ޓޯކިއޯ އޮލިމްޕިކްސް 2020 ގެ ޓެނިސް އިވެންޓުގެ ސެމީ ފައިނަލުން ކަޓައި ދުނިޔޭގެ އެއްވަނަ ޓެނިސް ކުޅުންތެރިޔާ ސާބިއާގެ ނޮވަކް ޖޮކޮވިޗް ދެކެމުން އައި ރަން ކާމިޔާބީގެ ހުވަފެން ނިމުމަކަށް އަތުވެއްޖެއެވެ.

މި ފަހަރުގެ ޓެނިސް ސީޒަނުގައި މިހާތަނަށް ބޭއްވި ތިން ގްރޭންޑް ސްލޭމް މުބާރާތްވެސް ކާމިޔާބުކުރީ އުމުރުން 34 އަހަރުގެ ޖޮކޮވިޗެވެ. އެއާއެ އޮލިމްޕިކްސްގެ އިތުރުން މި އަހަރުގެ އިތުރު ގްރޭންޑް ސްލޭމް މުބާރާތެއް ކާމިޔާބުކޮށް، ރިކޯޑު ހެދުމަށް ޖޮކޮވިޗް އަމާޒުހިފިއެވެ. އަހަރެއްގެ ތެރޭގައި ހަތަރު ގްރޭންޑް ސްލޭމް މުބާރާތާއި އޮލިމްޕިކްސް އެންމެ ފަހުން ކާމިޔާބުކުރީ 1988 ވަނަ އަހަރު ޖަރުމަނުގެ ސްޓެފީ ގްރާފެވެ. ޖޮކޮވިޗަށް އެ ފުރުސަތު އޮތް ނަމަވެސް، އޮލިމްޕިކްސްގެ ސެމީން ކެޓުމާ ގުޅިގެން އޭނާގ ރަން ކާމިޔާބީގެ ހުވަފެން ވަނީ ނިމުމަކަށް އައިސްފައެވެ.

މި ފަަހަރުގެ އޮލިމްޕިކްސްގެ ފިރިހެން ސިންގަލްސް އިވެންޓުގެ ސެމީގައި ހުކުރު ދުވަހު ކުޅުނު މެޗުން ޖަރުމަނުގެ އަލެކްސަންޑަ ޒްވެރެވް ވަނީ 2-1 ސެޓުން ޖޮކޮވިޗް ބަލިކޮށްފައެވެ. މެޗުގެ ސެޓުތައް ދިޔައީ 6-1، 3-6 އަދި 6-1 ންނެވެ. އުމުރުން 24 އަހަރުގެ ޒެވްރެވް އަކީ މި ވަގުތު ދުނިޔޭގެ ރޭންކިންގެ ފަސްވަނައިގައި އޮތް ކުޅުންތެރިޔާއެވެ.

ސެމީގެ މެޗުން ޖޮކޮވިޗް ބަލިވިއިރު، ލޯ މެޑަލް މެޗުގައި އޭނާ ބައްދަލުކުރާނީ ސްޕެއިނުގެ ޕަބްލޯ ކާރޭނިއޯއާއެވެ. އޮލިމްޕިކްސްއިން ޖޮކޮވިޗަށް މިހާތަނަށް ރަން މެޑެއްޔެއް ހޯދިފައިނުވާއިރު، އޮލިމްޕިކްސްގައި މިހާތަނަށް ޖޮކޮވިޗްގެ ކާމިޔާބީއަކީ 2008 ވަަނަ އަހަރު ޗައިނާގައި ބޭއްވި ބެއިޖިން އޮލިމްޕިކްސްގެ ފިރިހެން ސިންގަލްސްއިން ލިބުނު ލޯ މެޑެއްޔެވެ.

އޮލިމްޕިކްސްއިން ކަޓައި ޖޮކޮވިޗްގެ ހުވަފެން ނިމުމަކަށް އައިރު، އޭނާ ވަނީ މި އަހަރުގެ ވިމްބަލްޑަން ޓެނިސް މުބާރާތާއި، އޮސްޓްރޭލިއަން އޯޕަން އަދި ފްރެންޗް އޯޕަން ކާމިޔާބުކޮށްފައެވެ. އެއާއެކު ޖޮކޮވިޗް ވެފައިވަނީ ޓެނިހުގެ އޯޕަން އެރާގައި އެއް އަހަރު ތެރޭ ތިން ގްރޭންޑް ސްލޭމް މުބާރާތް ކާމިޔާބުކުރި ތިންވަނަ ކުޅުންތެރިޔާއަށެވެ.