ހަރުގަނޑެއް ބޭނުންކޮށްގެން ކޮންޓެއިނަރުތަކެއްގެ މައްޗަށް އަރަން އުޅެނިކޮށް ވެއްޓި އަނިޔާވި މަޖޫރީގެ ހާލު ސްޓޭބަލް ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފިއެވެ.

މިހާދިސާ ހިނގީ ބުދަ ދުވަހުގެ އިރުއޮއްސި 6:20 ހާއިރުއެވެ.

އެމްޕީއެލްގެ ސްޕޯކްސްޕާސަން ދާނިޝް ނިޒާމް ވިދާޅުވީ އެމީހާ ވެއްޓުނީ 2 ބަރިއަށް ޖަހާފައި ހުރި ކޮންޓެއިނަރުތަކެއްގެ މަތިން 3 ބަރިއަށް ޖަހާފައި ހުރި ކޮންޓެއިނަރުތަކެއްގެ މައްޗަށް، ހަރުގަނޑެއް ބޭނުންކޮށްގެން އަރަން މަސައްކަތްކުރަމުން ދަނިކޮށް ކަމަށެވެ. އަދި ވެއްޓި ވާތް ވިދުނު ގޮތަކުން ކޮނޑުހުޅާއި އޮޅަބޮއްޓާ ދޭތެރޭގެ ކަށިގަނޑު ބިންދައިގެން ގޮސްފައިވާ ކަމަށެވެ.

މަޖޫރީ މީހާ ހުރީ ސޭފްޓީ ސަރަހައްދުގެ ތެރޭގައި އަޅަން ޖެހޭ ހުރިހާ އެއްޗެއް އަޅައިގެންކަން ފާހަގަކުރައްވައި ދާނިޝް ވިދާޅުވީ ވެއްޓުނީ ގާތްގަނޑަކަށް 9 ފޫޓު މަތިން ކަމަށާއި، ބޮލުގައި ހެލްމެޓް ވެސް އޮތް ކަމަށެވެ.

ދާނިޝް ވިދާޅުވީ ބިންދައިގެން ދިޔަ ތަނުގެ ސަރޖަރީއެއް، އައިޖީއެމްއެޗްއިން ވެސް އަދި އޭޑީކޭއިން ވެސް އަވަހަށް ހެދެން ނެތުމުން، ބުދަ ދުވަހުގެ ރޭ 11:48 ހާއިރު ޓްރީ-ޓޮޕަށް ވަނީ ޓްރާންސްފަރ ކޮށްފައިވާ ކަމަށެވެ. އަދި އޭނާގެ ހާލު ވަރަށް ގާތުން ބަލަމުންދާ ކަމަށެވެ.

އެމްޕީއެލްގެ ވިޔަފާރި ބަނދަރުގައި މީގެ ކުރިން ނުރައްކާތެރި ބައެއް ހާދިސާތަކެއް ހިނގައި މުވައްޒަފުންނަށް ބޮޑެތި އަނިޔާތަކެއް ވެފައިވާތީ އެކުންފުނިން ބުނެފައިވަނީ، ވިޔަފާރި ބަނދަރުގައި މަސައްކަތް ކުރާ މީހުންގެ ސަލާމަތާއި ރައްކާތެރިކަމަށް ޚާއްސަ އިސްކަމެއް ދީގެން މިހާރު މަސައްކަތް ކުރަމުން އަންނަ ކަމަށެވެ.