އެންޑީއޭގެ ޗެއަރމަނަކަށް ސަމާއު
13 އޯގަސްޓު 2021 | ހުކުރު 03:30ބޯޑުގައި 10 މެމްބަރުން ތިއްބަވާއިރު، ބޯޑުގެ 5 މެމްބަރުންވަނީ ބަދަލުކޮށްފައި
ސަމާއު ޝަރީފު - އެންޑީއޭގެ ޗެއަރމަން
ނޭޝަނަލް ޑްރަގް އެޖެންސީ، (އެންޑީއޭ) ބޯޑުގެ ޗެއަރމަނަކަށް މާލެ ސިޓީ ކައުންސިލްގެ ކުރީގެ ޑެޕިއުޓީ މޭޔަރު، ސަމާއު ޝަރީފު ހަމަޖައްސައިފިއެވެ.
ސަމާއު ޗެއަރމަނަކަށް ހަމަޖައްސާފައިވާއިރު އެ ބޯޑުގެ ސީއީއޯގެ މަގާމު އަދިވެސް އޮތީ ހުސްކޮށެވެ. އެންޑީއޭގެ ސީއީއޯގެ މަގާމުގައި އެންމެ ފަހުން ހުންނެވި މުހައްމަދު ހަބީބް އެ މަގާމުން ވަކިކުރީ މި އަހަރުގެ މެއި މަހުގެ 16 ވަނަ ދުވަހުއެވެ.
ނޭޝަނަލް ޑްރަގް އޭޖެންސީގައި ފަރުވާގެ ނިޒާމު އެހާ ރަނގަޅަށް ހިނގަމުން ނުދާކަމުގެ ޝަކުވާ ފަހަކަށް އައިސްވަނީ އިތުރުވެފައެވެ. މިއާއެކު އެތަން ހަރުދަނާކުރުމުގެ މަސައްކަތް ސަރުކާރު ފެއްޓެވިއެވެ. އެންޑީއޭގެ ހިންގުން ހަރުދަނާކުރުމުގެ ގޮތުން ބޯޑަށް ވަނީ ބޮޑެތި ބަދަލުތަކެއް ގެނެސްފައެވެ. ބޯޑުގައި 10 މެމްބަރުން ތިއްބަވާއިރު، ބޯޑުގެ 5 މެމްބަރުން ވަނީ ބަދަލުކޮށްފައެވެ.
އެންޑީއޭ ކުރިން ހިންގަމުން ދިޔައީ ޖެންޑާ މިނިސްޓްރީގެ ބެލުމުގެ ދަށުންނެވެ. އެހެންނަމަވެސް މިހާރު އެތަން ހިންގަމުން އަންނަނީ ހެލްތް މިނިސްޓްރީގެ ބެލުމުގެ ދަށުންނެވެ. ހެލްތް މިނިސްޓްރީގެ ދަށަށް ބަދަލުކުރީ، މެއި މަހުގެ ފަސް ވަނަ ދުވަހުއެވެ.
ނޭޝަނަލް ޑްރަގް އޭޖެންސީއަކީ، ގާނޫނު ނަންބަރު 2011/17 (މަސްތުވާތަކެއްޗާބެހޭ ގާނޫނު) ގެ 26 މާއްދާގެ (ހ) ގެ ދަށުން ރައީސުލްޖުމްހޫރިއްޔާ އުފައްދަވާފައިވާ ތަނެކެވެ.
މަސްތުވާތަކެއްޗަށް ހުޅުވިފައިވާ ހުރިހާ ދޮރުތަކެއް ބަންދުކޮށް ތަންފީޒީ އިދާރާތަކަށް އޮންނަ ނޭއްގާނީ ނުފޫޒުތައް ކަނޑުވާލައި، މިނިވަންކަމާއި ޕްރޮފެޝަނަލްކޮށް މަސައްކަތްކުރެވޭނެ ޖާގަ ހޯދައިދިނުމަކީ މި ސަރުކާރުގެ މެނިފެސްޓޯގައި ހިމެނޭކަމެކެވެ.
