އޯގަސްޓު މަހުގެ ތެރޭގައި އިތުރު 9 ރަށެއް މޮނިޓަރިންނަށް
މިހާރު އަޅާފައިވާ ފިޔަވަޅުތަކަށް ގިނަ ލުއިތަކެއް ވަނީ ދީފައި
ރ. ދުވާފަރު- މޮނިޓަރިން ހާލަތުގައިވާ ރަށްތަކުގެ ތެރެއިން އެންމެ ގިނަ ދުވަސް ވެފައިވާ ރަށަކީ ރ. ދުވާފަރު
އޯގަސްޓު މަހުގެ ތެރޭގައި މޮނިޓަރިންނަށް ލާފައިވާ 9 ރަށާއެކު ޖުމްލަ 15 ރަށެއް މިހާރު މޮނިޓަރިންގެ ހާލަތުގައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން ބުނީ، މޮނިޓަރިންނަށް ލާފައިވަނީ ރ. ދުވާފަރު، ކ. ކާށިދޫ، މ. ކޮޅުފުށި، ށ. ފީވަށް، ހއ. ތަކަންދޫ، ދ. ކުޑަހުވަދޫ، އއ. ހިމަންދޫ، ތ. ހިރިލަންދޫ، ހދ. މަކުނުދޫ، ބ. އޭދަފުށި، ބ. ކަމަދޫ، އދ. ހަންޏާމީދޫ، ހދ. ނެއްލައިދޫ، ހއ. އިހަވަންދޫ އަދި ގދ. ތިނަދޫ ކަމަށެވެ.
އެޗްޕީއޭއިން އާންމު ކުރި ތަފާސްހިސާބުތަކަށް ބަލާއިރު މޮނިޓަރިން ހާލަތުގައިވާ ރަށްތަކުގެ ތެރެއިން އެންމެ ގިނަ ދުވަސް ވެފައިވާ ރަށަކީ ރ. ދުވާފަރެވެ. އެރަށް މޮނިޓަރިންގެ ހާލަތަށް ގެނެސްފައިވަނީ މެއި މަހު 25 ވަނަ ދުވަހުއެވެ. މީގެ އިތުރުން ޖޫން މަހު 5 ރަށެއް މޮނިޓަރިންނަށް ލާފައިވާކަމަށް އެޗްޕީއޭއިން ބުނެއެވެ.
މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތްތައް ކުރުމަށެވެ. މޮނިޓަރިންގެ ހާލަތުގައި އޮތް ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދާ ކަމަށާއި، ހާލަތު ރަނގަޅު ރަށްރަށް މޮނިޓަރިންއިން ނަގަމުންދާ ކަމަށް އެޗްޕީއޭއިން ބުނެއެވެ.
ކޭސް ތަކުގެ އަދަދު ދަށްވި ނަމަވެސް މެއި މަހުގެ ތެރޭގައި ކޮވިޑް-19ގެ ހާލަތު ގޯސްވެ 73 ރަށެއް މޮނިޓަރިންގެ ހާލަތަށް ގެނެސްފައިވެއެވެ. އެދުވަސްވަރު މާލޭގެ އިތުރުން އަތޮޅުތެރޭގައި ކޮވިޑް-19ގެ ހާލަތު ގޯސްވާތީ ބަލި ކޮންޓްރޯލް ކުރުމަށް ގިނަ ފިޔަވަޅުތަކެއް އެޅިއެވެ. އެގޮތުން ގިނަ ރަށްރަށުގައި ކާފިއު ހިންގާފައިވެއެވެ.
ރާއްޖޭގައި ކޮވިޑްގެ ހާލަތު ރަނގަޅުވެ، ޚާއްސަކޮށް މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއެކު، އަޅާފައިވާ ފިޔަވަޅުތަކަށް ގިނަ ލުއިތަކެއް ދީފައިވެއެވެ. ނަމަވެސް ވެކްސިންގެ ދެ ޑޯޒު ފުރިހަމަ ކުރިކަމުގައި ވިޔަސް، މޮނިޓަރިންގެ ހާލަތުގައި އޮންނަ ރަށްރަށަށް ދަތުރުކުރާނަމަ ކަރަންޓީންގެ މުއްދަތު ފުރިހަމަ ކުރަންޖެހޭނެ ކަމަށް އެޗްޕީއޭއިން ބުނެފައިވެއެވެ.
