ސަރުކާރު ބިންތައް މިނިސްޓްރީއަށް ރަޖިސްޓަރ ކުރަން މާލެ ސިޓީ ކައުންސިލްގައި އެދިފައިވާނެ ކަމަށާއި، ނަމަވެސް އެ ބިންތަކާއި އިމާރާތްތައް ރަހުނު ކުރުމަށް ނިންމާފައި ނުވާނެކަމަށް މިނިސްޓަރ އޮފް ފިނޭންސް އިބްރާހީމް އަމީރު ވިދާޅުވެއްޖެއެވެ.

ހޯމަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން މިނިސްޓަރ އަމީރު މިހެން ވިދާޅުވީ، ރައީސް އިބްރާހީމް މުޙައްމަދު ޞާލިޙުގެ ސަރުކާރު ހިންގުމަށް އިތުރު ފައިސާ ހޯދުމަށް ސްކޫލްތައް ހިމެނޭހެން ބައެއް އިމާރާތްތައް ރަހުނު ކޮށްފައިވާކަމަށް ދެކެވޭ ވާހަކައާ ގުޅޭގޮތުންނެވެ. އެގޮތުން ތަރައްގީގެ ތެރެއިން, ރާއްޖެ އިސްލާމީ ފައިނޭންސްގެ ހަބަކަށް ހެދުމަކީ ސަރުކާރުގެ އަމާޒެއްކަން ފާހަގަ ކުރައްވައި މިނިސްޓަރ ވިދާޅުވީ، އެއީ ރަހުނު ކުރުމެއް ނޫން ކަމަށެވެ. މިނިސްޓަރ ވިދާޅުވީ، ރާއްޖޭގެ އެސެޓުތައް ރަހުނުކޮށްގެން ދަރަންޏަށް ފައިސާ ނެގުމުގެ އެއްވެސް ވިސްނުމެއް ނެތް ކަމަށެވެ.

މިނިސްޓަރ ވިދާޅުވީ، ސަރުކާރުގެ ބިންތައް ފިނޭންސް މިނިސްޓްރީގެ ރެޖިސްޓްރީއަށް ބަދަލު ކުރުމަށް މާލެ ސިޓީ ކައުންސިލްގައި އެދިފައިވާނެ ކަމަށެވެ. އަދި ސަރުކާރު ހިންގުމަށް އިތުރު ފައިސާ ހޯދުމަށް ދައުލަތުގެ އިމާރާތްތައް ރަހުނު ކޮށްފައިވާކަމަށް ވާހަކަ ފެތުރިގެން އައީ އެހިސާބުންކަމަށް ވެދާނެކަން މިނިސްޓަރ ފާހަގަ ކުރެއްވިއެވެ. ނަމަވެސް އެއީ ސައްޙަ ވާހަކައެއް ނޫންކަމުގެ ޔަގީންކަން މިނިސްޓަރ ދެއްވިއެވެ. އަދި އެއީ މިހާރު ކުރެވެމުންދާ މަސައްކަތްތަކުގެ "އޮފު ކަނޑުވާލުމަށް" ދައްކާ ސިޔާސީ ވާހަކަތަކެއްކަން މިނިސްޓަރ ފާހަގަ ކުރެއްވިއެވެ.

މި އަހަރަށް ދައުލަތުގެ ބަޖެޓަށް ބޭނުންވާ ފައިސާ ހޯދުމަށް ބޭރުގެ ފަރާތަކަށް 300 މިލިއަން ޑޮލަރުގެ ސުކޫކެއް ވިއްކަން ސަރުކާރުން ވަނީ ނިންމާފައެވެ. އިސްލާމިކް ކޯޕަރޭޝަން ފޮރ ދި ޕްރައިވެޓް ސެކްޓަރ (އައިސީޑީ)އާއެކު ވިއްކުމަށް މަސައްކަތް ކުރާ މި ސުކޫކުގެ މައިގަނޑު އަސާސަކީ އެސެޓް ބޭސްޑް ސުކޫކެވެ. އެގޮތުން އެއީ ދަރަނި ނަގާ ފަރާތުން ކަނޑައަޅާ 100 އިންސައްތަ ދައުލަތުން ހިއްސާވާ ސްޕެޝަލް ޕާރޕޯސް ވެހިކަލް (އެސްޕީވީ) އެއް ގޮތުން 100 އިންސައްތަ ހިއްސާވާ ދައުލަތުގެ ކުންފުންޏަކަށް ދައުލަތުގެ އެސެޓެއްގެ ބެނެފިޝަލް އޯނަރޝިޕް ބަދަލުކޮށް، ސުކޫކުގެ އިންވެސްޓަރުންގެ ފަރާތުން އެސްޓީވީ ގެ ބެނެފިޝަލް އޯނަރޝިޕްގައިވާ އެސެޓް ދައުލަތަށް އިޖާރާ އެއްބަސްވުމެއްގެ ދަށުން ދަރަންޏަށް ނަގާ ފަރާތަށް ލީސް ކުރުން ކަމަށް ފިނޭންސް މިނިސްޓްރީން ވަނީ ކުރިން މައުލޫމާތުދީފައެވެ.

މިނިސްޓްރީން ބުނީ، ސުކޫކުގެ މުއްދަތު ހަމަވުމުން އެސެޓްގެ ބެނެފިޝަލް އޯނަރޝިޕް ދައުލަތުގެ 100 އިންސައްތަ ހިއްސާވާ އެސް.ޕީ.ވީއިން އަނބުރާ މިނިސްޓްރީ އޮފް ފިނޭންސަށް ނެގޭނެ ކަމަށެވެ.