ރައީސް ނަޝީދަށް ދިން ހަމަލާ ތަހުގީގު ކުރުމަށް އިނގިރޭސިވިލާތުގެ އިތުރު ވަކީލެއް
ރައީސް ނަޝީދަށް ހަމަލާ ދިން ހުރިހާ މީހުން އިންސާފުގެ ކުރިމައްޗަށް ގެނައުމަށް މަސައްކަތް ކުރައްވާނެ
އިނގިރޭސިވިލާތުގެ ކުއީން ކައުންސިލުގެ މެންބަރުއް ކަމަށްވާ ކްރިސްޓީ ބްރައިމް
މެއި މަހުގެ ހަ ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާ ތަހުގީގުގައި އެމަނިކުފާނުގެ ފަރާތުން ވަކާލާތު ކުުރުމަށް އިނގިރޭސިވިލާތުގެ ކުއީން ކައުންސިލުގެ މެންބަރެއް ކަމަށްވާ ކްރިސްޓީ ބްރައިމްލޯ ހަމަޖައްސަވައިފިއެވެ.
މިހަކާ ގުޅިގެން އަންގާރަ ދުވަހު ރައްޔިތުންގެ މަޖިލީހުގެ އިދާރާއިން ނެރުނު ބަޔާނެއްގައި ބުނީ ރައީސް ނަޝީދަށް އަމާޒުކޮށް ދިން ހަމަލާ ރޭވުމާއި ހިންގުމުގައި ޝާމިލުވާ އަދި އެކަމަށް ފަންޑުކުރި މީހުން ހޯދުމަށް އެކަމަނާ މަސައްކަތް ކުރައްވާނެ ކަަމަށެވެ.
މީގެއިތުރުން އެމަނިކުފާނަށް ހަމަލާ ދިން ހުރިހާ މީހުން އިންސާފުގެ ކުރިމައްޗަށް ގެނައުމަށް ބައިނަލްއަގުވާމީ އަދި ރާއްޖޭގެ ގާނޫނުތަކާ އެއްގޮތަށް މަސައްކަތް ކުރައްވާނެ ކަމަށެވެ.
ރައީސް ނަޝީދަށް ދިން ހަމަލާއާއި ގުޅިގެން ފަރުވާ ހޯއްދެވުމަށް އެމަނިކުފާނު މިވަގުތު ރާއްޖެއިން ބޭރުގައި ހުންނެވިއިރު ހޯމަ ދުވަހު ޗުއްޓީގެ މުއްދަތު އިތުރުކޮށްދެއްވައި އެމަނިކުފާނު ރާއްޖެއިން ބޭރުގައި ދިރިއުޅުމަށް ހިތް ޚަލާސްކުރައްވައި އެފުރުސަތު ފަހިކޮށްދެއްވުމަށް އެމަނިކުފާނު ރައްޔިތުންގެ މަޖިލީހުގައި ވަނީ އެދިވަޑައިގެންފައެވެ. މިކަމާ ގުޅިގެން އެމަނިކުފާނު ވަނީ މަޖިލީހުގެ ނާއިބުރައީސް އީވާ އަބްދުﷲއަށް ސިޓީއެއް ފޮނުއްވާފައެވެ. ސިޓީގައި އެމަނިކުފާނު ވިދާޅުވެފައިވަނީ އެ ސިޓީއަކީ ސަރުކާރާއި ދައުލަތުގެ އިދާރާއަކާ ނުރުހިގެން ފޮނުއްވާ ސިޓީއެއް ނޫން ކަމަށެވެ. އަދި އެއީ މިވަގުތުގެ ހާލަތަށް ރިއާޔަތްކޮށް، އިޚުލާސްތެރިކަމާއެކު ދަންނަވާ ދެންނެވުމެއް ކަމަށެވެ.
ރައީސް ނަޝީދު ވިދާޅުވީ 6 މެއިގައި އެމަނިކުފާނަށް ދިން ހަމަލާ ރާވައި ހިންގި ފަރާތްތަކުގެ ތަހުގީގު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވުމާއެކު އެ ތަހުގީގު ނިމި، އެކަންރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެމަނިކުފާނު ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކާއި އަދި އެމަނިކުފާނު ވެސް ޖެހިލުންވާ ކަމެއް ކަމަށެވެ.
