ނާސްތާ ޕްރޮގްރާމު މި ހާލަތުގައި ކުރިއަށްނުގެންދަން ނިންމީ، މި ހާލަތުގައި ކުރުން ރައްކާތެރިކަމަކަށް ނުވާނެތީ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
އާދިއްތަ ދުވަހު އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓަރު ވިދާޅުވީ ނާސްތާ ޕްރޮގްރާމަކީ މި ސަރުކާރުގެ މައިގަނޑު އެއް ސިޔާސަތު ކަމަށެވެ.
އެހެންނަމަވެސް ކޮވިޑްގެ ހާލަތާއެކު ނާސްތާ މެދުކަނޑާލަން ނިންމާފައިވަނީ ނާސްތާ ޕްރޮގްރާމަށްވުރެ ދަރިވަރުންގެ ސިއްހަތު މުހިންމު ވީމާ ކަމަށް މިނިސްޓަރު ވިދާޅުވިއެވެ. ކޮވިޑްގެ ހާލަތުގައި އެހެން ބަޔަކު ތައްޔާރުކުރާ ތަކެތި ދަރިވަރުންނަށް ކާން ދިނުމަކީ އެހާ ރައްކާތެރި ކަމަކަށް ނުވާނެ ކަމަށް ކަމާބެހޭ ތަޖުރިބާކާރުން ލަފާދެއްވާފައިވާތީ އެކަން މިވަގުތަށް ކުރިއަށް ނުގެންދަން ނިންމީކަމަށް މިނިސްޓަރު ވިދާޅުވިއެވެ.
މި ޕްރޮގްރާމް ހުއްޓާލީ ނޫން ކަމަށާއި، މެދުކަނޑާލީ ކަމަށް މިނިސްޓަރު ވިދާޅުވިއެވެ. ކޮވިޑުގެ ހާލަތުން ސަލާމަތް ވެވުނުހާ އަވަހަކަށް މި ޕްރޮގްރާމް އަލުން ފަށާނެ ކަމަށް މިނިސްޓަރު ޑރ. އައިޝަތު އަލީ ވަނީ ވިދާޅުވެފައެވެ.
މިނިސްޓަރު އިތުރަށް ވިދާޅުވީ މި ޕްރޮގްރާމް މެދުކަނޑާލާފައިވީނަމަވެސް ކޮންމެހެން ނާސްތާ ބޭނުންވާ ކުދިންނަށް ނާސްތާ ފޯރުކޮށްދޭ ކަމަށެވެ. އެފަދަ ކުދިންކޮޅެއް ފާހަގަކުރެވިފައިވާ ކަމަށް ވިދާޅުވިއެވެ. އެ ކުދިންނަށް ފޯރުކޮށްދޭނީ ހަމައެކަނި ހެނދުނުގެ ނާސްތާ ނޫން ކަމަށާއި، އެހެނިހެން ވަގުތުތަކުގައި ވެސް އެކުދިންނަށް ނާސްތާ ފޯރުކޮށްދޭނެ ކަމަށް މިނިސްޓަރު ވިދާޅުވިއެވެ. އަދި މިއީ މިނިސްޓްރީން އަބަދުވެސް ކުރާ މަސައްކަތެއް ކަން މިނިސްޓަރު ފާހަގަކުރެއްވިއެވެ.
