އިމުގާ ޕޯޓަލް އަޕްގްރޭޑްކުރުމުގެ މަސައްކަތް މިހާރު ނިމިފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.

"އިމުގާ" އަކީ މޯލްޑިވްސް އިމިގްރޭޝަންގެ ޚިދުމަތްތައް އޮންލައިންކޮށް ދިނުމަށް ބޭނުންކުރާ އެޕެކެވެ. މި އެޕް އަޕްގްރޭޑްކުރުމުގެ މަސައްކަތް އިމިގްރޭޝަނުން ކޮށްފައިވަނީ މިދިޔަ ޖުލައި މަހުގެ 31 ގައެވެ. އަދި އޮގަސްޓު 1 ވަނަ ދުވަހު އެޕް އަޕްގްރޭޑްކުރުމުގެ މަސައްކަތް ނިމިފައިވާކަމަށް އިމިގްރޭޝަނުން ބުނެފައިވެއެވެ.

އިމިގްރޭޝަނުން ބުނީ ރާއްޖެއަށް އައުމާއި ރާއްޖެއިން ފުރުމުގެ 24 ގަޑިއިރު ކުރިން އެ އިދާރާއަށް ހުށަހަޅަންޖެހޭ ހެލްތް ޑިކްލަރޭޝަން ފޯމު އިމުގާ ޕޯޓަލް މެދުވެރިކޮށް މިހާރު ހުށަހެޅޭނެ ކަމަށެވެ.

ކޮވިޑް-19 އާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރޭގައި ރާއްޖެ އެތެރެވުމާއި ރާއްޖެއިން ބޭރުވުމުގެ ކުރިން ހެލްތް ޑިކްލަރެޝަން ފޯމު އިމިގްރޭޝަނަށް ހުށަހަޅަންޖެހެއެވެ. މި ފޯމުގައި ވެކްސިން ފުރިހަމަކޮށްފައިވާނަމަ އެކަމުގެ ތަފްސީލު ހާމަކުރަންޖެހެއެވެ. އެކަމުގެ ލިޔެކިޔުންތަކުގެ ކޮޕީއެއް ހެލްތް ޑިކްލަރޭޝަން ފޯމާއެކު އިމުގާ ޕޯޓަލްއަށް ހުށަހަޅަންޖެހެއެވެ.

މީގެ އިތުރުން ވެކްސިންގެ ޑޯޒް ފުރިހަމަކުރުމަށްފަހު 14 ދުވަސް ހަމަނުކޮށް ރާއްޖެ އަންނަ މީހުންނާއި، ވެކްސިންގެ ޑޯޒްތައް ފުރިހަމަކޮށްފައިނުވާ މީހުންނަށް ރާއްޖެ އެތެރެވެވޭނީ 96 ގަޑިއިރު ނުވާ ނެގެޓިވް ޕީސީއާރު ޓެސްޓަކާއެކު ކަމަށް އިމިގްރޭޝަނުން ބުނެފައިވެއެވެ.

މިގޮތަށް ރާއްޖެ އަންނަ މީހުންގެ ތެރެއިން 1 އަހަރު ނުފެރޭ ކުޑަކުދިން، އެކުދިން ރާއްޖެ އައުމުގެކުރިން 10 ދުވަހުގެ ކަރަންޓީން މުއްދަތެއް ފުރިހަމަކުރަން ޖެހޭނެ ކަމަށް އިމިގްރޭޝަނުން ވަނީ ބުނެފައެވެ. އަދި ހޯމް ކަރަންޓީން ނިންމާގޮތަށް ކޮވިޑަށް ޓެސްޓުކޮށް، ނެގެޓިވް ޕީސީއާރު ޓެސްޓަކާއެކު ރާއްޖެ އައުމަށް އިމިގްރޭޝަނުން ވަނީ އަންގާފައެވެ.

މީގެ އިތުރުން ބޭރު ގައުމުތަކުގައި ތިބޭ ދިވެހިން ވެކްސިންގެ ޑޯޒްތައް ފުރިހަމަނުކުރާނަމަ ރާއްޖެ އައުމުގެކުރިން 10 ދުވަހުގެ ހޯމް ކަރަންޓީނެއް ފުރިހަމަކުރަންޖެހެއެވެ.