ފެބްރުއަރީ މަހުގެ އެއްވަނަ ދުވަހު ފެށުނު ވެކްޝިނޭޝަން ޕްރޮގްރާމްއާއެކު ދައްކަމުންދަނީ އެއްވާހަކައެކެވެ. ކޮވިޑް-19 ކޮންޓްރޯލްކުރުމަށް ކުރަމުންދާ މަސައްކަތުގައި އެންމެން ބައިވެރިވުމަށް ތަކުރާރުކޮށް އިލްތިމާސްކުރަމުންދެއެވެ. ވެކްސިން ޖެހުމުގައި ލަސްނުކޮށް ހުރިހާ މީހުން ވެސް ވެކްސިން ޖެހުމަށް ކަމާބެހޭ ހުރިހާ ފަރާތްތަކުން ދަނީ ގޮވާލަމުންނެވެ. އިންސާނުންނަކީ ވަރަށް ފަސޭހައިން ހަނދާން ނެތޭ ބައެއް ނަމަވެސް މި ފުރުސަތު ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ނުދެއެވެ. ކަން މިހެން އޮތް ނަމަވެސް އެންމެފަހުން ކޮވިޑް-19ގެ ހާލަތާ ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) ތަރުޖަމާނު ޑރ. ނަޒްލާ ރަފީގު ވިދާޅުވެފައިވަނީ'' އަޅުގަނޑުމެން އެންމެ ބޭނުންވާ ވަރަށް އަދިވެސް ވެކްސިން ޖަހަން ބޭފުޅުން ވަޑައިނުގަންނަވާކަން އަޅުގަނޑުމެން ފާހަގަކުރަން''މިހެންނެވެ.
މިގޮތަށް މިކަން ދާނަމަ އެކަމުގެ ގެއްލުން އެންމެނަށް ވެސް ކުރާނެއެވެ. އަނެއްކާ ވެސް ކޭސްތައް އިތުރުވެ ހަރުކަށި ފިޔަވަޅުތަކާއެކު ދިރިއުޅުމަށް އެކަކު ވެސް ހިތެއް ނޭދޭނެއެވެ. ބަލިން ރައްކާތެރިވެ ކުރީގެ ދިރިއުޅުމަށް ދާން އެންމެން ވެސް އެދޭނެއެވެ. އެހެންކަމުން އާބާދީގެ ބޮޑު އިންސައްތައަކަށް ވެކްސިން ޖެހުމަށް ސަރުކާރުން ކުރަމުންދާ މަސައްކަތަށް އާންމު ރައްޔިތުން އެއްބާރުލުން ދޭން ޖެހެއެވެ. ވީހާ ވެސް އަވަހަށް އާބާދީގެ ބޮޑު އިންސައްތައެއް ވެކްސިންގެ ޑޯޒުތައް ފުރިހަމަ ކުރަން ޖެހެއެވެ. މި މަސް ނިމުމުގެ ކުރިން އާބާދީގެ 90 އިންސައްތަ ދެ ޑޯޒު ވެކްސިން ފުރިހަމަކުރުމަށް ސަރުކާރުން އަމާޒު ހިފިނަމަވެސް ރައްޔިތުން އެކަމަށް އިޖާބަ ނުދޭނަމަ އެކަމެއް ކާމިޔާބެއް ނުވާނެއެވެ.
އާބާދީގެ 90 އިންސައްތައަށް ވެކްސިން ޖެހުމުން އެކަމުގެ ރައްކާތެރިކަމާއި ފައިދާ ވެސް އޮތީ ރައްޔިތުންނަށެވެ. ބޮޑެތި ލުއިތަކާއެކު ދިރިއުޅުމުގެ ފުރުސަތު ލިބިގެންދާނީ ވެސް ހަމަ ރައްޔިތުންނަށެވެ. ވެކްސިން ޖެހުމުން އަތުންދާ ޚަރަދު ކުޑަވެ، ގިނަ ލުއިތަކެއް އެބަ ލިބެއެވެ. ނަމަވެސް ވެކްސިން ނުޖަހާނަމަ ގިނަ ފުރުސަތުތަކެއް އެމީހަކަށް އެބަ ގެއްލެއެވެ. ސެޕްޓެންބަރު މަހުގެ އެއްވަނަ ދުވަހުން ފެށިގެން ވެކްސިން ނުޖަހާ މީހުން ރިލީޒް ސާމްޕަލްއަށް ފައިސާ ދައްކަންޖެހޭނެ ކަމަށް ވެސް އެޗްއީއޯސީން ބުނެފައިވެއެވެ.
