ކޮވިޑް ބަލީގައި އިތުރު މީހަކު ނިޔާވެއްޖެ
ނިޔާވީ އުމުރުން 60 އަހަރުގެ ދިވެހި ފިރިހެނެއް
ކޮވިޑް-19 ބަލީގައި ނިޔާވި ބަޔަކު ވަޅުލުމަށް ތައްޔާރުވުމުގެ ތެރެއިން
ކޮވިޑް-19 ބަލީގައި ރާއްޖެއިން އިތުރު މީހަކު ނިޔާވެއްޖެއެވެ.
ހެލްތް ޕޮރޮޓެކްޝަން އެޖެންސީ (އެޗްޕީއޭ) އިން ބުނީ ހުކުރު ދުވަހުގެ ރޭ 11:43 ގައި ހުޅުމާލޭ މެޑިކަލް ފެސިލިޓީގައި އެޑްމިޓުކޮށްގެން ފަރުވާ ދެމުންދިޔަ އުމުރުން 60 އަހަރުގެ ދިވެހި ފިރިހެނަކު ނިޔާވެފައިވާ ކަމަށެވެ.
މިއީ ކޮވިޑް-19 ބަލީގައި ރާއްޖެއިން ނިޔާވި 219 ވަނަ މީހާއެވެ. އަދި މި ބަލީގައި ޖުލައި މަހު ނިޔާވި 8 ވަނަ މީހާއެވެ.
މި ބަލީގައި އެންމެ ފަހުން މީހަކު ނިޔާވީ މިދިޔަ އަންގާރަ ދުވަހުއެވެ.
އެއީ ބ. ކޮވިޑް މެނޭޖްމެންޓް ފެސިލިޓީގައި އެޑްމިޓުކޮށްގެން ފަރުވާ ދެމުންދިޔަ އުމުރުން 91 އަހަރުގެ ދިވެހި އަންހެނެއް ކަމަށް އެޗްޕީއޭއިން ބުނެފައިވެއެވެ.
މި ބަލީގައި އެންމެ ގިނަ ބަޔަކު ނިޔާވެ ގޮސްފައިވަނީ މިދިޔަ މެއި މަހުއެވެ. މެއި މަހު 88 މީހަކު ވަނީ ނިޔާވެފައެވެ.
