ހޭލާ ހުންނައިރުވެސް ފެންނަނީ މީހުން މަރުވާތަން

"ހޭލާ ހުންނައިރުވެސް ފެންނަނީ މީހުން މަރުވާތަން. އަބަދުވެސް ހީވަނީ އައިސީޔޫގެ މެޝިންތަކުގެ އަޑުތައް ކަންފަތުގައި ގުގުމާހެން. މީހުންގެ ވޭނީ ރުއިމާ ހަޅޭކުގެ އަޑުތައް އަދިވެސް ސިކުނޑީގައި ވަނީ ބިންވަޅު ނެގިފައި."

މިއީ އިންޑިއާގައި ކޮވިޑް-19 ބަލިން ރަނގަޅުވެ، ހޮސްޕިޓަލުގެ އައިސީޔޫގައި އޮތުމަށްފަހު ގެއަށް ބަދަލުކުރެވުނު އިންޑިޔާގެ ރައްޔިތެއްކަމަށްވާ އުމުރުން 49 އަހަރުގެ ޝަރްމާ ހިއްސާކޮށްފައިވާ ވާހަކަތަކެކެވެ. އޭނާ ބުނީ އޭނާއަށް ކޮންމެ ދުވަހަކުހެން މީހުން މަރުވާތަން ފެންނަ ކަމަށާ އަދިވެސް އެ މަންޒަރުތައް ހަނދާނުން ފޮހެ ނުލެވޭ ކަމަށެވެ. އަދި މިހާރުވެސް ކޮވިޑްގެ ސަބަބުން މަރުވެދާނެއޭ ހީވޭ ކަމަށާ އެކަމާމެދު އަބަދު ބިރުގަނެ ޖެހިލުން ވާކަމަށް ވަނީ ބުނެފައެވެ.

ޕީޓީއެސްޑީ ނުވަތަ ޕޯސްޓް ޓްރައުމެޓިކް ސްޓްރެސް ޑިސްއޯޑަރ އަކީ ނަފްސާނީ ބައްޔެކެވެ. މި ބައްޔަކީ ދިމާވާ ކަމެއްގެ ސަބަބުން އެކަމާ މާ ބޮޑަށް ވިސްނާ ފިކުރުކުރެވި އަދި އެފަދަ ކަމެއް ތަކުރާރު ވެދާނެކަމަށް އަބަދު ހީވުމުގެ ސަބަބުން ދިމާވާ ކަމެކެވެ. މިއީ ލޮލަށް ފެންނަ ބައްޔެއް ނޫނެވެ. ނަފްސާނީ މިފަދަ ބަލިތައް ތަހައްމަލުކުރާ މީހުންނަށް ބައެއް ފަހަރު ބުއްދި ގޯސްވަނީއޭ ހިތަށްއަރާ ފަހަރުވެސް އަންނަ ކަމަށް ދިރާސާތައް ދައްކައެވެ. މިއީ މީހުން އާންމުކޮށް ވާހަކަ ދައްކާ އުޅޭ ބައްޔެއް ނޫނަސް މި ބަލި ޖެހިގެން ރިޕޯޓު ކުރެވޭ މީހުންގެ އަދަދު ވަނީ ބޮޑުތަނުން އިތުރުވެފައެވެ.

ކޮވިޑް-19 ގެ ސަބަބުން ގިނަ ބަޔަކު ދަނީ މިކަން ތަހައްމަލް ކުރަމުންނެވެ. ރިޕޯޓުތައް ދައްކާގޮތުން ކޮވިޑް ބަލިން ފަސޭހަވާ ގިނަ މީހުން ދަނީ މިކަން ތަހައްމަލު ކުރަމުންނެވެ. އެގޮތުން ގްލޯބަލް ހެލްތް ރިސަރޗް އެންޑް ޕޮލިސީއިން ހާމަ ކޮށްފައައިވާ ރިޕޯޓެއްގައި ވާގޮތުން ކޮވިޑް ބަލިން ރަނގަޅުވާ ގިނަ ބަޔަކު ޕީޓީއެސްޑީ އަށް ހުށަހެޅިގެން ދިޔުމުގެ ފުރުސަތު ވަރަށްވެސް ބޮޑެވެ. ދުނިޔޭގެ އެކި ކަންކޮޅުތަކުގައި މިކަން އާއްމު ވެފައިވީއިރު އެންމެ ބޮޑަށް މިކަން ފެންނަމުންދާ އެއްގައުމަކީ އިންޑިޔާއެވެ.

