ރަށްރަށުގެ ތަރައްޤީގެ ޕްލޭން ހަދަން ޖެހޭ ތާރީޚު އެލްޖީއޭއިން ފަސްކޮށްދީފި
ޕްލޭން ތައްޔާރުކޮށް ހުށަހަޅަންޖެހޭ ތާރީޚަކީ ނޮވެންބަރު 30
އެލްޖީއޭގެ ޗީފް އެގްޒެކެޓިވް އޮފިސަރ ފާތިމަތު އަފްޝަން ލަތީފް
ރަށު ކައުންސިލްތަކާއި ސިޓީ ކައުންސިލްތަކުން ހަދަންޖެހޭ ރަށުގެ ތަރައްޤީގެ ޕްލޭން އެކުލަވާލަންޖެހޭ ތާރީޚު ލޯކަލް ގަވަރުމަންޓް އޮތޯރިޓީ (އެލްޖީއޭ) އިން ފަސްކޮށްދީފިއެވެ.
އަލަށް އެކުލަވާލެވޭ ކައުންސިލްތަކަށް އިންތިޚާބުކުރެވޭ މެންބަރުން މަޤާމާ ޙަވާލުވާތާ ތިން މަސްދުވަހުގެ ތެރޭގައި، އެ ރަށެއްގެ ތަރައްޤީގެ ޕްލޭން އެކުލަވާލަން ޖެހޭއިރު ތަރައްޤީގެ ޕްލޭން އެކުލަވާލަންޖެހެނީ ރަށުގެ ރައްޔިތުންނާއި ކަމާގުޅޭ އެންމެހާ ފަރާތްތަކުގެ މަޝްވަރާއާ އެކު އެފަރާތްތަކުގެ ޚިޔާލު ހިމެނޭގޮތަށެވެ.
ނަމަވެސް ކޮވިޑާ ގުޅިގެން މިކަންތައްތައް ކުރިއަށް ގެންދެވިފައިނުވާއިރު ޤާނޫނުގައި ކަނޑައަޅާފައިވާ މުއްދަތަށް ޕްލޭން ނިންމުމުގައި ކައުންސިލްތަކަށް ދަތިތަކެއް ހުރި ކަމަށް އެލްޖީއޭއިން ވަނީ ބުނެފައެވެ. އެހެންކަމުން ޕްލޭން ތައްޔާރުކޮށް ހުށަހަޅަންޖެހޭ ތާރީޚަކީ ނޮވެންބަރު 30 ކަމަށް އެލްޖީއޭ އިން ވަނީ ބުނެފައެވެ. ގާނޫނުގައި ބުނެފައިވާ ގޮތުން ރަށު ކައުންސިލްތަކާއި ސިޓީ ކައުންސިލްތަކުން ހަދަންޖެހޭ ރަށުގެ ތަރައްޤީގެ ޕްލޭން އެކުލަވާލަންޖެހޭނީ ރައްޔިތުންގެ ހިޔާލާއި މަޝްވަރާ ހޯދައިގެންނެވެ.
އެލްޖީއޭ އިން މިގޮތަށް ނިންމާފައިވަނީ ތަރައްޤީގެ ޕްލޭން އެކުލަވާލުމަށް ޤާނޫނުގައި ބުނެފައިވާ މުއްދަތު ހަމަވަމުންދާތީ، ރައްޔިތުންގެ މަޖިލީހުގެ ލާމަރުކަޒީ ކޮމެޓީއާ މަޝްވަރާކުރުމަށް ފަހުއެވެ.
ބޮޑެތި ބާރުތަކާއެކު ލާމަރުކަޒީ ގާނޫނު އިސްލާހުކުރި ފަހުން އިންތިޚާބުވި ކައުންސިލަރުން މަގާމާ ހަވާލުވީ މިދިޔަ މެއި މަހުގެ 17 ވަނަ ދުވަހެވެ.
