މި އަހަރުގެ ޖުލައި މަހު ބާއްވާ ޓޯކިއޯ އޮލިމްޕިކް ގޭމްސްގައި ރާއްޖެ ތަމްސީލުކުރާ ފެތުންތެރިންގެ ގޮތުގައި ޢަލީ އިމްޢާނާއި އައިޝަތު ސައުސަން ހޮވައިފިއެވެ.
އޮލިމްޕިކްސްގައި ވާދަކުރާ ފެތުންތެރިން ހޮވާފައިވަނީ އޭޕްރީލް މަހުގެ 23 ވަނަ ދުވަހުން ފެށިގެން މި މަހުގެ ފަސްވަނަ ދުވަހުގެ ނިޔަލަށް ބޭއްވުނު ޓްރަޔަލުގެ ނަތީޖާއަށް ބަލައިގެންނެވެ.
އެގޮތުން ޓްރަޔަލުގައި އިމްޢާނަށް ވަނީ 3،140 ޕޮއިންޓް ލިބިފައެވެ. ދެން އޭނާއާ ވާދަކުރި މުބާލް އައްޒާމް އިބްރާހީމަށް ލިބިފައިވަނީ 3،024 ޕޮއިންޓެވެ. މީގެ އިތުރުން އޮލިމްޕިކްސްއިން ސައުސަން ޖާގަ ހޯދީ ޓްރަޔަލުގައި 2،997 ޕޮއިންޓް ހަމަކޮށްގެންނެވެ. އަންހެން ބައިގައި ދެން ވާދަކުރި އައިޝަތު ސާޖިނާއަށް ލިބިފައިވަނީ 2،905 ޕޮއިންޓެވެ.
އޮލިމްޕިކްސްގައި ރާއްޖެ ތަމްސީލުކުރަން އިމްޢާނާއި ސައުސަން ހޮވުނުއިރު، މި ދެ ފެތުންތެރިން ވަނީ 2019 ވަނަ އަހަރު ބޭއްވި 13 ވަނަ ސައުތު އޭޝިއަން ގޭމްސްގެ 50 މީޓަރު ބެކްސްޓްރޯކް އިވެންޓުގައި ވާދަކޮށް ގައުމީ ރިކޯޑު އާކޮށްފައެވެ. އަދި ހަމަ އެ ގޭމްސްގައި އިމްޢާން ވަނީ 200 މީޓަރު ބެކްސްޓްރޯކުގެ ގައުމީ ރިކޯޑުވެސް އާކޮށްފައެވެ.
އޮލިމްޕިކްސްގައި ވާދަކުރަން ރާއްޖޭން އިމްޢާނާއި ސައުސަން ހޮވިއިރު، މީގެ އެންމެ ފަހުން ބްރެޒިލުގެ ރިއޯގައި 2016 ވަނަ އަހަރު ބޭއްވި އޮލިމްޕިކްސްގައި ރާއްޖޭގެ ދެ ފެތުންތެރިން ކަމަށްވާ އައިމިނަތު ސަޖަން އާއި ނިޝްވާން އިބްރާހީމް ވަނީ ވާދަކޮށްފައެވެ. އެ ގޭމްސްގައި ވާދަކޮށް ސަޖަން ވަނީ އަންހެނުންގެ 100 މީޓަރު ފްރީސްޓައިލް އިވެންޓިގެ ގައުމީ ރިކޯޑި އެ ފަހަރު އާކޮށްފައެވެ.
މި އަހަރުގެ ޖުލައި މަހު ޓޯކިއޯ އޮލިމްޕިކްސް ބާއްވާއިރު، މިއީ މިދިޔަ އަހަރުގެ ގޭމްސްއެވެ. ކޮވިޑް-19 ގެ ސަބަބުން އޮލިމްޕިކްސް މި އަހަރަށް ފަސްކުރުމަށް އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ނިންމިއިރު، މިދިޔަ އަހަރުގެ އޮލިމްޕިކްސް ޓޯކިއޯގައި ބޭއްވުމަށް ކުރިން ތާވަލުކޮށްފައި އޮތީ ޖުލައި މަހުގެ 24 ވަނަ ދުވަހުން ފެށިގެން އޮގަސްޓް މަހުގެ ނުވަވަނަ ދުވަހުގެ ނިޔަލަށެވެ.
އެކަމަކު މިހާރު ވަނީ މި އަހަރުގެ ޖުލައި މަހުގެ 23 ވަނަ ދުވަހުން ފެށިގެން އޮގަސްޓް މަހުގެ އަށްވަނަ ދުވަހުގެ ނިޔަލަށް އޮލިމްޕިކްސް ބާއްވަން ތާވަލުކޮށްފައެވެ. އަދި ޕެރަލިމްޕިކްސް ބާއްވަން ތާވަލުކޮށްފައިވަނީ މި އަހަރުގެ އޮގަސްޓް މަހުގެ 24 ވަނަ ދުވަހުން ފެށިގެން ސެޕްޓެމްބަރު މަހުގެ ފަސްވަނަ ދުވަހުގެ ނިޔަލަށެވެ.
