މިދިޔަ އަހަރު ބާއްވަން އޮތް އޮލިމްޕިކް ގޭމްސް މި އަހަރަށް ފަސްކުރުމުން ނުނިދާ އުޅެން ޖެހުނު ކަމަށް އިންޓަނޭޝަނަލް އޮލިމްޕިކް ކޮމިޓީ (އައިއޯސީ) ގެ ރައީސް ތޯމަސް ބާކް ވިދާޅުވެއްޖެއެވެ.
ކޮވިޑް-19 ގެ ސަބަބުން އޮލިމްޕިކްސް މި އަހަރަށް ފަސްކުރުމަށް އައިއޯސީން ނިންމީ ގިނަ ގައުމުތަކުން އެކަމަށް ގޮވާލުމުންނެވެ. މިދުޔަ އަހަރުގެ އޮލިމްޕިކްސް ޓޯކިއޯގައި އެންމެ ފުރަތަމަ ބޭއްވުމަށް ތާވަލުކުރީ ޖުލައި މަހުގެ 24 ވަނަ ދުވަހުން އޯގަސްޓް މަހުގެ ނުވަވަނަ ދުވަހުގެ ނިޔަލަށެވެ. އެކަމަކު މިހާރު ވަނީ މި މަހުގެ 23 ވަނަ ދުވަހުން އަންނަ އޯގަސްޓް މަހުގެ އަށްވަނަ ދުވަހުގެ ނިޔަލަށް އޮލިމްޕިކްސް ބާއްވަން ތާވަލުކޮށްފައެވެ. އަދި ޕެރަލިމްޕިކްސް ބާއްވަން ތާވަލުކޮށްފައިވަނީ އަންނަ މަހުގެ 24 ވަނަ ދުވަހުން ފެށިގެން ސެޕްޓެމްބަރު މަހުގެ ފަސްވަނަ ދުވަހުގެ ނިޔަލަށެވެ.
މީގެ ކުރިން އޮލިމްޕިކްސް ކެންސަލް ކުރުމަކީ އެކަށީގެންވާ ކަމެއް އައިއޯސީގެ ރައީސް ތޯމަސް ބާކް ވިދާޅުވި ނަމަވެސް، ދާދި ފަހުން ދިން އިންޓަވިއުއެއްގައި އޭނާ ވިދާޅުވީ އޮލިމްޕިކްސް ކެންސަލް ކުރަން އެއްވެސް ވަރަކަށް ވިސްނާފައިނުވާ ކަމަށެވެ. އެކަމަކު އައިއޯސީއަށްވެސް މި ދަނޑިވަޅުގައި އެންމެ ފަސޭހަވާނީ އޮލިމްޕިކްސް ކެންސަލް ކުރަން ކަމަށާއި، ނަމަވެސް އައިއޯސީން އެތުލީޓުން ބިކަވިޔަ ނުދޭނެ ކަމަށެވެ.
އެހެންކަމުން ކުރެވުނު ބުރަ މަސައްކަތާއެކު އަންނަ ހުކުރު ދުވަހު އޮލިމްޕިކްސް ޓޯކިއޯގައި ފަށާއިރު، މި ފަހަރުގެ ގޭމްސް މި އަހަރަށް ފަސްކުރުމުން ނުނިދާ އުޅެން ޖެހުނު ދުވަސްތައްވެސް އައި ކަމަށް ވިދާޅުވިއެވެ. އަދި މިހާ ހިސާބަށް ވާސިލުވެވުނީ އެތުލީޓުންނާއި ގައުމުތަކުން ގޭމްސްއަށް ފުރިހަމައަށް އެއްބާރުލުން ދިނުމުން ކަމަށާއި، އެހެންކަމުން ފަހު ވަގުތު އޮލިމްޕިކްސް ކެންސަލް ނުކުރާނެ ކަމަށްވެސް ބާކް ވަނީ ވިދާޅުވެފައެވެ.
މި ފަހަރުގެ އޮލިމްޕިކްސް ޖަޕާނުގައި ބާއްވާއިރު، ކޮވިޑާ ގުޅިގެން ގޭމްސް ބަލަން އެހެން ގައުމުތަކުގެ ސަޕޯޓަރުން ޖަޕާނަށް އެތެރެވުން ވަނީ މަނާކޮށްފައެވެ. ކޮވިޑުގެ ދަނޑިވަޅުގައި އޮލިމްޕިކްސް ބާއްވާއިރު، މީގެ ކުރިން ޔުނައިޓެޑް ނޭޝަންސް (ޔޫއެން) އަށް ފޮނުއްވި މެސެޖެއްގައި ބޮޑުވަޒީރު ޔޮޝިހިދޭ ސުގާ ވަނީ އަހަރު ބާއްވާ އޮލިމްޕިކް ގޭމްސްއިން އެނގިގެންދާނީ މި ހާލަތުން އިންސާނުން އަރައިގަނެފައިވާކަން ކަމަށް ވިދާޅުވެފައެވެ. އަދި އޮލިމްޕިކްސް ބޭއްވުމަށް ޖަޕާން ވަރަށް ފުރިހަމައަށް ތައްޔާރުވެފައިވާ ކަމަށްވެސް ސުގާ ވަނީ ވިދާޅުވެފައެވެ.
ކޮވިޑާ ގުޅިގެން މިދިޔަ އަހަރުގެ އޮލިމްޕިކްސް މި އަހަރަށް ފަސްކުރިއިރު، މިއީ ތާރީޚުގައި އޮލިމްޕިކްސް ފަސްކުރި ފުރަތަމަ ފަހަރެވެ. އަންނަ ހުކުރު ދުވަހު އޮލިމްޕިކްސް ފަށާއިރު، މި އަހަރުގެ ގޭމްސްގައިވެސް ބޭނުންކުރާނެ ނަމަކީ "ޓޯކިއޯ އޮލިމްޕިކްސް 2020" އެވެ.
