝަންގެ މަސައްކަތްތައް ހުއްޓުވުމަށް އޭރު ތިއްބެވި ސިޔާސީ އެކި ބޭފުޅުން މަސައްކަތްކޮށް ކާމިޔާބު ނުވުމުން ކަމަށް ބެލެވޭ ކަމަށްވެސް ބުނެފައިވެއެވެ. މިކަމުގެ ސަބަބުން ރައްޖެޓީވީއަށް 11.6 މިލިއަނަށްވުރެ ގިނަ ރުފިޔާގެ ގެއްލުން ލިބިފައިވާކަމަށްވެސް ބުނެފައިވެއެވެ. މި މައްސަލަ ކަމާ ގުޅުންހުރި އިދާރާތަކުން ބަލާފައި ނުވާތީ، ރާއްޖެޓީވީއަށް އިންސާފު ލިބޭނެ ގޮތަކަށް މައްސަލަ ބަލައި ދިނުމަށް ވަނީ އެދިފައެވެ.
ދެވަނަ މައްސަލައަކަށް ހުށަހަޅާފައިވަނީ 26 އޮކްޓޯބަރ 2016ވަނަ ދުވަހުގެރޭ ރާއްޖެޓީވީން ލައިވްކުރި ޕްރޮގްރާމެއްގައި، ކުރީގެ ރައީސް ޔާމީންއަބްދުލް ގައްޔޫމްގެ އަބުރު ގެއްލޭފަދަ ގޮތަކަށް ވާހަކަދައްކާފައިވާ ކަމަށް ބުނެ މޯލްޑިވްސް ބްރޯޑްކާސްޓިން ކޮމިޝަނުން ފިޔަވަޅު އަޅާފައިވަނީ، ގާނޫނީ އިމުގެ ބޭރުން ކަމަށްވާތީ މިކަމާ ގުޅިގެން ރާއްޖެޓީވީއަށް ސީދާ އެއް މިލައަން ރުފިޔާގެ ގެއްލުން ލިބިފައިވާތީ، އެ ލިބުނު ގެއްލުމުގެ ބަދަލު ހޯދައިދިނުމަށެވެ.
ތިންވަނަ މައްސަލައަކީ، 28 ޖުލައި 2017 ގައި ރާއްޖެޓީވީން ވަގުތުން ގެނެސްދިން ޕްރޮގްރާމެއްގައި އޭރު ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރ މުހައްމަދު މުސްތަފާ ދައްކަވާފައިވާ ވާހަކަތަކަކާ ގުޅިގެން މޯލްޑިވްސް ބްރޯޑްކާސްޓިން ކޮމިޝަންގެ ފަރާތުން ފިޔަވަޅު އަޅާފައިވާ މައްސަލައެވެ. ރާއްޖެޓީވީން އެދިފައިވަނީ، އެ ފިޔަވަޅަކީ، ގާނޫނީ އިމުގެ ބޭރުން އަޅަފައިވާ ފިޔަވަޅެއް ކަމަށް ކަނޑައަޅައިދިނުމަށާއި، ޖޫރިމަނާގެ ގޮތުގައި ދައުލަތަށް ދައްކަން ޖެހުނު ފަސް ލައްކަ ރުފިޔާ އަނބުރާ ރުޖޫއަކުރުމަށް ކަމާ ގުޅުން ހުރި މުއައްސަސާތަކަށް އަންގައި ދިނުމަށެވެ.
އޮމްބަޑްސްޕާރސަންގެ އޮފީން ބަލަނީ، 1 ޖެނުއަރީ 1953ން ފެށިގެން 17 ނޮވެމްބަރ 2018 އާ ހަމައަށް ހިނގާފައިވާ މައްސަލަތަކެވެ. އާއްމުން ހުށަހަޅާ މައްސަލަ ތަކުގެ އިތުރުން އަމިއްލަ އަށް އިސްނަގައިގެންވެސް މައްސަލަ ބެލުމުގެ ބާރު އެ އޮފީހަށް ލިބިގެންވާއިރު، އެގޮތަށް ބަލާނީ ޕަބްލިކް އިންޓަރެސްޓް ހިމެނޭ މައްސަލަތައްކަަމަށްވެސް އެ އޮފީހުން ބުނެއެވެ. ޕަބްލިކް ހިއަރިންއަކަށް ދާން ޖެހޭ މައްސަލަތަކުގައި އެކަން އެގޮތަށް ކުރާނެ ކަމަށްވެސް އެ އޮފީހުން ވަނީ މައުލޫމާތުދީފައެވެ.
ޖިނާއީ ދައުވާ ކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާއި، ތަހުގީގުކުރި މައްސަލައެއްގެ މަދަނީ ގެއްލުމުގެ ބަދަލު ހޯދުމާއި، މުދަލާއި ފައިސާ އަނބުރާ ހޯދުމުގެ ކަންކަން ހިމެނޭނަމަ، ފިޔަވަޅު އެޅުމަށްޓަކައި އެޓަރނީ ޖެނެރަލްގެ އޮފީހަށް ފޮނުވުމުގެ ބާރު އެ އޮފީހަށް ލިބިގެންވެއެވެ.
