ބޮޑީ ވޯން ކެމެރާ ބޭނުންކުރަން ފެށުމާއެކު ރައްޔިތުން ފުލުހުންނަށް ކުރާ އިތުބާރު އިތުރުވެގެންދާނެ ކަމަށް ފުލުހުންގެ ތަރުޖަމާނު ޔޫނުސް ޞަބާހު ވިދާޅުވެއްޖެއެވެ.

ފްރޮންޓްލައިންގައި މަސައްކަތްކުރާ ފުލުހުންގެ ޔުނީފޯމުގައި ހަރުކުރާ 1،400 ކެމެރާ ހޯދަން ފިނޭންސް މިނިސްޓްރީން ބީލަމަށް ހުޅުވާލާފައިވާއިރު މިކަމާ ގުޅިގެން ޔޫނުސް ވިދާޅުވީ މި ކެމެރާތައް ބޭނުން ކުރަން ފެށުމާއެކު ފުލުހުންނާމެދު ކުރެވޭ ތުހުމަތުތަކުގެ ހަގީގަތް ރައްޔިތުންނަށް އެނގިގެންދާނެ ކަމަށާއި، 1400 ކެމެރާ ހޯދަން އެދިފައިވަނީ ފްރަންޓްލައިންގައި މަސައްކަތް ކުރާ ހުރިހާ އޮފިސަރުންނަށް ކެމެރާ ފޯރުކޮށްދިނުމަށް ގަސްތުކުރައްވާތީ ކަމަށެވެ.

މީގެ އިތުރުން އޭގެ ސަބަބުން މުޒާހަރާތަކާއި އަދި އެނޫންވެސް ގޮތްގޮތުން ފުލުހުންނަށް ލިބޭ އަނިޔާތައް މަދުކުރެވިގެން ދާނެ ކަމަށާއި، ފުލުހުންގެ ސަލާމަތަށް ވެސް މި ކެމެރާތަކަކީ ބޭނުންތެރި އެއްޗެއް ކަމަށެވެ. ޔޫނުސް ވިދާޅުވީ މި ކެމެރާތަކުގެ ސަބަބުން ފުލުހުން ޖަވާބުދާރީ ކުރުވާ މުއައްސަސާތަކަށް ވެސް ފަސޭހަތަކެއް ލިބިގެންދާނެ ކަމަށެވެ. އަދި މަދު މުވައްޒަފުންނާއެކު ވެސް މަސައްކަތްކުރުމަށް ފަސޭހަތަކެއް ލިބިގެންދާނެ ކަމަށެވެ.

ބޮޑީ ވޯން ކެމެރާއާ ގުޅޭ ގޮތުން މިނިސްޓަރ އޮފް ހޯމް އެފެއަރޒް އިމްރާން އަބްދުﷲ މީގެ ކުރިން ވިދާޅުވެފައިވަނީ ބޮޑީ ކެމެރާ ބޭނުން ކުރުމަކީ ޕޮލިސީ ލެވަލްގައި އެކަން ކުރަން ނިންމައި، ކެމެރާތައް ހޯދުމުގެ މަސައްކަތް ދިވެހި ފުލުހުންގެ ޚިދުމަތުން ކުރަމުންދާ ކަމެއް ކަމަށެވެ. އެގޮތުން 2020 ވަނަ އަހަރުގެ ޕެންޑަމިކާ ގުޅިގެން ބަޖެޓުން އެ ޚަރަދު ނުކުރެވުމާ ގުޅިގެން 2021 ވަނަ އަހަރުގެ ބަޖެޓުގައި އެކަން ހިމަނާފައިވާ ކަމަށެވެ.

އަދި 1400 ކެމެރާ ހޯދުމަށްޓަކައި ޕައިލެޓް ޕްރޮގްރާމެއް ހިންގައި ރިލަޔަބިލިޓީއަށް ބަލައި އެމެރިކާއިން ކެމެރާ ހޯދުމަށް ޓެންޑަރ ބޯޑަށް ހުށަހެޅުމުން އެކަން އެގޮތަށް ކުރަން ނުފެންނަކަމަށް ޓެންޑަރ ބޯޑުން 5 މެއި 2021 ވަނަ ދުވަހު ނިންމާފައިވާ ކަމަށާއި ބޮޑީ ކެމެރާތައް ހޯދުމަކީ މި އަހަރުގެ ތެރޭގައި މިނިސްޓްރީއާއި ދިވެހި ފުލުހުންގެ ޚިދުމަތުގެ ވެސް ޓާގެޓެެއް ކަމަށެވެ.

މި މަސައްކަތަށް ބީލަން ހުށަހެޅުމުގެ ފުރުސަތު، ޝަރުތު ހަމަވާ ފަރާތްތަކަށް ހުޅުވާލާފައިވާއިރު ޝަރުތު ހަމަވާ ފަރާތެއް ކަނޑައެޅުމުގައި އަމަލުކުރާނީ އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އުސޫލުގެ މަތިން ކަމަށް ފިނޭންސުން ބުނެއެވެ. މީގެ އިތުރުން މި ބީލަމުގައި ބައިވެރިވާން 1،500 ގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހުމާއެކު ޕްރޮޖެކްޓުގެ ބިޑް ސެކިއުރިޓީގެ ގޮތުގައި 390،000 ރުފިޔާ ހުށަހަޅަން ޖެހޭ ކަމަށް ވެސް ބުނެއެވެ.

ފިނޭންސުން ބުނީ އެ ފައިސާ ބަލައިގަންނާނީ މި މަހުގެ 26 ވަނަ ދުވަހާ ހަމައަށް އެ މިނިސްޓްރީގެ އޮންލައިން ޕޭމަންޓް ޕޯޓަލް، ބަނޑޭރި ޕޭ  މެދުވެރިކޮށް ކަމަށެވެ. އަދި މަޝްރޫއުގެ ބީލަން ހުޅުވުން އޮންނާނީ މި މަހުގެ 31 ވަނަ ދުވަހުގެ މެންދުރުފަހު 01:00ގައި ފިނޭންސް މިނިސްޓްރީގެ ނެޝަނަލް ޓެންޑާގެ ޖަލްސާކުރާ މާލަމުގައި ކަމަށެވެ.