އިންޑިޔާއިން މިފަދަ ގިނަ ކޭސްތަކެއް ވަނީ ރިޕޯޓުކޮށްފައެވެ. އެގޮތުން ބީބީސީއަށް ދިން އިންޓަރވިއު އެއްގައި އެގައުމުގެ ރައްޔިތެއް ކަމަށްވާ ތިވާރީ ބުނެފައިވަނީ ކޮވިޑް-19 އިން ރަނގަޅުވެ ގެއަށް ގެނެވުމުން އޭނާ މުޅިން ރަނގަޅު ނުވާކަން ފާހަގަ ކުރެވުންކަމަށެވެ. އަދި ގޭގައި ހުރި ޓީވީއަށް ހަމަލާ ދީ ގޭގެ އެންމެން ޓީވީ ބެލުމާ ލެޕްޓޮޕް ގެންގުޅުން މަނާ ކުރަން ޖެހުނުކަމަށް އޭނާ ކިޔައިދިނެވެ. ސަބަބަކީ އެ ބޮޑެތި ސްކްރީންތަކުން އައިސީޔޫގެ މަތިން މާ ބޮޑަށް ހަނދާންވެ ބިރުގަނެ ޖެހިލުން ވަނީކަމަށް ވެސް އޭނާ ވަނީ ހިއްސާ ކޮށްފައެވެ.

އިންޑިޔާގެ އިތުރުންވެސް ގިނަ ގައުމުތަކެއްގައި ދަނީ ޕީޓީއެސްޑީގެ ކޭސްތައް ރިޕޯޓު ކުރެވެމުންނެވެ. އިންޑިޔާގެ ޑޮކްޓަރުން ފާހަގަކުރާ ގޮތުގައި ގިނަ ބަޔަކު ކޮވިޑުން ސަލާމަތް ކުރެވެމުން ދިޔަ ނަމަވެސް ޑިޕްރެޝަން އާއި ޕީޓީއެސްޑީ ފަދަ ނަފްސާނީ ބަލިތަކުގެ ޝިކާރައަކަށް އެމީހުން ވެގެން ހިނގައިދާނެ ކަމަށް ގަބޫލު ކުރެވެއެވެ.

ރާއްޖޭގައި ވެސް މިފަދަ ކަންކަމުން ރައްކާތެރިވުމަށް ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން ފެސިލިޓީތަކުގައި ތިބޭ މީހުންނަށް ސައިކޯ ސޯޝަލް ސަޕޯޓު ދިނުމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ސޯޝަލް އެންގޭޖްމަންޓް ޓީމު ފޮނުވަމުން ދާއިރު ކޮވިޑްގެ މިހާލަތުގައި ނަފްސާނީ ދުޅަހެޔޮކަމަށް ވަރަށް ބޮޑަށް އަސަރުކޮށްފައިވާ ކަމަށް އެޗްއީއޯސީގެ ތަރުޖަމާނު ޑރ. ނަޒްލާ ރަފީގް ވެސް ވަނީ ވިދާޅުވެފައެވެ.

އެކި ކަހަލަ ނަފްސާނީ އަސަރުތައް އެކި ފަރާތްތަކަށް ކުރަމުންދާނެ ކަމަށާއި މިކަހަލަ ބަލި މަޑުކަމެއްގެ ތެރޭގައި އުޅޭއިރު ބަލީގެ ހައި ރިސްކް މީހުން ގޭގައި ތިބެން ޖެހުމުން ފިކުރު ބޮޑުވެ އެކި ކަހަލަ ނަފްސާނީ މައްސަލަތަކާއި ކުރިމަތިލާން ޖެހިފައިވާ ކަމަށް ޑރ ނަޒްލާ ވިދާޅުވިއެވެ.

ކޮންމެ ހާލަތެއްގައި ތިބި ކަމުގައިވިޔަސް އަނެކަކު ތަހައްމަލު ކުރަމުންދާ ކަންތައްތައް ނޭނގިދާނެ ކަމަށާއި ކޮންމެ މީހަކަށް ވެސް ލޯތްބާއެކު އަޅާލައި އޯގާތެރިވާ ބަޔަކަށް އަޅުގަނޑުމެން ވާންޖެހޭ ކަމަށް ޑރ ނަޒްލާ ވިދާޅުވިއެވެ.