ފުރަތަމަ މެޗުން ބަލިވެ އެމެރިކާގެ ސިލްސިލާއަށް ނިމުމެއް

ޓޯކިއޯ އޮލިމްޕިކް ގޭމްސް 2020 ގެ އަންހެނުންގެ ފުޓްބޯޅަ އިވެންޓުގައި ކުޅުނު ފުރަތަމަ މެޗުން ސްވިޑެން އަތުން ބަލިވެ އެމެރިކާއިން ބަލިނުވެ ފުރިހަމަކުރަމުން އަންނަ ސިލްސިލާއަށް ނިމުން އަތުވެއްޖެއެވެ.

މި ފަހަރުގެ އޮލިމްޕިކްސްއާ ކުރިމަތިލުމުގެ ކުރިން އެމެރިކާގެ އަންހެން ޓީމުން ވަނީ މެޗަކުން ބަލިނުވެ 44 މެޗު ހަމަކޮށްފައެވެ. އެކަމަކު އޮލިމްޕިކްސްގެ އަންހެނުންގެ ފުޓްބޯޅަ އިވެންޓުގައި ކުޅުނު ފުރަތަމަ މެޗުން ދުނިޔޭގެ ޗެމްޕިއަނުން ބަލިވީ ސްވިޑެން އަތުން 3-0 ގެ ނަތީޖާއަކުންނެވެ.

ޓޯކިއޯގެ އަޖިނޮމޮޓޯ ސްޓޭޑިއަމުގައި ކުޅުނު މި މެޗުގައި އެމެރިކާގެ ފަރާތުން އާދައިގެ ކުޅުމެއް ފެނިގެންދިޔައިރު، މެޗުގެ 25 ވަނަ މިނެޓުގައި ސްވިޑެންއިން ވަނީ ލީޑު ނަގާފައެވެ. މި ލަނޑު އެ ގައުމަށް ކާމިޔާބުކޮށްދިނީ ސްޓީނާ ބްލެކްސްޓިނިއަސްއެވެ. އަދި ދެވަނަ ހާފު ފަށައިގެން ހަވަނަ މިނެޓުގައި ބްލެކްސްޓިނިއަސް ވަނީ އިތުރު ލަނޑެއް ޖަހައި ސްވިޑެންއަށް ލީޑު ފުޅާކޮށްދީފައެވެ. ދެން މި މެޗުގައި ސްވިޑެންއިން ކާމިޔާބުކުރި އަނެއް ލަނޑު މެޗުގެ 72 ވަނަ މިނެޓުގައި ޖަހައިދިނީ ލީޏާ ހާޓިގެވެ.

އޮލިމްޕިކްސްގެ އަންހެނުންގެ ފުޓްބޯޅަ އިވެންޓުގެ ގްރޫޕް ޖީގައި ކުޅުނު ފުރަތަމަ މެޗުން ބަލިވެ އެމެރިކާގެ ސިލްސިލާއަށް ނިމުން އައިރު، އެ ގައުމަކީ އެންމެ ފަހުން 2019 ވަނަ އަހަރު ބޭއްވި ފީފާ އަންހެނުންގެ ވޯލްޑް ކަޕުގެ ޗެމްޕިއަނުންނެވެ. އަދި އޭގެ ކުރިން 2015 ވަނަ އަހަރު ބޭއްވި މުބާރާތްވެސް ކާމިޔާބުކޮށްފައިވަނީ އެމެރިކާއިންނެވެ.

ޓޯކިއޯ އޮލިމްޕިކްސްގެ އަންހެނުންގެ ފުޓްބޯޅަ އިވެންޓުގެ ކުޅުން ބުދަ ދުވަހު ފެށިއިރު، ރަސްމީކޮށް ގޭމްސް ފެށުމަށް ހަމަޖެހިފައިވަނީ އަންނަ ހުކުރު ދުވަހުއެވެ.