ވެލާނާ އިންޓަނޭޝަނަލް އެއާޕޯޓް (ވީއައިއޭ)ށް ފުރަން ދިޔަ ފަތުރުވެރިއެއްގެ ދަބަހުން ވަޒަންތަކެއް ފެނުނު މައްސަލައާ ގުޅިގެން ހަދަން ޖެހޭ ރިޕޯޓުތައް ހެދުމަށްފަހު ޑިފެންސް މިނިސްޓްރީއާ ހިއްސާކޮށްފިއެވެ.

ރާއްޖެޓީވީގެ ފަށާއިރު ޕްރޮގްރާމްގައި ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފު ވިދާޅުވީ ވަޒަންތައް ފެނުނު މައްސަލައާ ގުޅިގެން ބަލަން ޖެހޭ ކަންކަން ބަލާފައިވާ ކަމަށާއި، ރިޕޯޓު އެކުލަވާލާފައިވާ ކަމަށެވެ. އަދި މިހާރު އެރިޕޯޓު ޑިފެންސް މިނިސްޓަރު މާރިޔާ އަހުމަދު ދީދީއާ ހިއްސާކޮށްފައިވާ ކަމަށް ޝަރީފް ވިދާޅުވިއެވެ.

ފުރަން ދިޔަ ފަތުރުވެރިއެއްގެ ދަބަހުން ވަޒަންތަކެއް ފެނުމުން އޭނާ ރާއްޖެއަށް އެތެރެވެފައިވާނީ ވެސް ވަޒަންތަކާއެކުކަން ފާހަގަކުރައްވައި ޝަރީފް ވިދާޅުވީ ކަސްޓަމްސްގެ އޮފިސަރެއްގެ އިހުމާލުން ވީކަމެއްގެ ގޮތުގައި ނުބެލެވޭ ކަމަށެވެ. ނަމަވެސް ރާއްޖެއަށް އެތެރެވާއިރު، ބަލަން ހުންނަ މެޝިންތަކަކީ ކުރީގެ މެޝިންތަކަކަށްވެފައި އެނިޒާމެއް ތެރެއިން ނުފެނި ދިއުމުގެ ފުރުސަތު އޮވެދާނެ ކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ ބޭރުގައި ހުންނަ މެޝިންތަކުން ދެނެނުގަނެވުނު ކަމުގައިވީ ނަމަވެސް ޝައްކުވާ ހާލަތެއްގައި އެތެރޭގައި ބެހެއްޓިފައި ހުންނަ މެޝިނުން ބަލާ ކަމަށެވެ. އަދި ފިޒިކަލީ ގޮތުން ވެސް ބަލަން ޖެހޭ ހާލަތްތަކުގައި ބަލާކަން ޝަރީފް ވިދާޅުވިއެވެ.

ވީއައިއޭށް ފުރަން ދިޔަ ފަތުރުވެރިއެއްގެ ދަބަހުން ވަޒަންތަކެއް ފެނިގެން ހައްޔަރުކުރި ފަތުރުވެރިޔާ ޑީޕޯޓުކޮށްލާފައިވަނީ ޖުލައި މަހުގެ 20 ވަނަ ދުވަހު ކޮންޓްރޯލަރ އޮފް އިމިގްރޭޝަންއަށް ލިބިގެންވާ ބާރުގެ ދަށުން ދުވަހަކުވެސް ރާއްޖެ ނާދެވޭ ގޮތަށެވެ.

ފުލުހުން ބުނެފައިވަނީ ވަޒަންތައް ފެނިފައިވަނީ ނެމީބިއާގެ 60 އަހަރުގެ ފަތުރުވެރިއެއްގެ ދަބަހުން ކަމަށެވެ. ނެމީބިޔާއަކީ އެފްރިކާގެ ހުޅަނގު ދެކުނު ބިތުގައިވާ ގައުމެކެވެ. އެ މައްސަލަ ފުލުހުންނަށް ލިބިފައި ވަނީ ޖުލައި މަހުގެ 10ވީ ހޮނިހިރު ދުވަހުގެ ހެނދުނު 9:52 ހާއިރުއެވެ. މި މައްސަލަ އިތުރަށް ތަހުގީގު ކުރަމުންދާއިރު، އިތުރު ތަފްސީލް ފުލުހުން ހާމަކޮށްފައެއް ނުވެއެވެ.

ރާއްޖޭގައި އާންމުން މިގޮތަށް ވަޒަން ފަދަ ތަކެތި ގެންގުޅުމަކީ ގާނޫނާ ޚިލާފު ކަމެކެވެ. އަދި އެފަދަ ތަކެތި ރާއްޖެ އެތެރެކުރުމަކީ ވެސް މަނާ ކަންކަމެވެ.