މަކަރާއި ހީލަތުން މީހެއްގެ އަތުން 60،000ށް ވުރެ ގިނަ ފައިސާ ނެގި ކަމުގެ ތުހުމަތުގައި މީހަކު ހޯދަނީ
އޭނާ ހޯދަމުންދަނީ ޖޫން 05 ވަނަ ދުވަހުގެ ވަގުތެއްގައި މަކަރާއި ހީލަތުން ހޯދާފައިވާ ކަމަށް ތުހުމަތު ކުރެވޭ މައްސަލައާ ގުޅިގެން
މަކަރާއި ހީލަތުން ފައިސާ ހޯދި މީހެއް
މަކަރާއި ހީލަތުން މީހެއްގެ އަތުން 60،000ށް ވުރެ ގިނަ ރުފިޔާ ނެގި މައްސަލައަކާ ގުޅިގެން ފުލުހުން މީހަކު ހޯދަން ފަށައިފިއެވެ.
ފުލުހުން ހޯދަމުންދަނީ ހއ. ބާރަށް، ކޭސީވިލާ، އިބްރާހީމް ރަޝީދު (36އ) އެވެ. އޭނާ ހޯދަމުންދަނީ ޖޫން 05 ވަނަ ދުވަހުގެ ވަގުތެއްގައި 7233204 ނަންބަރުން މީހަކަށް ގުޅައި މަކަރާއި ހީލަތުން 60،186/68ރ ހޯދާފައިވާ ކަމަށް ތުހުމަތު ކުރެވޭ މައްސަލައާ ގުޅިގެން ސުވާލުކުރުމަށް ކަމަށް ފުލުހުން ވަނީ ބުނެފައެވެ. ފުލުހުން ވަނީ އިބްރާހީމް ރަޝީދު ޝަހީދު ޙުސައިން އާދަމް ބިލްޑިންގ އަށް އޯގަސްޓް 08 ވަނަ ދުވަހުގެ 16:00ށް ހާޒިރުވުމަށް އަންގާފައެވެ.
ފުލުހުން އޭނާ ހޯދަމުންދަނީ މަކަރާއި ހީލަތުން ފައިސާ ހޯދުމުގެ މައްސަލައެއްގެ ތަހުގީގަށް ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް ކަމަށް ވަނީ ބުނެފައެވެ.
ބީއެމްއެލްގެ ނަމުގައި ވެސް އޮޅުވާލައިގެން ފައިސާ ހޯދުން މިހާރަކަށް އައިސް ވަނީ އިތުރުވެފައެވެ. ބޭންކުންވަނީ މިކަމަށް ސަމާލުވުމަށް އެދިފައެެވެ. ކާޑުގެ މައުލޫމާތާއި، ޓްރާންސެކްޝަންތައް ހެދުމަށް ބޭންކުން ކަސްޓަމަރުންނަށް ނުގުޅާނެކަމަށް އެ ބޭންކުންވަނީ ބުނެފައެވެ.
މަކަރާއި ހީލަތުން ފައިސާ ހޯދުމުގެ މައްސަލަތައް އިތުރުވެފައިވާއިރު 2019 ވަނަ އަހަރުން ފެށިގެން މި އަހަރުގެ ޖޫން މަހުގެ 16 އާ ހަމައަށް 7.4 މިލިއަނަށްވުރެ ގިނަ ރުފިޔާ އެކި މީހުންގެ އަތުން މަކަރާއި ހީލަތުން އަތުލާފައިވާ ކަމަށް ފުލުހުން ވަނީ ބުނެފައެވެ. 2020 ވަނަ އަހަރު އެކަނިވެސް މަކަރާއި ހީލަތުން ފައިސާ ހޯދުމުގެ 226 މައްސަލައެއް ފުލުހުންނަށް ހުށަހަޅާފައިވާ ކަމަށާއި އެ މައްސަލަތަކުގައި 3.5 މިލިއަން ރުފިޔާ އޮޅުވާލައިގެން އެކި މީހުންގެ އަތުން ނަގާފައިވާ ކަމަށް ފުލުހުންގެ ތަހުގީގުތަކަށް ފާހަގަކުރެވޭ ކަމަށެވެ.
މި އަހަރުގެ މިހާތަނަށް އެފަދަ 259 މައްސަލައެއް ހުށަހެޅިފައިވާއިރު އެ މައްސަލަތަކުގައި 3.9 މިލިއަން ރުފިޔާ އެކި މީހުންގެ އަތުން ނަގާފައިވާ ކަމަށް ފުލުހުން ބުނެއެވެ. އެގޮތަށް ފައިސާ އަތުލަމުންދަނީ އެކި މީހުންގެ ނަމުގައާއި ފިހާރަތަކާއި ޖަމުޢިއްޔާތައް އަދި ކުންފުނިތަކުގެ ނަމުގައި އެކި މީހުންނަށް ގުޅައިގެންކަމުުގައި ފާހަގަކުރެއްވިއެވެ. އަދި މިފަދަ މައްސަލަތައް ކޮވިޑް ތެރޭގައި އިތުރުވެފައިވާ ކަމަށް ވެސް ފުލުހުން ބުންޏެވެ.
