ކުއްލި ނުރައްކަލުގެ ހާލަތުގައި ލޭންޑް ޔޫސް ޕްލޭނަށް ދީފައި އޮތް 3 މަސް ނުގުނާނެ
8 އޯގަސްޓު 2021 | އާދީއްތަ 08:53މިހާރު ހަދާފައިވާ ޕްލޭން ތަކަކީ، ކުރީގެ ޕްލޭންތަކެއް
އެލްޖީއޭއާއެކު ކުރިއަށްގެންދިޔަ ލާމަރުޒީ ކޮމިޓީގެ ބައްދަލުވުން ތެރެއިން
ސިއްޙީ ކުއްލި ނުރައްކަލުގެ ހާލަތުގައި ލޭންޑް ޔޫސް ޕްލޭނަށް ދީފައި އޮތް 3 މަސް ނުގުނާ ގޮތަށް ނިންމައިފިއެވެ.
ލާމަރުކަޒީ ގާނޫނަށް ގެނެވުނު 8 ވަނަ އިސްލާހާއެކު އައު ކައުންސިލް ހުވާކުރާތާ 3 މަސްދުވަހުގެ ތެރޭގައި ރައްޔިތުންނާ މަޝްވަރާކުރުމަށްފަހު ރަށްރަށުގެ ލޭންޑް ޔޫސް ޕްލޭން ހަދާ ނިންމަންޖެހެއެވެ. އައު ކައުންސިލަށް ލޭންޑް ޔޫސް ޕްލޭނަށް ދީފައި އޮތް މުއްދަތު ހަމަވާނީ މި ހިނގާ އޮގަސްޓް މަހުގެ 17 ވަނަ ދުވަހަށެވެ. އެހެންނަމަވެސް ކޮވިޑްގެ މި ހާލަތާއެކު ކައުންސިލްތަކުގެ ބައްދަލުވުންތައް ބޭއްވުމުގައި ހުރި ދަތިތަކާއެކު ދީފައިވާ މުއްދަތުގައި އެ ޕްލޭން ހެދިފައިނުވާތީ، އެކަމުގެ ޝަކުވާ ލޯކަލް ގަވަރމެންޓް އޮތޯރިޓީއަށް ލިބެމުން އަންނަ ކަމަށް އެ އޮތޯރިޓީން ފާހަގަކުރެއެވެ. މިކަމާ ގުޅޭގޮތުން ރައްޔިތުންގެ މަޖިލީހުގެ ލާމަރުކަޒީ ކޮމިޓީއިން ގޮތެއް ނިންމުމަށް އެލްޖީއޭއިން އެދިފައިވާތީ، އެކަމާ ގުޅޭ ގޮތުން މަޝްވަރާ ކުރުމަށް އާދީއްތަ ދުވަހުވަނީ ބައްދަލުވުމެއް ބާއްވާފައެވެ. މި ބައްދަލުވުމުގައި އެލްޖީއޭއިން ލަފަޔަކަށް އެދިފައި އޮތީ މައިގަނޑު ދެކަމަަކަށެވެ.
ފުރަތަމަ ކަމެއްގެ ގޮތުގައި އެދިފައިވަނީ، ދީފައިވާ މުއްދަތުގެ ތެރޭގައި ގާނޫނުގައި ބުނެފައިވާ ފަދައިން ރައްޔިތުންގެ މަޝްވަރާއާއެކު ލޭންޑް ޔޫސް ޕްލޭންގެ މަސައްކަތް ނުނިމޭނެކަން ވަރަށް ގިނަ ކައުންސިލުން ހާމަ ކޮށްފައިވާތީ އެކަމަށް އެކަށީގެންވާ ގޮތެއް ނިންމައިދިނުމަށެވެ. މިކަމަށް ކޮމިޓީގައި ކުރެވުނު މަޝްވަރާތަކުން ނިމިގެން ދިޔައީ، އާއްމު ސިއްޙަތުގެ ގާނޫނުގެ ދަށުން ކުއްލި ނުރައްކަލުގެ ހާލަތު އިއުލާން ކުރުމާއެކު ވަކި މުއްދަތެއްގެ ތެރޭގައި އަމަލުކުރަން ހުންނަ ކަންކަން މަޑު ޖެހޭނެ ކަމަށް ބަޔާން ކޮށްފައިވާތީ، ލޭންޑް ޔޫސް ޕްލޭން ހަދަން އޮންނަ މުއްދަތު ފަސް ކުރެވިދާނެ ކަަމަށެވެ.