މިކަން ތަފްސީލް ކޮށްދެއްވައި ޑރ. ނަޒްލާ ވިދާޅުވެފައިވަނީ ވެކްސިން ޖެހުމަށް ޝަރުތު ހަމަވާ އުމުރުފުރާގެ މީހުންގެ ތެރެއިން ވެކްސިން ނުޖަހާ މީހުންނަށް އެއްރަށުން އަނެއް ރަށަށް ދަތުރުކުރުމުގައި މިހާރު އަމަލުކުރަންޖެހޭ އުސޫލަށް ސެޕްޓެންބަރު މަހުގެ އެކަކުން ފެށިގެން ބަދަލު ގެންނަން ނިންމާފައިވާކަމަށެވެ. މިއީ ވެކްސިން ޖަހާ މީހުންގެ ނިސްބަތް އަދިވެސް އެންމެ ބޭނުންވާ މިންވަރަށް އިތުރުނުވާތީ، ވީހާވެސް ގިނަ ބަޔަކު ވެކްސިން ޖެހުމަށް ބާރު އެޅުމުގެ ގޮތުން ނިންމި ނިންމުމެއްކަން ޑރ. ނަޒްލާ ފާހަގަކުރެއްވިއެވެ.
ވެކްސިން ޖެހުމަށް އެކި ގޮތްގޮތުން ބާރުއަޅަމުންދާއިރު، ބޮޑެތި ލުއިތައް ވެސް ދަނީ ދެމުންނެވެ. އާބާދީގެ ނިސްބަތުން ވަކި ވަރަކަށް ވެކްސިން ފުރިހަމަކޮށްފައިވާ ރަށްތަކުން ދަތުރުކުރާނަމަ އިތުރު ލުއިތަކެއް ދިނުމަށް އެޗްއޯސީން ނިންމާފައިވެއެވެ. އެގޮތުން 5 އިންސައްތަ އަށްވުރެ ޕޮޒިޓިވިޓީ ރޭޓް ދަށް ރަށްރަށުން ވެކްސިން ޖަހާފައި ތިބި މީހުން ދަތުރުކުރުމުގެ ކުރިން މިހާރު ހަދަންޖެހޭ ޕީސީއާރް ޓެސްޓު ސެޕްޓެންބަރުމަހުގެ އެއްވަނަ ދުވަހުން ފެށިގެން ހަދަން ނުޖެހޭނެ ކަމަށް އެޗްއީއޯސީން ބުނެފައިވެއެވެ. ނަމަވެސް މި ލުއި ދޭން ނިންމާފައިވަނީ 12 އަހަރުން މަތީގެ އާބާދީގެ 90 އިންސައްތަ މީހުންނާއި، އެ ރަށެއްގައި އުޅޭ 60 އަހަރުން މަތީގެ 95 އިންސައްތަ މީހުން އަދި ގެސްޓް ހައުސް ވިޔަފާރިކުރާ ރަށެއްނަމަ އެ ސިނާއަތުގައި މަސައްކަތްކުރާ މުވައްޒަފުންގެ 95 އިންސައްތަ މީހުން ވެކްސިން ފުރިހަމަކޮށްފައިވާ ރަށްރަށުން ދަތުރުކުރާ މީހުންނަށެވެ.
މީގެ އިތުރުން މިހާރު ރާއްޖެއަށް ލިބިފައިވާ އެސްޓްރަޒެނެކާ ވެކްސިންގެ ޑޯޒްތައް މި ނޮވެމްބަރު މަހު ހަމަވާނެކަން ވެސް ވަނީ ހާމަކޮށްފައިވެއެވެ. އެހެންކަމުން އެންމެ ފަހު ވަގުތު ބޮޑު ކިޔުއެއްގައި ނުޖެހި ވެކްސިން ޖެހުމަކީ ބުއްދިވެރި ގޮތެކެވެ. އެއީ މީގެ ކުރިން ވެސް ފެނިގެން ދިޔަ އެއް މަަންޒަރަކީ ކޮވިޝީލްޑުގެ ފުރަތަމަ ޑޯޒް ޖެހުމުގެ މަސައްކަތް މަޑުޖައްސާލައި، ދެވަނަ ޑޯޒައިގެން ކުރިޔަށް ދާނެކަމަށް ސަރުކާރުން ހަމާކުރުމާއެކު ބޮޑެތި ކިއުތަކެއް ވެކްސިން ސެންޓަރުތަކުގައި ހެދި މަންޒަރެވެ. އެގޮތުން މިފަހަރު ވެސް މަންޒަރު ބަދަލު ކުރުމުގެ އިހުތިޔާރު އޮތީ ރައްޔިތުންގެ އަތުގައެވެ. ކަމާބެހޭ ފަރާތްތަކުން އަންގާ އެންގުންތަކަށް ބޯލަބައި އަމަލުކުރާނަމަ ހުރިހާ ފައިދާއަކާއި މޮޅެއް އޮތީ ހަމަ ރައްޔިތު މިހާއަށެވެ. އެހެންކަމުން އެޗްޕީއޭގެ ބަސް އެހުން ބުއްދިވެރިއެވެ!
