ބްރެޒިލާއި ސްޕެއިން ފައިނަލަށް

ޓޯކިއޯ އޮލިމްޕިކް ގޭމްސް 2020 ގެ ފިރިހެނުންގެ ފުޓްބޯޅަ އިވެންޓުގެ ފައިނަލަށް ބްރެޒިލާއި ސްޕެއިން ދަތުރުކޮށްފިއެވެ.

ފައިނަލުގެ ފުރަތަމަ ޖާގަ އެންމެ ފަހުގެ ޗެމްޕިއަން ބްރެޒިލުން ހޯދީ އަންގާރަ ދުވަހު ކުޅުނު ސެމީ ފައިނަލް މެޗުގައި ޕެނަލްޓީ ޖަހައިގެން މެކްސިކޯ އަތުން 4-1 ގެ ނަތީޖާއަކުން މޮޅުވެގެންނެވެ.

ޖަޕާންގެ މަޝްހޫރު ކަޝިމާ ސްޓޭޑިއަމުގައި ކުޅުނު މެޗުގައި ދެ ގައުމުގެ ފަރާތުންވެސް ގިނަ ހަމަލާތަކެއް ފެނިގެންދިޔައެވެ. އެގޮތުން މެޗު ނިމެން ގާތްވެފައި ވަނިކޮށް ބްރެޒިލުގެ ރިޗާލިސަންއަށް ލަނޑެއް ޖަހަން ރަނގަޅު ފުރުސަތެއް ލިބުނު ނަމަވެސް، އޭނާ ބޮލުން ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ. އެކަމަކު މި މެޗުގެ ފުރިހަމަ ވަގުތާއި، އިތުރު ވަގުތުގެ ދެ ހާފުގައިވެސް ދެ ގައުމުން ކުރެ ގައުމަކަށް ލަނޑެއް ކާމިޔާބުކުރެވިފައެއް ނުވެއެވެ.

އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، މެކްސިކޯއިން ފޮނުވާލި ފުރަތަމަ ދެ ޕެނަލްޓީ ކާމިޔާބުވެފައެއް ނުވެއެވެ. އެ ދެ ޕެނަލްޓީ ފޮނުވާލީ އެޑުއާޑޯ އަގީރޭ އާއި ޔޯހަން ވަސްކުއޭޒްއެވެ. އެކަމަކު ޕެނަލްޓީ ޝޫޓްއައުޓުގައި ބްރެޒިލުން ވަނީ އެ ޓީމުން ފޮނުވާލި ހަތަރު ޕެނަލްޓީވެސް ކާމިޔާބުކޮށްފައެވެ. ބްރެޒިލުގެ ޕެނަލްޓީތައް ކާމިޔާބުކޮށްދިނީ ކެޕްޓަން ޑެނީ އަލްވެސް، ގަބްރިއެލް މާޓިނެއްލީ، ބްރޫނޯ ގިމަރޭސް އަދި ރެއިނިއާއެވެ.

މި ފަހަރުގެ އޮލިމްޕިކްސްގެ ފައިނަލަށް ބްރެޒިލް ދަތުރުކުރިއިރު، އެ ގައުމީ މި ގޭމްސްގެ އެންމެ ފަހުގެ ޗެމްޕިއަނުންނެވެ. 2016 ވަނަ އަހަރު އަމިއްލަ ގައުމުގައި ބޭއްވި ރިއޯ އޮލިމްޕިކްސްއިން ބްރެޒިލް ރަން މެޑަލް ހޯދިއިރު، އޭގެ ކުރިން އެ ގައުމުން ވަނީ އޮލިމްޕިކްސްގެ ފުޓްބޯޅަ އިވެންޓުގައި ރިހި މެޑެއްޔަކާއި ދެ ލޯ މެޑަލް ހޯދާފައެވެ.

މީގެ އިތުރުން މި ފަހަރުގެ ފައިނަލަށް ސްޕެއިން ދަތުރުކުރީ އަންގާރަ ދުވަހު ކުޅުނު ސެމީ ފައިނަލް މެޗުން ގޭމްސް ބާއްވާ ގައުމު ކަމަށްވާ ޖަޕާން އަތުން 1-0 ގެ ނަތީޖާއަކުން މޮޅުވެގެންނެވެ.

ޓޯކިއޯގެ ސައިޓަމާ ސްޓޭޑިއަމުގައި ކުޅުނު މި މެޗުގެ 90 މިނެޓު ހަމަވިއިރު، ދެ ގައުމުން ކުރެ ގައުމަކަށް ލަނޑެއް ކާމިޔާބުކުރެވިފައެއް ނުވެއެވެ. އެކަމަކު މި ދެ ހާފުގައި ސްޕެއިނުން ގިނަ ހަމަލާތަކެއް އުފެއްދިއިރު، ޖަޕާނުން ވަނީ ރަނގަޅަށް ޑިފެންސްކޮށް ސްޕެއިން ހުއްޓުވާފައެވެ.

އެހެންކަމުން ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، ސްޕެއިނުން ލީޑު ނަގާފައިވަނީ ދެވަނަ ހާފު ނިމެން ފަސް މިނެޓަށް ވެފައި ވަނިކޮށެވެ. މިކޭލް އޮޔާޒަބަލުގެ އެހީއާއެކު މި ލަނޑު އެ ގައުމަށް ކާމިޔާބުކޮށްދިނީ މާކޯ އެސެންސިއޯއެވެ.

މި ފަހަރުގެ އޮލިމްޕިކްސްއަށް ވަރުގަދަ ސްކޮޑަކާއެކު ނުކުތް ސްޕެއިން ފައިނަލަށް ދަތުރުކުރިއިރު، އެ ގައުމުން އޮލިމްޕިކްސްގެ ފުޓްބޯޅަ އިވެންޓުން އެންމެ ފަހުން ރަން މެޑަލް ހޯދާފައިވަނީ 1992 ވަނަ އަހަރު އަމިއްލަ ގައުމުގައި ބޭއްވި އޮލިމްޕިކްސްގައެވެ. އަދި ސްޕެއިނުން ވަނީ އޮލިމްޕިކްސްގެ ފުޓްބޯޅަ އިވެންޓުން މިހާތަނަށް ދެ ރިހި މެޑަލް ހޯދާފައެވެ.