ކ. ކާށިދޫއިން މިހާތަނަށް 153 މީހަކު ޕޮޒިޓިވްވެއްޖެއެވެ.

ކާށިދޫ ހެލްތް ސެންޓަރުން އާއްމުކޮށްފައިވާ ތަފާސްހިސާބުތައް ދައްކާ ގޮތުން އެރަށުން މިހާތަނަށް 153 މީހަކު ޕޮޒިޓިވްވެފައިވާއިރު، އާދިއްތަ ދުވަހު ރޭ 7:00ން ހޯމަ ދުވަހުގެ ރޭ 7:00ށް ނެގި ސާމްޕަލްތަކުގެ ތެރެއިން އިތުރު 18 މީހަކު ވަނީ ޕޮޒިޓިވްވެފައެވެ. ހެލްތް ސެންޓަރުން ބުނީ 54 މީހަކު ބަލިން ރަނގަޅުވެފައިވާ ކަމަށާއި، 77 ސާމްޕަލެއްގެ ނަތީޖާ އަދި ނުލިބޭ ކަމަށެވެ. ކާށިދޫގައި 99 އެކްޓިވް ކޭސް ހިމެނޭ ކަމަށާއި، 84 ގެއެއް މޮނިޓަރިންއަށް ލެވިފައިވާ ކަމަށް އެ ސެންޓަރުން ބުނެއެވެ.

ކޮވިޑް-19ގެ އެއްވެސް އަލާމާތެއް ފެންނަ ނަމަ ލަސްނުކޮށް ޓެސްޓުކުރުމަށް ހެލްތް ސެންޓަރުން އިލްތިމާސްކޮށްފައިވެއެވެ. އެގޮތުން ހުން އައުން ނުވަތަ އަރިދަފުސް ރޯގާގެ އަލާމާތެއް ހުރެއްޖެނަމަ މަރުކަޒަށް ނައިސް މަރުކަޒުގެ ނަންބަރު 6640127ށް ގުޅައި އޮންލައިންކޮށް ކޮންސަލްޓޭޝަން ހެދުމަށް އެދިފައިވެއެވެ. މިގޮތަށް ބެލުމަށްފަހު އިތުރު ފަރުވާއެއް ދޭން ޖެހިއްޖެނަމަ އެކަން ކުރިއަށް ގެންދާނެ ކަމަށް ސިއްހީ މަރުކަޒުން ބުނެއެވެ. އަދި ސާމްޕަލިންގެ މަސައްކަތަށް ޚާއްސަ އިސްކަމެއްދޭއިރު، މިހާތަނަށް 2548 ސާމްޕަލެއް ނަގާފައިވެއެވެ.

ޖުލައި މަހުގެ 12 ވަނަ ދުވަހު ރެންޑަމްކޮށް ނެގި ސާމްޕަލްތަކުގެ ތެރެއިން ދެ ސާމްޕަލެއް ޕޮޒިޓިވްވެފައިވެއެވެ. އޭގެ ފަހުން ބައްޔަށް ޕޮޒިޓިވްވާ މީހުންގެ އަދަދު ދަނީ އިތުރުވަމުންނެވެ. އެރަށް މޮނިޓަރިންގެ ހާލަތަށް ގެނެސްފައިވާއިރު، އަމިއްލަ ރައްކާތެރިކަމާއި، އެހެން މީހުންގެ ރައްކާތެރި ކަމަށްޓަކައި، އަނގަޔާއި ނޭފަތް ނިވާވާ ގޮތަށް މާސްކު އެޅުމާއި، އިޖުތިމާއީ ގައިދުރުކުރުކަން ބެހެއްޓުމަށާއި، ސައިބޯނިލައިގެން ގިނަގިނައިން އަތްދޮވުމާއި، ރައްކާތެރިކަމުގެ އެންމެހާ ފިޔަވަޅުތައް އެޅުމަށް ސިއްހީ މަރުކަޒުން އިލްތިމާސްކޮށްފައިވެއެވެ.

ބަލި ކޮންޓްރޯލް ކުރުމަށް ގިނަ ފިޔަވަޅުތަކެއް އަޅާފައިވާ ކަމަށާއި، ގިނަ ރައްޔިތުންގެ ފަރާތުން އެއްބާރުލުން ލިބޭކަން އެސެންޓަރުން ފާހަގަކޮށްފައިވެއެވެ.