ދެވަނަ ކަމެއްގެ ގޮތުގައި އެދިފައިވަނީ، ކުރިން ހަދާފައި ހުރި ލޭންޑް ޔޫސް ޕްލޭން ރިވައިސް ކުރުމުގެ ކުރިން ބިން ބޭނުން ކުރެވޭނެ އުސޫލެއް އޮތްނަމަ އެގޮތެއް ހޯދުމަށެވެ. މިކަމާމެދު ކޮމިޓީގައި ވަކި ގޮތެއް ނުނިންމައެވެ. މިހާރު ދީފައިވާ މުދަތުގައި، ރިވައިސް ނުކުރެވިއްޖެ ނަމަ ރަށުގެ ބިން ބޭނުން ކުރުމުގެ މުއާމަލާތްތަކަށް ހުއްޓުމެއް އަންނާނެކަން ވެސް ކައުންސިލްތަކުން ފާހަގަކޮށްފައިވާކަމަށް އެލްޖީއޭއިން ބުނެއެވެ. މިކަމުގެ ސަބަބުން ތަރައްގީގެ ބައެއް މަޝްރޫއުތަކަށް ވެސް ހުއްޓުމެއް އަންނާނެކަން އެލްޖީއޭއިން ފާހަގަކުރެއްވިއެވެ.
އެލްޖީއޭއިން ފާހަގަކޮށްފައިވަނީ، 44 ރަށެއް ފިޔަވައި އެހެން ރަށްރަށުގެ ލޭންޑް ޔޫސް ޕްލޭން އެލްޖީއޭއަށް ލިބިފައިވީ ނަމަވެސް އެ ޕްލޭން ތަކަކީ، ކުރިން ހަދާފައި ހުރި ލޭންޑް ޔޫސް ޕްލޭންތަކެއް ކަމުން މިހާރު ހަދަން ޖެހޭ ލޭންޑް ޔޫސް ޕްލޭނަށް ނުފެތޭ ކަމަށެވެ. ކުރިން ވެސް ރަށްރަށުގެ ބިން ބޭނުން ކުރުމުގައި އަމަލު ކުރަމުން އައި ގޮތަށް، ލޭންޑް ބަޖެޓް ހެދުމަށްފަހު ޕްލޭނިންގ މިނިސްޓްރީއަށް ހުށަހަޅައި، އެކަން ފާސް ކުރުމަށްފަހު ކުރިއަށް ދެވިދާނެ ކަމަށް ބައެއް މެމްބަރުން ފާހަގަކުރިއެވެ. އެހެންނަމަވެސް މިހާރު ގާނޫނަކުން ވަކި ގޮތަކަށް އަމަލު ކުރުމަށް ކަނޑައަޅާފައިވާ ކަމެއްގައި އެހެން ގޮތަކަށް އަމަލު ކުރެވޭނެތޯ މެމްބަރުން ސުވާލު އުފެއްދެވިއެވެ. އަދި ގާނޫނަށް ބަދަލު ނުގެނެސް ހައްލު ހޯދޭނެ ގޮތެއް އޮވެއްޖެނަމަ އެގޮތެއް ހޯދުމަށް މެމްބަރުން ބާރު އެޅުއްވިއެވެ. މިކަމުގައި އެލްޖީއޭގެ ބޯޑުގައި މަޝްވަރާ ކުރުމަށާއި، ބަންޑާރަ ނައިބުގެ ލަފައެއް ހޯދުމަށް ކޮމިޓީން ވަނީ އެދިފައެވެ.
މި ދެކަމުގައި ވެސް ކައުންސިލަރ ޖެނެރަލްގެ ލަފާ ހޯދުމަށް ކޮމިޓީން ވަނީ ނިންމާފައެވެ.
