ވަރާން ވިއްކާލަން ރެއާލާއި ޔުނައިޓެޑް އެއްބަސްވުމަކަށް

ފްރާންސް ޑިފެންޑަރު ރަފައެލް ވަރާން މެންޗެސްޓާ ޔުނައިޓެޑަށް ވިއްކާލަން ރެއާލް މެޑްރިޑުން އެއްބަސްވުމަކަށް އައިސްފައިވާ ކަމަށް ރިޕޯޓުތައް ބުނެފިއެވެ.

ރެއާލާއެކު އުމުރުން 28 އަހަރުގެ ވަރާން މިހާރު ހަދާފައިވާ އެއްބަސްވުން އަންނަ އަހަރުގެ ޖޫން މަހު ހަމަވާނެއެވެ. ރިޕޯޓުތައް ބުނާ ގޮތުން ވަރާން މީގެ ކުރިން ވަނީ ރެއާލް ދޫކޮށްލަން ބޭނުންވާކަން އެ ކުލަބަށް އަންގާފައެވެ. އަދި ރެއާލް ދޫކޮށްލަން އޭނާ ބޭނުންވަނީ ކެރިއަރުގައި އައު ތަޖުރިބާއެއް ކުރުމަށް ކަމަށްވެސް ރިޕޯޓުތައް ވަނީ ބުނެފައެވެ.

ރެއާލް ދޫކޮށްލަން ވަރާން ބޭނުންވާތީ، މި ފަހަރުގެ ޓްރާންސްފާގައި އޭނާ ވިއްކާލަށް ރެއާލަށް މަޖުބޫރުވެއެވެ. އެއީ މި ޓްރާންސްފާގައި އޭނާ ވިއްކާނުލެވިއްޖެނަމަ، އަންނަ އަހަރު ހިލޭ ޓްރާންސްފާއެއްގެ ދަށުން ވަރާނަށް ކުލަބު ބަދަލުކުރުމުގެ ފުރުސަތު އޮތުމުންނެވެ.

ރިޕޯޓްތައް ބުނާ ގޮތުން 50 މިލިޔަން ޔޫރޯއަށް ވަރާން ޔުނައިޓެޑަށް ވިއްކާލަން ރެއާލުން މިހާރު ވަނީ އެއްބަސްވެފައެވެ. އެހެންކަމުން ލަސްވެގެން ކުރިއަށް އޮތް ދެ ތިން ދުވަހެއްގެ ތެރޭ ވަރާން ޔުނައިޓެޑުގެ މެޑިކަލް ޓެސްޓްތައް ފުރިހަމަކުރުމަށްފަހު، އެ ޓީމާއެކު އެއްބަސްވުމުގައި ސޮއިކުރާނެ ކަމަށްވެސް ރިޕޯޓުތައް ބުނެއެވެ.

ޔުނައިޓެޑުން ވަރާންގެ ސޮއި ހޯދުމާ ގާތަށް ގޮސްފައިވާއިރު، ފްރާންސްގެ ލެންސްއިން ކެރިއަރު ފެށި ވަރާން ސްޕޭނުގެ ރެއާލާ ގުޅުނީ 2011 ވަނަ އަހަރުއެވެ. މިހާތަނަށް ވަރާން ވަނީ ރެއާލަށް 360 މެޗު ކުޅެދީ، 17 ލަނޑު ޖަހާދީފައެވެ. އަދި ވަނީ އެ ކުލަބާއެކު ސްޕެނިޝް ލީގު ތިން ފަހަރު، އަދި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބުކޮށްފައެވެ.

މީގެ އިތުރުން ފްރާންސްގެ ގައުމީ ފުޓްބޯޅަ ޓީމަށް މިހާތަނަށް 79 މެޗު ކުޅެދީފައިވާ ވަރާނަކީ އެ ގައުމުން 2018 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރިއިރު، އެ ޓީމުގައި ހިމެނުނު މުހިންމު ކުޅުންތެރިއެކެވެ.