ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން އިތުރު 6 މީހެއްގެ ވަނަވަރު ފުލުހުން އާންމުކޮށްފައިވާއިރު ހަމަލާގައި ހިމެނޭ ބައެއް މީހުން އިއުތިރާފުގެ އެއްބަސްވުން ހެދުމަށް އެދިއްޖެއެވެ.

ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕްރޮސެކިއުޓަރ ޖެނެރަލް (ޕީޖީ) ހުސެއިން ޝަމީމް ވިދާޅުވީ ހަމަލާއާ ގުޅިގެން ހައްޔަރުކުރި މީހުންގެ ތެރެއިން ބަޔަކު އިއުތިރާފްގެ އެއްބަސްވުން ދައުލަތާއެކު ހަދަން ބޭނުންވާ ކަމަށެވެ. އެހެންނަމަވެސް އިއުތިރާފްގެ އެއްބަސްވުމުގައި ދައުލަތުން ގޮތެއް ނުނިންމާ ކަމަށާއި ގޮތެއް ނިންމާނީ ދިރާސާ ކުރުމަށްފަހު އެމީހުންގެ ފަރާތުން ލިބޭ މައުލޫމާތުގެ މައްޗަށް ބިނާކޮށް އެ ހަމަލާގެ އަސްލަށް ވާސިލުވާން ލިބޭނެ އެހީތެރިކަމުގެ މައްޗަށް ބެލުމަށްފަހުގައި ކަމަށް ޝަމީމް ވިދާޅުވިއެވެ.

ފުލުހުން ވަނަވަރު އާންމު ކުރި މީހުންނަކީ ހަމަލާ ދިނުމުގައި އަމަލީ ގޮތުން ބައިވެރިވި މީހުންނާއި، ހަމަލާ ރޭވުމުގައި އިސްކޮށް ހަރަކާތްތެރިވި މީހުން ކަމަށް ވަނީ ބުނެފައެވެ.

މީގެ ކުރިންވެސް ފުލުހުން ވަނީ ހަމަލާއާ ގުޅިގެން ހައްޔަރުކުރި ހަތަރު މީހެއްގެ ވަނަވަރު އާންމުކޮށްފައެވެ. އެއީ ބޮން ގޮއްވާލަން ރިމޯޓަށް ފިއްތިކަމަށް ތުހުމަތުވާ އަދުހަމް އަހުމަދު ރަޝީދު (26) ހިޔާ، ވ. ތިނަދޫ، މުޖާޒު އަހުމަދު (21) މއ. ފޭރުގެ، ތަހުމީން އަހުމަދު (32) ގއ. ކޮނޑޭ، ފޮޅޭމާ، އަހްމަދު ފާތިހު (23) ލ. ގަން، ދުންފިނިއުފާއެވެ. މި ހަމަލާއާ ގުޅިގެން ޖުމްލަ 10 މީހަކު ވަނީ ހައްޔަރުކޮށްފައެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝަމީމް އިތުރަށް ވިދާޅުވީ މި ތަހުގީގު މިހާރު ވެސް ވަރަށް ކައިރިން ބައްލަވަމުން ގެންދަވާ ކަމަށާއި ހަތަރު މީހުންނަށް ކުރާ ދައުވާތަކުގެ ތަފްސީލު ކޯޓަށް ހުށައަޅުއްވާނެ ކަމަށެވެ. އަދި އަންނަ މަހު ކުރީ ކޮޅު އެ މައުލޫމާތު ހިއްސާ ކުރައްވާނެ ކަމަށް ވެސް ވަނީ ބުނެފައެވެ. ކުރިއަތް އޮތް ތިން މަހެއްހާ ދުވަހުގެ ތެރޭގައި މި މައްސަލައިގެ ތަހުގީގު ނިމޭނެ ކަމަށް އުންމީދު ކުރައްވާ ކަމަށް ވެސް ޝަމީމް ވިދާޅުވިއެވެ.