ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ މައްޗަށް ދައުލަތުން އުފުލާފައިވާ ދައުވާގެ އިބްތިދާއީ އަޑުއެހުމަށް ވަޑައިގެންނެވީ އެމަނިކުފާނުގެ ބޮޑީގާޑުގެ އެހީތެރިކަމާ އެކުގަ އެވެ.

ގާސިމްގެ މައްޗަށް އުފުލާފައިވާ ރިޝްވަތުގެ މިމައްސަލަ ކްރިމިނަލް ކޯޓުގައި ތާވަލް ކޮށްފައި ވަނީ އަންގާރަ ދުވަހުގެ 11:00 އަށެވެ. ގާސިމް ކޯޓަށް ވަޑައިގެންނެވީ އެމަނިކުފާނުގެ ބޮޑީގާޑުގެ އަތުގައި ހިއްޕަވައިގެން ކޮރުޖައްސަވަމުންނެވެ. 

ގާސިމްގެ މައްޗަށް އުފުލާފައިވާ މިދައުވާގެ ލިޔެކިޔުންތައް މިމަހުގެ 13 ވަނަ ދުވަހު ކްރިމިނަލް ކޯޓުގައި ބޭއްވި އަޑުއެހުމެއްގައި ވަނީ އެ ދައުވާގެ ލިޔެކިއުންތައް ގާސިމްއާ ހަވާލު ކުރައްވާފައެވެ. އޭގެ ފަހުން މިމަހުގެ 16 ވަނަ ދުވަހު މިމައްސަލައިގެ އިބްތިދާއީ އަޑުއެހުމެއް ތާވަލް ކޮށްފައިވަނިކޮށް އެދުވަހު ގާސިމްއަށް ސިއްހީ މައްސަލައެއް ދިމާވެ، އޭޑީކޭ ހޮސްޕިޓަލުގައި ވަނީ އެޑްމިޓް ކުރައްވާފައެވެ. ނަމަވެސް ހޯމަ ދުވަހުގެ ހަވީރުގެ ވަގުތެއްގައި ގާސިމް ވަނީ އޭޑީކޭއިން ފަރުވާ ހޯއްދެވުމަށްފަހު ގެއަށް ބަދަލުވެވަޑައި ގަންނަވާފަ އެވެ.

ގާސިމްގެ މައްޗަށް ދައުލަތުން ވަނީ ރިޝްވަތު ދިނުމަށް ހުށަހެޅުމާއި، ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވަން އުޅުމާއި، ވޯޓު ދޭން ހުރި މީހަކަށް ނުރަނގަޅު ނުފޫޒު ފޯރުވަން އުޅުމުގެ ދައުވާއެވެ. ނަމަވެސް ފަހުން ގާސިމްގެ މައްޗަށް ދައުވާ އުފުލާފައިވަނީ ރިޝްވަތު ދިނުމަށް ހުށަހެޅުމުގެ ދައުވާ އެކަންޏެވެ.

ގާސިމްގެ މައްސަލަ ކޯޓުން ކުރިން ބޭރުކޮށްލި އިރު އެ މައްސަލަ ބެއްލެވި ތިން ފަނޑިޔާރުންގެ ތެރެއިން އޭރު އިސް ގާޒީއަކަށް ހުންނެވި އަބްދުލްބާރީ ޔޫސުފް މިހާރު ވަނީ ޖުވެނައިލް ކޯޓަށް ބަދަލުކޮށްފައެވެ. މިހާރު އެ މައްސަލަ ބައްލަވަނީ އާދަމް އަރީފްއެވެ.