"ސަރުކާރު ހިއްސާވާ ކުންފުނިތައް ޕްރައިވެޓައިޒް ކުރުމަށް ކުރާ މަސައްކަތްތަކަކީ ސިއްރުން ކުރާ ކަމެއް ނޫން"
16 އޯގަސްޓު 2021 | ހޯމަ 17:23އިޤްތިޞާދީ ބަދަލުތައް ގެނައުމަށް ޕްރައިވެޓައިޒޭޝަންގެ ބޭނުން ހިފިދާނެ
ފިނޭންސް މިނިސްޓަރ އިބްރާހީމް އަމީރް
ސަރުކާރު ހިއްސާވާ ކުންފުނިތައް ޕްރައިވެޓައިޒް ކުރުމަށް ކުރާ މަސައްކަތްތަކަކީ ސިއްރުން ކުރާ މަސައްކަތްތަކެއް ނޫންކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
ހޯމަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން މިނިސްޓަރ އަމީރު ވިދާޅުވީ، ސަރުކާރު ހިއްސާވާ ކުންފުނިތައް ޕްރައިވެޓައިޒް ކުރުމަށް ކުރާ މަސައްކަތްތަކަކީ ސިއްރުން ކުރާ މަސައްކަތްތަކެއް ނޫން ކަމަށެވެ. އެގޮތުން ބަޖެޓުގެ އެކި މަރުޙަލާތަކުގައިވެސް އެ ޚިޔާލު ހުށައަޅުއްވާފައިވާނެކަން މިނިސްޓަރ ފާހަގަ ކުރެއްވިއެވެ.
މިނިސްޓަރ ވިދާޅުވީ، އިޤްތިޞާދީ ބަދަލުތައް ގެނައުމަށް, ޕްރައިވެޓައިޒޭޝަން ގެ ބޭނުން ހިފިދާނެކަން ގައުމުތަކަށް ބަލާލުމުންވެސް ފެނިގެންދާ ކަމަށެވެ. އެގޮތުން ޕްރައިވެޓައިޒް ކުރުމުން ކުންފުނިތަކުގެ ހިންގުމުގައި ރަނގަޅު ބަދަލުތައް ފެނި، ރައްޔިތުންނަށްވެސް އޭގެ ފައިދާ ބޮޑުވާ ކަމަށެވެ. މި މަސައްކަތުގައި މަޖިލީހާއި، ވަޒީރުންގެ މަޖިލީހުގެވެސް ބައިވެރިވުން އޮންނާނެކަން ފާހަގަ ކުރައްވައި މިނިސްޓަރ ވަނީ މިކަންކަމުގެ ފުރިހަމަ މައުލޫމާތު އަމިއްލަފުޅަށް ރައްޔިތުންނަށްވެސް ހާމަ ކުރައްވާނެކަމަށް ވިދާޅުވެފައެވެ.
މިނިސްޓަރ ވިދާޅުވީ، އަމާޒަކީ ވީހާވެސް ދެފުއް ފެންނަ، ހާމަކަން ބޮޑު ގޮތެއްގައި މި މަސައްކަތް ކުރުން ކަމަށެވެ.
މި ސަރުކާރު ވެރިކަމާ ހަވާލުވެ އެންމެ އިސްކަންދީގެން ކުރިއަށް ގެންދާ މަސައްކަތްތަކަކީ ކުންފުނިތަކުގެ ނިޒާމުތައް ހަރުދަނާ ކުރުމުގެ މަސައްކަތެވެ.
