ކުޅުދުއްފުށީ އެއާޕޯޓު އެޅުމަށް ތައްޔާރުކޮށްފައިވާ އީއައިއޭ ރިޕޯޓުގައި ފުރިހަމަވާންޖެހޭ ގިނަ ކަންތައްތަކެއް ފުރިހަމަނުވެ ހުރިކަމަށް ކުޅުދުއްފުށީ ސިޓީގެ މޭޔަރ މުޙައްމަދު ޢާޠިފް ވިދާޅުވެއްޖެއެވެ.
ކުޅުދުއްފުއްޓަކީ ވަރަށް ބޮޑު ކުޅިއެއް އޮންނަ ރަށަކަށް ވެފައި، އެރަށުގައި އެއާޕޯޓު އެޅުމުން އެ ކުޅީގެ ވަރަށް ބޮޑު ބައެއް ވަނީ ގެއްލިގެން ގޮސްފައެވެ.
މިކަމާ ގުޅިގެން ތިމާވެއްޓަށް ލިބުނު ގެއްލުމާ ގުޅޭގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން މޭޔަރ ވިދާޅުވީ އެރަށުގައި އެއާޕޯޓު އެޅުމުން ކުޅީގެ ވަރަށް ބޮޑު ބައެއް ގެއްލިގެން ގޮސްފައިވާ ކަމަށެވެ.
އެއާޕޯޓުގެ ޚިދުމަތަކީ ވަރަށް ގިނަ ރައްޔިތުންތަކެއް ބޭނުންވާ ޚިދުމަތެއް ނަމަވެސް، އެއާޕޯޓު އެޅުމަށް ތައްޔާރުކޮށްފައިވާ އީއައިއޭ ރިޕޯޓުގައި ފުރިހަމަވާންޖެހޭނެ ކަމަށް ފާހަގަކޮށްފައިހުރި ވަރަށް ގިނަ ކަންކަން ފުރިހަމަނުވެ ހުރިކަން ފާހަގަކުރެވުނު ކަމަށް މޭޔަރ ވިދާޅުވިއެވެ.
އެގޮތުން ކުޅީގައި ރިވެޓްމެންޓް ޖަހައި، އެއާޕޯޓު އެޅުމަށް ހިއްކި ހިސާބުން، ކުޅިއަށް ވެލި ނާންނާނެހެން ހެދުމަށް އީއައިއޭ ރިޕޯޓުގައި ހިމަނާފައިވާކަމަށް މޭޔަރު ވިދާޅުވިއެވެ. އެހެންނަމަވެސް އެގޮތަށް ރިވެޓްމެންޓް ޖަހާފައިނުވާ ކަމަށާއި، މިވަގުތު އެތަން އޮތީ އެއްކޮށް ދޫކޮށްލާފައި ކަމަށް މޭޔަރ ވިދާޅުވިއެވެ.
އެއާޕޯޓުގެ ހުޅަނގުކޮޅު ތޮށިގަނޑުގައި ޖެހުމަށް އީއައިއޭ ރިޕޯޓުގައި ބުނެފައިހުރީ ބޮޑެތި ގައު ޖެހުމަށް ކަމަށާއި، އެހެންނަމަވެސް ތޮށިގަނޑުގައި ޖަހާފައި ހުރީ ކުދި ގައު ކަމަށާއި، މިހާރު ތޮށިގަނޑު ވަރަށް ބޮޑަށް ހަލާކުވެފައިވާކަން އޭނާ ފާހަގަކުރެއްވިއެވެ.
އަދި މިކަންކަން ވަރަށް އަވަހަށް ހައްލު ނުކޮށްފިނަމަ ބޮޑު ގެއްލުމެއް ލިބިގެންދާނެ ކަމަށް މޭޔަރ ވިދާޅުވިއެވެ.
ކުޅުދުއްފުށީ އެއާޕޯޓަކީ މިވަގުތުވެސް އޮޕަރޭޓްކުރަމުންދާ އެއާޕޯޓެކެވެ. އެހެންނަމަވެސް މި އެއާޕޯޓުގައި އަދިވެސް ބައެއް މަސައްކަތްތައް ނުނިމި ހުރިކަމަށާއި، ރަންވޭ ލައިޓިންގގެ މަސައްކަތް އަދިވެސް ކުރިއަށްދާކަމަށް މޭޔަރު ވިދާޅުވިއެގެ.
މިކަންތައް އަވަސް ގޮތަކަށް ހައްލުކޮށްދެއްވުމަށް ރައީސުލްޖުމްހޫރިއްޔާގެ އަރިހުން ވެސް އެދިފައިވާކަމަށާއި، މިހާރު ކުރިއަށްދަނީ މި މަސައްކަތުގެ ސޮއިކުރުމުގެ މަރުހަލާ ކަމަށް މޭޔަރ ވަނީ ވިދާޅުވެފައެވެ.
ކުޅުދުއްފުށީ އެއާޕޯޓުގެ މަސައްކަތް އެއްކޮށް ނިންމައި، ޝެޑިއުލް ދަތުރުތައް ފަށާފައިވަނީ 09 އޮގަސްޓު 2019 ގައެވެ. ދަތުރުތަށް ފެށި އިރު އެ އެއާޕޯޓަށް ޖެއްސުމަށްޓަކައި ޝެޑިއުލްކޮށްފައިވަނީ އެންމެ ފްލައިޓެކެވެ.
