ޓޯކިއޯ އޮލިމްޕިކްސް - މެޑަލް ލިސްޓުގެ އެއްވަނައިގައި އެމެރިކާ

ދުނިޔޭގެ އެންމެ ބޮޑު ކުޅިވަރު އީދު އޮލިމްޕިކް ގޭމްސް 2020 ގެ މެޑަލް ތާވަލުގެ އެއްވަނަ އަނެއްކާވެސް އެމެރިކާއިން ހޯދައިފިއެވެ.

ދުނިޔޭގެ 200 ށްވުރެ ގިނަ ގައުމުން ބައިވެރިވާ ގޭމްސް މިދިޔަ ޖުލައި މަހުގެ 23 ވަނަ ދުވަހު ފެށިއިރު، އާދީއްތަ ދުވަހު ގޭމްސް ވަނީ ރަސްމީކޮށް ނިންމާލާފައެވެ. މި ފަހަރުގެ ގޭމްސްގެ މެޑަލް ތާވަލުގެ އެއްވަނަ އެމެރިކާއިން ހޯދިއިރު، 1996 ވަނަ އަހަރުން ފެށިގެން މިހާތަނަށް ބޭއްވި ކޮންމެ އޮލިމްޕިކްސް އެއްގެވެސް މެޑަލް ތާވަލުގެ އެއްވަނަ އެ ގައުމުން އަންނަނީ ހޯދަމުންނެވެ.

މި ފަހަރުގެ އޮލިމްޕިކްސްގައި އެމެރިކާގެ 626 އެތުލީޓުން ވާދަކުރިއިރު، އެ ގައުމުން ވަނީ 39 ރަން މެޑަލް ހޯދާފައެވެ. އަދި 41 ރިހި މެޑަލް ހޯދިއިރު، އެ ގައުމުން ވަނީ 33 ލޯ މެޑަލް ހޯދާފައެވެ. މިއީ ޖުމްލަ 113 މެޑެއްޔެވެ. މެޑަލް ލިސްޓުގެ ދެވަނައިގައި އޮތް ޗައިނާއިން ވަނީ ޖުމްލަ 88 މެޑަލް ހޯދާފައެވެ. އެއީ 38 ރަން މެޑެއްޔާއި، 32 ރިހި މެޑަލް އަދި 18 ލޯ މެޑެއްޔެވެ.

ދެން މި ލިސްޓުގެ ތިންވަނަ ހޯދި ޖަޕާނުން ވަނީ ޖުމްލަ 58 މެޑަލް ހޯދާފައެވެ. އެއީ 27 ރަން މެޑެއްޔާއި، 14 ރިހި މެޑަލް އަދި 17 ލޯ މެޑެއްޔެވެ. މެޑަލް ލިސްޓުގެ ހަތަރުވަނައިގައި އޮތީ އިނގިރޭސިވިލާތެވެ. އެ މީހުންނަށް ޖުމްލަ 65 މެޑަލް ލިބުނަސް މެޑަލް ތާވަލުގައި ފަހަތުގައި އޮތީ ރަން މެޑަލް މަދުވުމުންނެވެ. އިނގިރޭސިވިލާތުން 22 ރަން މެޑަލް ހޯދިއިރު، އެ މީހުން ވަނީ 21 ރިހި މެޑަލް އަދި 22 ލޯ މެޑަލްވެސް ހޯދާފައެވެ.

ލިސްޓުގެ ފަސްވަނައިގައި ނިންމީ ރަޝިއަން އޮލިމްޕިކް ކޮމިޓީ (އާރްއޯސީ) އެވެ. މި ފަހަރުގެ ގޭމްސްއާ ކުރިމަތިލިއިރު ރަޝިއާ ސަސްޕެންޝަނެއްގައި އޮތުމުން، އޮލިމްޕިކްސްގައި އެ ގައުމުގެ އެތުލީޓުން ވާދަކުރުމުގެ ފުރުސަތު ދިނީ އާރްއޯސީގެ ނަމުގައެވެ. 300 ށްވުރެ ގިނަ އެތުލީޓުން އާރްއޯސީގެ ނަމުގައި ވާދަކުރިއިރު، އެ މީހުން ވަނީ ޖުމްލަ 71 މެޑަލް ހޯދާފައެވެ. އެއީ 20 ރަން މެޑެއްޔާއި، 28 ރިހި މެޑަލް އަދި 23 ލޯ މެޑެއްޔެވެ.

މި ފަހަރުގެ އޮލިމްޕިކްސް ނިންމުމުގެ ރަސްމިއްޔާތު އާދީއްތަ ދުވަހުގެރޭ ބޭއްވިއިރު، މި ރަސްމިއްޔާތުވެސް ބާއްވާފައިވަނީ ފަޅު ސްޓޭޑިއަމެއްގައެވެ. އަދި މި ފަހަރުގެ ގޭމްސް ހުޅުވުމުގެ ރަސްމިއްޔާތު ބަލަމްވެސް ވައްދާފައިވަނީ 1،000 ށްވުރެ މަދު މީހުންނެވެ.

ކޮވިޑް-19 އާ ގުޅިގެން މިދިޔަ އަހަރުގެ އޮލިމްޕިކްސް މި އަހަރު ބޭއްވިއިރު، މިއީ ތާރީޚުގައި އޮލިމްޕިކްސް ފަސްކުރި ފުރަތަމަ ފަހަރެވެ. އޮލިމްޕިކްސްއަށް ފަހު ޕެރަލިމްޕިކްސް ބާއްވަން ތާވަލުކޮށްފައިވަނީ މި މަހުގެ 24 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ ފަސްވަނަ ދުވަހުގެ ނިޔަލަށެވެ.